မြန်မာနိုင်ငံတော် ဗဟိုဘဏ်မှ ထုတ်ပေးထားတဲ့ တရားဝင်လိုင်စင်မရှိဘဲ နိုင်ငံခြား ငွေကြေးတွေကို ဝယ်ယူ ၊ရောင်းချ၊ လဲလှယ် တာတွေ လုပ်ဆောင်သူတွေကို အရေးယူဆောင်ရွက်မှု အရှိန်မြှင့် လုပ်ဆောင်မယ်လို့ မြန်မာနိုင်ငံတော် ဗဟိုဘဏ်က ဇွန်လ ၁၂ ရက်က ထုတ်ပြန်ထားပါတယ်။
နိုင်ငံခြားငွေလဲလှယ်နှုန်း တည်ငြိမ်စေရေးနဲ့ ဈေးကစားမှု မရှိစေရေးအတွက် သွင်းကုန်လုပ်ငန်းရှင်တွေ လိုအပ်တဲ့ နိုင်ငံခြားငွေတွေကို Online Trading Platform က တစ်ဆင့် ရောင်းချပေးတာ၊ နိုင်ငံခြားမှာ ဆေးကုသတာ၊ ပညာတော် သင်သွားတာ၊ ဘုရားဖူးသွားတာ၊ အလုပ်အကိုင်ကိစ္စရပ်တွေနဲ့ ထွက်ခွာသူတွေအတွက် အသေးသုံး နိုင်ငံခြားငွေတွေကို ပုဂ္ဂလိကဘဏ်တွေရဲ့ ငွေလွှကောင်တာတွေမှာ ရောင်းချတာကို ဆောင်ရွက် ပေးနေတယ်လို့ ထုတ်ပြန်ချက်မှာ ဖေါ်ပြထားပါတယ်။
အမေရိကန်ဒေါ်လာ အပါအဝင် နိုင်ငံခြားငွေ ကမောက်ကမ ဖြစ်ဖို့ရည်ရွယ်ပြီး အွန်လိုင်းပေါ်မှာ ဈေးကစားတာ၊ မမှန်သတင်း ဖြန့်ဝေတဲ့ လူပုဂ္ဂိုလ်တွေကို နိုင်ငံခြားသုံးငွေ စီမံခန့်ခွဲမှု ဥပဒေ၊ ငွေကြေးခဝါချမှု တိုက်ဖျက်ရေး ဥပဒေ၊ ငွေရေးကြေးရေး အဖွဲအစည်းများဥပဒေ၊ ဆက်သွယ်ရေးဥပဒေတွေနဲ့ တရားစွဲဆို ပြစ်ဒဏ် ချမှတ်တဲ့ ဖြစ်စဉ်တွေလည်း ရှိတယ်လို့ ထုတ်ပြန်ချက်မှာ ဖော်ပြထားပါတယ်။
" နိုင်ငံခြားငွေလဲလှယ်နူန်း ဈေး တည်ငြိမ် ဖိုဆိုပြီး ငွေ ဝယ်ရောင်းသမားတွေကို အဖမ်းဆီးတာပဲ လုပ်တာ၊ ပြည်ပထွက်ဖို့ ဒေါ်လာဝယ်မယ် ဆို အတော်လေး ခက်ခဲတယ်။ ဘဏ်တွေ မှာ ဝယ်လိုရတယ်လို့သာ ဆိုတာ တကယ်တမ်း သွားဝယ်ရင် အထောက်အထား မျိုးစုံတောင်းတွေနဲ့ မရတာ များတယ်"လို ကိုယ်တိုင်ကြုံတွေ့ရသူ တစ်ဦးက ပြောပါတယ်။
နိုင်ငံခြားငွေဈေးနှုန်းတွေ မတည်မငြိမ်ဖြစ်စေဖို့ လူမှုကွန်ရက်( Facebook Group ၊ Viber Group နှင့် Application (ဥပမာ၊ Myanmar Market Price) တွေကနေ ဆောင်ရွက်နေတာတွေကို မြန်မာနိုင်ငံတော် ဗဟိုဘဏ်က စောင့်ကြည့်နေပြီး ဆက်စပ်နေတဲ့ လူပုဂ္ဂိုလ် တွေရဲ့ Pay Account၊ Banking Account တွေ၊ SIM Card တွေကို ပိတ််သိမ်းတာ၊ တည်ဆဲဥပဒေတွေနဲ့ အညီ တရားစွဲဆိုအရေးယူတာတွေ ဆောင်ရွက်နေတယ်လို့ ဆိုပါတယ်။
ဒါ့အပြင် လိုင်စင်မရှိဘဲ နိုင်ငံခြားငွေကြေးတွေ ဝယ်ယူ၊ ရောင်းချ၊ လဲလှယ်တာတွေကို ရည်ရွယ်ချက်ရှိရှိ ဆောင်ရွက်နေတဲ့ လူပုဂ္ဂိုလ်၊ အဖွဲအစည်းတွေကို ထိထိရောက်ရောက် အရေးယူဆောင်ရွက်ဖို့ အရှိန်မြှင့် ဆောင်ရွက်သွားမယ်လို့ ကြေညာထားပါတယ်။
