ပြည်တွင်းမှ အဆိုတော် ရှင်မင်းမြတ်ကို ရှမ်းပြည်မြောက်ပိုင်း၊ မူဆယ်မြို့ရှိ မင်္ဂလာဆောင်မှာ ဖျော်ဖြေရန် အကြောင်းပြ၍ လိမ်လည် ခေါ်ယူကာ ကျားဖြန့် ဂိုဏ်းမှ ပြန်ပေးဆွဲ ရိုက်နှက် နှိပ်စက်ပြီး ကျပ်သိန်းထောင်ချီ တောင်းယူမှု ဖြစ်ပွားခဲ့တယ်လို့ အဆိုတော် ရှင်းမင်းမြတ်က ၎င်းရဲ့ လူမှုကွန်ယက်စာမျက်နှာမှာ အသိပေးဖော်ပြထားပါတယ်။
အဆိုတော်ရှင်းမင်းမြတ်ဟာ ၎င်းတို့ရဲ့ဖိတ်ကြားချက်အရ ဇန်နဝါရီ ၄ရက်မှာ ရန်ကုန်မှ မန္တလေးသို့ လေယာဉ်နဲ့သွားရောက်ခဲ့ပြီး ဟိုတယ်တစ်ခုမှာတည်းခိုခဲ့ကြောင်း ဇန်နဝါရီ ၅ရက် မနက်ပိုင်းမှာတော့ မန္တလေး မှ မူဆယ်သို့ သွားရန် ကားဖြင့် လာခေါ်တဲ့ အတွက် လိုက်ပါသွားတယ်လို့ ဆိုပါတယ်။
"မိတ်ဆွေ တစ်ဦးရဲ့ မိတ်ဆွေမှတစ်ဆင့် မိတ်ဆွေရဲ့ မိတ်ဆွေ ဆိုသူ တစ်ဦးက မင်္ဂလာဆောင်ကိစ္စ အတွက် ဖိတ်ကြားခဲ့ပါတယ်၊ထိုသူကို ယုံကြည်မှုနဲ့ လက်ခံခဲ့ပြီး ရန်ကုန်မှမန္တလေး လေယာဉ် လက်မှတ်ကို ကြိုတင်စီစဉ်ပေးခဲ့ပါတယ် ဇန်နဝါရီ၄ရက်မှာ ရန်ကုန်မှ မန္တလေး ကို ရောက်ခဲ့ပြီး ၅ရက်နေ့မနက်ပိုင်းမှာ မူဆယ်ကိုသွားဖို့ ဟိုတယ်မှ ကားဖြင့် လာရောက်ခေါ်ယူခဲ့ ကာ မူဆယ်ကို ရောက်ခဲ့တယ်"လို့ အဆိုတော်ရှင်မင်းမြတ်က ပြောကြားထားပါတယ်။
ညပိုင်း တွင် ပွဲကျင်းပမယ့်နေရာ သို့ သွားရောက် ကြည့်ရှုပြင်ဆင်လိုကြောင်း ပြောတဲ့အခါ ၎င်းတို့မှ လူ၄ဦးနဲ့ လာရောက် ခေါ်ယူပြီး ၎င်း တို့ ၄ဦးမှ လူမရှိတဲ့ နေရာကို (အပေါ့သွားရန်) ဆီးသွား ဖို့ ဆိုကာ အကြောင်းပြပြီး နောက်ကားကိုမောင်းနှင်လာပြီး ဆီးသွားမယ်ထင်ကာ ကားပေါ်ထိုင်စောင့်နေစဉ် အနက်ရောင် ခေါင်းစွပ် အိပ်နဲ့ မျက်လုံးကို ဖုံးအုပ်ပြီး လက်ထိပ်ခတ်ကာ ကျားဖြန့်လုပ်ငန်းခွင်တစ်ခုသို့ ကားဖြင့် ဖမ်းဆီးခေါ်ဆောင်သွားခံခဲ့ရကြောင်း ရှင်မင်းမြတ်က ဖော်ပြထားပါတယ်။
ယင်းနေရာတွင် ၎င်းတို့ကို လောက်ကိုင်အမှုဟောင်းတစ်ခုနှင့် အကြောင်းပြကာ ကျပ်သိန်း ၇၀၀၀ တောင်းခံ၍ ရိုက်နှက်နှိပ်စက်ခဲ့ပြီး၊ နောက်ပိုင်းတွင် သိန်း၆၀၀၀သို့လျော့ကာ ငွေအပြည့်စုစောင်းပေးဖို့ အတင်းကြပ်တောင်းဆို ပြီး ငွေမစုစောင်းနိုင်လို့ ရိုက်နှက် နှိပ်စက်မှုများ ပြုလုပ်ခဲ့တယ်လို့ ဆိုပါတယ်။
ထို့နောက် အဆိုတော် ရှင်မင်းမြတ်က ၎င်း၏မိသားစုနှင့်အခြားသော မိတ်ဆွေများရဲ့အကူညီနဲ့ ကျပ်ငွေ သိန်း ၃၀၀၀ ကျော် ပေးအပ်လိုက်တဲ့နောက်မှာ ပြန်ပေးဆွဲသူတွေက ငွေထပ်မံရနိုင်တော့မည်မဟုတ်ဟု ယူဆပြီး နောက် အဆိုတော်ရှင်မင်းမြတ်ကို လမ်းပေါ်တွင် ပစ်ချထားခဲ့ကာ မှတ်ပုံတင်နှင့် ငွေကျပ် ၁၀ သိန်းသာ ပြန်ပေးကြောင်း ပတ်စ်ပို့နှင့် အသုံးအဆောင်ပစ္စည်းများကို တော့ ပြန်ပေးသမားများက ယူဆောင်သွားခဲ့တယ်လို့ ရှင်မင်းမြတ်မှ ပြောကြားထားပါတယ်။
၎င်းကို မလွှတ်ပေးမီ က အဝတ်အစားများ ချွတ်ခိုင်းကာ ယခုပေးတဲ့ ငွေကျပ်သိန်း၃၀၀၀ဟာ ချေးယူထားတဲ့ပိုက်ဆံပြန်ပေးတာဖြစ်တယ်လို့ပြောဆိုခိုင်းပြီး ဗီဒီယိုရိုက်ကူးထားကြောင်း ယခုကိစ္စကို ရဲတိုင်ပါက လူမှုကွန်ရက်ပေါ်တွင် ဖြန့်ဝေမည်ဟုလည်း ခြိမ်းခြောက်ခဲ့တယ်လို့ သိရပါတယ်။
လက်တလောမှာတော့ အဆိုတော်ရှင်မင်းမြတ်ဟာ မန္တလေးမြို့ရှိ ပြည်သူ့ဆေးရုံကြီးမှာ ဆေးစစ်မှုပြုလုပ်ထားပြီး အမှုအခင်းကိစ္စ အတွက် တိုင်ချက်ဖွင့်ထားကာ တရားဥပဒေ အရ ထိရောက်စွာ အရေးယူပေးဖို့ လည်း လူမှုကွန်ယက်မှ တောင်းဆို အသိပေးဖေါ်ပြထားပါတယ်။
