၂၀၂၄ ခုနှစ်ရဲ့ ဇန်နဝါရီလ ကနေ ပြီးခဲ့တဲ့ဇွန်လ အလယ် ၁၅ ရက်အထိ သွေးလွန်တုပ်ကွေးရောဂါကြောင့် သေဆုံးသွားရသူ ၃ ဦးရှိလာပြီး ရောဂါဖြစ်ပွားသူအရေအတွက်မှာလည်း ၁၃၀၉ ယောက်အထိရှိခဲ့ရာမြန်မာနိုင်ငံက ပြည်သူတွေအနေနဲ့လက်ရှိ မိုးတွင်းကာလ ရေကြီးနှစ်မြုပ်မှုတွေဖြစ်ပေါ်နေမှုအပြီး ဂရုပြုသင့်တဲ့ကူးစက်ရောဂါတွေထဲ သွေးလွန်တုပ်ကွေးရောဂါလည်း ပါဝင်နေတယ်လို့ ရောဂါကုသရေးလုပ်ဆောင်နေသူတွေထံကသိရပါတယ်။
မြန်မာနိုင်ငံအတွင်းလတ်တလောကာလမှာ မြစ်နဲ့ချောင်းရေများ ရေလျှံလာမှုတွေကြောင့် ဒေသအချို့တွင်ရေကြီးနှစ်မြုပ်ကာ ရေဘေးရှောင်ရှားရမှုတွေရှိနေတာကြောင့် ရေကြီးတာတွေအပြီးတွင် သွေးလွန်တုပ်ကွေးနဲ့ဝမ်းရောဂါများဖြစ်ပွားတတ်တာကြောင့်ယင်းကူးစက်ရောဂါများ ကိုဂရုပြုသင့်ကာ ကြိုတင်ကာကွယ်မှုတွေဆောင်ရွက်ထားသင့်တယ်လို့ဆိုပါတယ်။
"အခု၂၀၂၄ခုနှစ်မှာ သွေးလွန်တုပ်ကွေးဖြစ်ပွားမှုက ယခင်၂၀၂၃ခုနှစ်ကထက် ဖြစ်ပွားနှုန်း၅ဆလောက်လျော့ကျလာပါတယ်။ အများဆုံးဖြစ်ပွားတာက ကျေးလက်ထက် မြို့ပြမှာပိုဖြစ်တာဖြစ်ပြီး ရန်ကုန်တိုင်းမှာ ရောဂါဖြစ်ပွားနှုန်းအများဆုံးရှိနေတာပါ"လို့ ကျန်းမာရေးဌာနက တာဝန်ရှိသူကပြောပါတယ်။
သွေးလွန်တုပ်ကွေးရောဂါက အသက် ၅နှစ်ကနေ ၉နှစ်အရွယ်ကလေးတွေအများဆုံးဖြစ်ပွားလေ့ရှိပြီး အသက်ကြီးမှ ရောဂါဖြစ်သူတွေအနေနဲ့ရောဂါရဲ့ပြင်းထန်မှုဒဏ်ကို ပိုခံစားရလေ့ရှိကာ ယခုနှစ်ရဲ့ရောဂါဖြစ်နှုန်းမှာ ကျေးလက်ဒေသတွင်၄၇ရာခိုင်နှုန်းနဲ့ မြို့ပြဒေသမှာ၅၃ရာခိုင်နှုန်းဖြစ်ပွားတာကြောင့် ယခင်နှစ်နဲ့နှိုင်းယှဉ်ပါက သွေးလွန်တုပ်ကွေးရောဂါပြင်းထန်ဖြစ်ပွားနှုန်းက၁၀ပုံ ၁ပုံသာရှိတယ်လို့သိရပါတယ်။
မိုးတွင်းကာလ မိုးရွာသွန်းမှုပိုများလာတိုင်း ခြင်ပေါက်ပွားမှုပိုများကာ သွေးလွန်တုပ်ကွေးရောဂါဖြစ်နှုန်းမြင့်တက်လာမြဲဖြစ်ရာယခုနှစ်အတွင်းမှာပဲ ပြီးခဲ့တဲ့မေလအထိ ရောဂါဖြစ်ပွားသူအရေအတွက်၃၇၀ကျော်နဲ့သေဆုံးသူ၁ဦးနှုန်းသာရှိခဲ့ရာကနေ ယခု ဇွန်လအထိ ၁လကြာအတွင်းရောဂါဖြစ်သူအရေအတွက်၉၀၀ကျော်ထပ်မံတိုးလာပြီး နဂိုဖြစ်ပွားသူ၃၀၀ကျော်အရေအတွက်နဲ့ပေါင်းပါက ဖြစ်ပွားသူ ထောင်ချီရှိလာကာသေဆုံးသူ၃ဦးအထိရှိလာတဲ့အတွက် မပေါ့ဆထားသင့်ပဲဂရုပြုကာကွယ်သင့်တဲ့ရောဂါထဲ သွေးလွန်တုပ်ကွေးရောဂါလည်းပါဝင်နေကြောင်း ကျန်းမာရေးအသိုင်းအဝိုင်းကနေသိရှိရပါတယ်။
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
Twitter Link - https://twitter.com/mm_labournews
Gmail Link- myanmarlabournews@gmail.com
