တရုတ်ဇနီးမယား ပြုလုပ်ပါက ကျပ်သိန်း ၁၅၀ ရမယ်လို့ မြန်မာအမျိုးသမီး များကို ပြောဆိုစည်းရုံးပြီး တရုတ်နိုင်ငံသို့ ပို့ဆောင်ကာငွေကြေးအမြတ်ထုတ်သူ ၂ဦးကို လူကုန်ကူးမှုဖြင့် အလုပ်နှင့် ထောင်ဒဏ် ၁၅ နှစ်စီ ချမှတ်လိုက်ကြောင်း မြန်မာနိုင်ငံရဲတပ်ဖွဲ့ရဲ့သတင်းထုတ်ပြန်မှုအရသိရပါတယ်။
ဖြစ်စဉ်မှာ ရန်ကုန်မြို့ ဒဂုံမြို့သစ်ဆိတ်ကမ်းမြို့နယ်နဲ့မရမ်းကုန်းမြို့နယ်တို့မှာ နေထိုင်တဲ့ အမျိုးသမီး ၂ ဦး ကို ကချင်ပြည်နယ်နေ မလုတောင်၊ ဒဂုံမြို့သစ်ဆိပ်ကမ်းမြို့နယ်နေ မကရင်မ(ခ)မ၀ဝင်းဆန်းနဲ့လိပ်စာတူမခင်သီတာ(ယခုတရုတ်နိုင်ငံတွင်နေထိုင်သူ)တို့ကတရုတ်အမျိုးသားနှင့် တစ်နှစ်ပေါင်းသင်းနေထိုင်ပါက မြန်မာကျပ်ငွေ သိန်း ၁၅၀ ရရှိမည် ဟု စည်းရုံးပြောဆိုခဲ့ပြီး ယာယီနယ်စပ်ဖြတ်သန်းခွင့် အသုံးပြုကာ တရုတ်နိုင်ငံ ရွှေလီမြို့သို့ ပို့ဆောင်ပြီး တရုတ်အမျိုးသားတွေနဲ့ပေါင်းသင်းခိုင်းခဲ့တယ်လို့သိရပါတယ်။
ဒါ့အပြင် အမျိုးသမီးတွေကို တရုတ်နိုင်ငံသို့ သွားရောက်ဖို့ နိုင်ငံကူးလက်မှတ်ပြုလုပ်ပေးခြင်း၊ကြိုတင်ငွေ ထုတ်ပေးခြင်းတွေ ပြုလုပ်ခဲ့ကြောင်း သိရပါတယ်။
အခုလို မြန်မာအမျိုးသမီးတွေကို ခေါ်ယူပေးခြင်းအတွက် ပြစ်မှုကျူးလွန်သူတွေဟာ တရုတ်အမျိုးသားများထံမှယွမ်ငွေ ၂၀,၀၀၀ မှ ၁၅၀,၀၀၀ အထိ ရယူခဲ့ကြောင်း စစ်ဆေးပေါ်ပေါက်ခဲ့တယ်လို့ သိရပါတယ်။
ထို့ကြောင့် အမှတ်၆ လူကုန်ကူးမှုတားဆီးနှိမ်နင်းရေးရဲတပ်ဖွဲစု(ရန်ကုန်)မှ တရားလိုပြုတိုင်တန်း အမှုဖွင့်တရားစွဲဆိုခဲ့ပြီးနောက် မေ ၁၉ ရက်တွင် ဒဂုံမြို့သစ်ခရိုင်တရားရုံးက မကရင်မ (ခ) မဝင်းဆန်းနှင့် မလုတောင်တို့အား လူကုန်ကူးမှုတားဆီးနှိမ်နင်းရေးဥပဒေအရ အလုပ်နှင့် ထောင်ဒဏ် ၁၅ နှစ်စီ ချမှတ်ခဲ့ကာထွက်ပြေးတိမ်းရှောင်နေတဲ့ တရားခံ မခင်သီတာ(ယခုတရုတ်နိုင်ငံတွင်နေထိုင်သူ)ကိုလည်း ရာဇဝတ်ကျင့်ထုံးဥပဒေပုဒ်မ ၈၇/၈၈အတည်ပြုထုတ်ဆင့်ခဲ့ကြောင်း သိရပါတယ်။
