အသက်မပြည်တဲ့ အမျိုးသမီးငယ်ကို ငွေကြေးမက်လုံးပေးပြီး တရုတ်ဇနီးမယား အဖြစ် ရောင်းစားဖို့စီစဉ် ဆောင်ရွက်ခဲ့သူတွေကို အလုပ်နဲ့ထောင်ဒဏ် နှစ် ၂၀စီ ပြစ်ဒဏ်ချမှတ်ခဲ့တယ်လို့ မြန်မာနိုင်ငံရဲတပ်ဖွဲ့ဆီ သိရပါတယ်။
ရှမ်းပြည်နယ် ၊နောင်ချိုမြို့နယ်က အသက်၁၅နှစ် ဝန်းကျင်အရွယ် အမျိုးသမီးငယ်ကို တရားခံတွေက ငွေကြေးမက်လုံးပေး စည်းရုံး ပြီး တရုတ်နိုင်ငံက လူပွဲစားထံပို့ဆောင်ခဲ့တယ်လို့ သိရပါတယ်။ ဒီနောက် တရုတ်နိုင်ငံသားနဲ့ ပေးစားဖို့
အတွက် ရောင်းစားဖို့စီစဉ် လုပ်ဆောင်ခဲ့ကြတယ်လို့ သိရပါတယ်။
အမျိုးသမီးငယ်ကို ရောင်းစားဖို့ စီစဉ်လုပ်ဆောင်ခဲ့ကြတဲ့ မူဆယ်မြို့က မခမ်းအိန် ၊ စိုင်းမြင့်ဦး(ခ) အိုက်မြင့်ဦး၊ မမိုခေး (ခ) အိုက်လောဝ် နဲ့ ကြည်ဝင်း(ခ)ခေးလျန်း(ခ)ကိုစိုင်း တို့ကို မူဆယ်မြို့မရဲစခန်းက (ပ)၆၂/၂၀၂၅၊ လူကုန်ကူးမှုတားဆီးနှိမ်နင်းရေး ဥပဒေပုဒ်မ-၃၇/၃၈(က)/၄၄ နဲ့အမှုဖွင့် တရားစွဲတင်ခဲ့တယ်လို့ သိရပါတယ်။
ဇွန်လ ၅ ရက် မှာ မူဆယ် ခရိုင်တရားရုံးက တရားခံ မခမ်းအိန်၊ စိုင်းမြင့်ဦး(ခ)အိုက်မြင့်ဦးနှင့် မမိုခေး(ခ) အိုက်လောဝ်တို့ သုံးဦးအား လူကုန်ကူးမှု တားဆီးနှိမ်နင်းရေး ဥပဒေပုဒ်မ၃၈(က)အရ အလုပ်နှင့်ထောင်ဒဏ်နှစ် ၂၀ အပြစ်ဒဏ် ချမှတ်ပြီး တရားခံကြည်ဝင်း (ခ)ခေးလျန်း(ခ) ကိုစိုင်းကို လူကုန်ကူးမှု တားဆီးနှိမ်နင်းရေး ဥပဒေပုဒ်မ ၃၇ နဲ့ ထောင်ဒဏ် ငါးနှစ်ကျဖို့ အမိန့်ချမှတ်ခဲ့ပြီး တိမ်းရှောင်တရားခံ မမိုးကို ရာဇဝတ် ကျင့်ထုံး ဥပဒေပုဒ်မ ၈၇/၈၈ နဲ့ အမိန့်ချမှတ်ခဲ့တယ်လို့ သိရပါတယ်။
ပြည်တွင်းက ငွေကြေး အခက်ခဲရှိနေ တဲ့ အမျိုးသမီးငယ်တွေ ကို ပွဲစားတွေ က ပြစ်မှတ်ထား ချဉ်းကပ်ပြီး ငွေကြေးမက်လုံးပေးကာ တရုတ်မယား အဖြစ် ရောင်းစားဖို့ လုပ်ဆောင်တာတွေ မကြာခဏ ဖြစ်ပွား နေတယ်လို့လူကုန်ကူးမှုတားဆီးနှိမ်နှင်းရေးရဲတပ်ဖွဲ့ထံမှ သိရပါတယ်။
