ပြည်တွင်း လုပ်သား ၃၃၀၀ကျော် အတွက် အလုပ်အကိုင်အခွင့်အလမ်း ဖန်တီးပေးမယ့် ရင်းနှီးမြှုပ်နှံမှု လုပ်ငန်းသစ် ၂၀ ခု ကို စစ်ကော်မရှင် လက်အောက်ခံ မြန်မာနိုင်ငံရင်းနှီးမြှုပ်နှံမှုကော်မရှင် က ခွင့်ပြုလိုက်တယ်လို့ သိရပါတယ်။
မြန်မာနိုင်ငံရင်းနှီးမြှုပ်နှံမှုကော်မရှင် က ပြုလုပ်တဲ့ ( ၁/၂၀၂၆) ကြိမ်မြောက်အစည်းအဝေး မှာ ခွင့်ပြုပေးခဲ့ခြင်း ဖြစ်ကာ စက်မှုကဏ္ဍနဲ့ဝန်ဆောင်မှုကဏ္ဍ တွေက နိုင်ငံခြားရင်းနှီးမြှုပ်နှံမှုလုပ်ငန်းအသစ် လေးခု နဲ့ စက်မှု၊ ဟိုတယ်ခရီး၊ လျှပ်စစ်၊ အိမ်ရာအဆောက်အအုံ တည်ဆောက်ခြင်း၊ မွေးမြူရေးနှင့်ရေလုပ်ငန်း၊ ရေနံနှင့်သဘာဝဓာတ်ငွေ့ကဏ္ဍတွေက မြန်မာနိုင်ငံသား ရင်းနှီးမြှုပ်နှံမှုလုပ်ငန်းအသစ် ၁၆ ခုတို့ကိုခွင့်ပြုပေးခဲ့တယ်လို့သိရပါတယ်။
ခွင့်ပြု့ခဲ့တဲ့ လုပ်ငန်းတွေရဲ့ ရင်းနှီးမြှုပ်နှံမှု ပမာဏမှာ အမေရိကန်ဒေါ်လာ ၆၂ ဒသမ ၉၁၁ သန်းနဲ့ငွေကျပ် ၂၁၂၀၄၃၆ ဒသမ ၆၅၂ သန်းဖြစ်ပြီး အလုပ်အကိုင် အခွင့်အလမ်းပေါင်း ၃၃၈၂ ဦးကို ဖန်တီးပေးနိုင်မှာဖြစ်တယ်လို့သိရပါတယ်။
၎င်း လုပ်ငန်းတွေမှာ လျှပ်စစ်မော်တော်ယာဉ် တပ်ဆင်ထုတ်လုပ်ရောင်းချတဲ့လုပ်ငန်း တွေ ၊ ဟိုတယ်နှင့်ခရီးသွားလာရေးလုပ်ငန်း တွေ ၊ အိမ်ရာအဆောက်အအုံ ဆောက်လုပ်တဲ့ လုပ်ငန်း တွေ ၊ ရေနံနှင့်သဘာဝဓာတ်ငွေ့လုပ်ငန်း၊ စွမ်းအင်သုံးလျှပ်စစ်ဓာတ်အားထုတ်လုပ်တဲ့လုပ်ငန်း၊ မွေးမြူရေးလုပ်ငန်း တွေ ၊ ပညာရေးဝန်ဆောင်မှုလုပ်ငန်း တွေ အပြင် စားသောက်ကုန်ထုတ်လုပ်ငန်းတွေနဲ့ အလုပ်အကိုင်အခွင့်အလမ်းများစွာ ဖန်တီးပေးနိုင်မယ့်အထည်ချုပ်လုပ်ငန်း တွေ ပါဝင်တယ်လို့သိရပါတယ်။
မြန်မာနိုင်ငံရင်းနှီးမြှုပ်နှံမှုကော်မရှင်ရဲ့ စာရင်းများအရ ပြီးခဲ့တဲ့ ၂၀၂၅ ခုနှစ် အတွင်း ပြည်တွင်းမှာ နိုင်ငံခြားရင်းနှီးမြုပ်နှံမှု အများဆုံးပြုလုပ်ထားတဲ့ နိုင်ငံတွေ မှာ စင်ကာပူနိုင်ငံ၊ တရုတ်နိုင်ငံနဲ့ ထိုင်းနိုင်ငံ တို့ဖြစ်တယ်လို့ သိရပါတယ်။
