ဟင်းသီးဟင်းရွက် ကုန်စိမ်း ဈေးကွက် မှာ ကုန်အဝင်နည်းပြီး ယခင်ထက် အဆ များစွာ ဈေးမြင့် တတ်လာတယ်လို့ သီရိမင်္ဂလာဈေးရှိ ကုန်စိမ်းပွဲရုံ တွေ ထံက သိရပါတယ်။အဲ့ဒီလို ဈေးနှုန်းတွေ အဆမတန်မြင့်တက်လာတာကြောင့် အခြေခံပြည်သူတွေအနေနဲ့ ယခင်က ပေါပေါသီသီ ဝယ်ယူရရှိတဲ့ ဟင်းသီးဟင်းရွက်တွေပါ ဝယ်ယူစားသုံးဖို့ ခက်ခဲလာတယ်လို့ သိရပါတယ်။
ပြီးခဲ့ တဲ့ ဆောင်းရာသီ ကာလ က ဈေးကွက် အတွင်း ရာသီ ပေါ် သီးနှံ တွေ ကုန်အဝင်များ ခဲ့ ပြီး ဝယ်လိုအား မရှိတဲ့ အတွက် ဈေးကျဆင်းခဲ့ကာ စိုက်ပျိုးတောင်သူတွေ အရှုံးပေါ်ခဲ့ရတဲ့ အနေထားရောက်ရှိခဲ့ပြီး နောက်ထပ်စိုက်ပျိုးရာသီ အတွက် စိုက်ပျိုးစရိတ်မရှိတာကြောင့် အချို့တောင်သူတွေ စိုက်ပျိုးမှုမရှိတဲ့ အတွက် ကုန်အဝင်နည်းတယ်လို့ ဆိုပါတယ်။
"ပြီးခဲ့တဲ့ ရာသီပေါ်ချိန် တုန်းက ခရမ်းချဉ်သီး ဆို တစ်ပိသာ ၃၀၀၊ ၄၀၀ ပဲရှိတယ်စိုက်ပျိုးတဲ့တောင်သူတွေဆီမှာ ဆိုရင် ခူးခ တောင် မရလို့ ခြံအလိုက် ဒီတိုင်း ထားပြီး ပျက်စီး ခဲ့ရတယ် ဂေါ်ဖီ ဆို ဝယ်မယ့်သူမရှိလို့ လွှင့်ရတာတွေ ရှိတော့ တစ်ချို့ ခြံသမားတွေ အရှုံးပေါ်ပြီး နောက်ရာသီ အတွက် မစိုက်ကျတော့ဘူး အဲ့တော့ အခုရာသီပေါ်ချိန် ရောက်တော့ ကုန်အဝင်က နည်းပြီး ဈေးက အရင်ထက်အဆမတန် မြင့်သွားတာ''လို့ သီရိမင်္ဂလာဈေးမှ ကုန်စိမ်းပွဲရုံ ပိုင်ရှင်တစ်ဦးကပြောပါတယ်။
အခုလို ဟင်းသီးဟင်းရွက် တွေ ဈေးမြင့်တဲ့ အတွက် အရောင်းအဝယ်လုပ်သူတွေ လည်း ဝယ်လိုအားမရှိတာကြောင့် အခက်အခဲ ဖြစ်သလို စားသုံးသူတွေ အနေနဲ့ လည်း ကုန်ဈေးနှုန်း ကြီးမြင့်မှုကြောင့် ဟင်းသီးဟင်းရွက် စားသုံးနိုင်မှုမှာပါ အခက်တွေ့နေကြရတယ်လို့ သိရပါတယ်။
ထို့အပြင် လမ်းပန်းဆက်သွယ်ရေး အခက်ခဲတွေ ကြောင့် စိုက်ပျိုးထွက်ရှိ တဲ့ဒေသ နဲ့ ရန်ကုန်ဈေးကွက်မှာ ဈေးထက်ဝက်ခန့် ပိုများတယ်လို့သိရပါတယ်။
"အောင်ပန်းမှာ ခရမ်းချဉ်သီးတစ်ပိသာ ကို ၃၂၀၀၊ ၃၇၀၀ကျပ်၊ ဂေါ်ဖီတစ်ပိသာထုပ် ဆို ၃၈၀၀ကျပ် ဝန်းကျင်ပဲရှိတယ်ဒါပေမယ့် လမ်းပန်းဆက်သွယ်ရေး က နယ်မြေမအေးချမ်းတာရယ် မိုးကာလ လမ်းပျက်စီးတာတွေရယ် စတာတွေကြောင့် အချိန်က ခန့်မှန်းလို့မရဘူး ကုန်စိမ်းဆိုတာမျိုးကလည်း ပျက်စီးလွယ်တဲ့ အရာ အဲ့တော့ ရောင်းသမားတွေက လည်း အခုလို ဈေးတင်ထားမှ လည်း သူတို့အတွက် အဆင်ပြေတာ ဆိုတော့ နောက်ဆုံးတော့ လဲ ဘာအကြောင်းပဲ ဖြစ် ဖြစ် စားသုံးသူက ခံရတာပေါ့ အဲ့တော့ ဈေးကြီးမြင့်တဲ့ဒဏ် ကို စားသုံးသူတွေ ခံနေရတာ"လို့ အောင်ပန်းရှိ ကုန်စိမ်းပွဲရုံ မှပိုင်ရှင် တစ်ဦးကပြောပါတယ်။
ပြည်တွင်းမှာ နိုင်ငံရေး မတည်ငြိမ်မှုနဲ့ စီးပွားရေးကျဆင်းမှု လမ်းပန်းဆက်သွယ်ရေး ထိခိုက်မှုနဲ့ ကုန်ဈေးနှုန်းကြီးမြင့်မှုတွေဖြစ်ပေါ်နေလို့ ပြည်သူတွေ စားဝတ်နေရေး အကျပ်အတည်းတွေဖြစ်ပေါ်နေပါတယ်။
