မြန်မာနိုင်ငံ အတွင်း တရားမဝင် ဝင်ရောက်လာတဲ့ နိုင်ငံခြားသား ၉၀၀၀ ကျော်ကို ပြည်နှင်ဒဏ်ပေးကာ သက်ဆိုင်ရာ နိုင်ငံတွေအလိုက်လွှဲပြောင်းပေး ခဲ့တယ်လို့ စစ်ကော်မရှင်က ထုတ်ပြန်ထားပါတယ်။
၂၀၂၅ ခုနှစ် ဇန်နဝါရီ ၃၀ ရက်ကနေ အောက်တိုဘာလအထိ တရားမဝင် ဝင်ရောက်နေတဲ့ ပြည်ပနိုင်ငံသား ၉၄၃၉ ဦးကို စစ်ဆေးဖေါ်ထုတ်ခဲ့ပြီး အဲ့ဒီထဲက ၉၃၃၇ ဦးကို ထိုင်းနိုင်ငံ က တစ်ဆင့် သက်ဆိုင်ရာနိုင်ငံ တွေ ကို ဥပဒေလုပ်ထုံးလုပ်နည်း တွေ နဲ့ အညီ စနစ်တကျ ပြည်နှင်လွှဲပြောင်းပေးခဲ့တယ်လို့ဆိုပါတယ်။
၎င်းနိုင်ငံခြားသားတွေဟာ ထိုင်းနိုင်ငံအပါအဝင်အိမ်နီးချင်းနိုင်ငံတချို့ကိုတစ်ဆင့်ခံ ဖြတ်သန်းပြီး၊မြန်မာနိုင်ငံအတွင်း နယ်စပ်လမ်းကြောင်း တွေကတစ်ဆင့် တရားမဝင် ဝင်ရောက်ကာ ကရင်ပြည်နယ်၊ မြဝတီ-ရွှေကုက္ကို၊ မဲ့ထော်သလေး (KK Park) နဲ့ကျောက်ခတ်နယ်မြေတွေမှာ တရားမဝင် အွန်လိုင်းလောင်းကစားမှု တွေ၊ အွန်လိုင်းလိမ်လည်မှု တွေ၊ ဒုစရိုက်မှု တွေ ကျူးလွန်ခဲ့ကြသူတွေ ဖြစ်တယ်လို့ သိရပါတယ်။
ပြန်ပို့လိုက်တဲ့ နိုင်ငံခြားသား၉၀၀၀ ကျော်ထဲမှာ အိန္ဒိယ၊ တရုတ်၊ ဖိလစ်ပိုင်၊ နီပေါ၊ မလေးရှား၊ ရုရှား၊တောင်အာဖရိကနိုင်ငံ စတဲ့ နိုင်ငံတွေမှ နိုင်ငံသားတွေ ပါဝင်တယ်လို့သိရပါတယ်။
ကျန်ရှိတဲ့ ပြည်ပနိုင်ငံသား ၁၀၂ ဦးကို လည်း သက်ဆိုင်ရာ နိုင်ငံ တွေ ကို လွှဲပြောင်းပေးဖို့ အသင့်ဖြစ်နေပြီဖြစ်ပြီး ၊ ကောင်းမွန်စွာ ထိန်းသိမ်းစောင့်ရှောက်ထားတယ်လို့ သတင်းထုတ်ပြန်ချက်တွေအရသိရှိရပါတယ်။
