ကရင်ပြည်နယ် ဘားအံအကျဉ်းထောင်မှာ ထောင်အာဏာပိုင်တွေက နိုင်ငံရေးအကျဉ်းသား ၁၂ဦး ကို ရိုက်နှက်တိုက်ပိတ်တဲ့ အတွက် ၎င်းနိုင်ငံရေးအကျဉ်းသားတွေထဲက တစ်ဦးသေဆုံးသွား တယ်လို့ မြန်မာနိုင်ငံလုံးဆိုင်ရာ နိုင်ငံရေး အကျဉ်းသားများကွန်ရက် PPNM က စက်တင်ဘာ ၈ ရက်မှာ ထုတ်ပြန်လိုက်ပါတယ်။

 

၂၀၂၅ခုနှစ် ဇွန်လ ၁၄ ရက်နေ့မှာ ဘားအံအကျဉ်းထောင်ရှိ ကြိုးကြာဆောင်မှ နိုင်ငံရေးအကျဉ်းသား ၁၂ဦး ကို ထောင်အာဏာပိုင်တွေက အဓမ္မခေါ်ယူ ရိုက်နှက်ကာခြေကျင်းခတ်ပြီး ၃လ တိုက်ပိတ်ပြစ်ဒဏ်ချမှတ်ခဲ့တယ်လို့ သိရပါတယ်။

 

တိုက်ပိတ်ခံရတဲ့ နိုင်ငံရေးအကျဉ်းသား တွေက ထောင်ပိုင်မှ အကျဉ်းထောင်အတွင်း လာရောက်စစ်ဆေးချိန်တွင် အကျဉ်းထောင် အတွင်း အစားသောက်အဆင်မပြေမှုများ အာဟာရပြည့်၀အောင်မကျွေးခြင်းနဲ့ အလုပ်ခိုင်းစေခြင်းစတာ တွေ တင်ပြခဲ့တဲ့ အတွက် အခုလို နှိပ်စက်ညှင်းပန်းခံရတာဖြစ်တယ်လို့သိရပါတယ်။

 

၎င်းနိုင်ငံရေးအကျဉ်းသားတွေ ကို တိုက်ပိတ်တဲ့နေရာ ကို ခေါ်ဆောင်လာချိန်မှာရိုက်နှက်တဲ့ အပြင် တိုက်ပိတ်ခံရတဲ့ နေရာ အတွင်း သို့လည်းဝင်ရောက် ရိုက်နှက်တဲ့ အတွက် ဇူလိုင်လ ၁၃ ရက် နေ့မှာ နိုင်ငံရေးအကျဉ်းသား ကိုဉာဏ်မင်းထွန်း အသက်ဆုံးပါးသွားပြီး အခြားနိုင်ငံရေးအကျဉ်းသားတွေမှာလည်း ထိခိုက်ဒဏ်ရာများစွာရရှိ ထားတယ်လို့သိရပါတယ်။

 

လက်ရှိမှာ တိုက်ပိတ်ခံထားရတဲ့ နိုင်ငံရေးအကျဥ်းသားတွေဟာ ထောင်အာဏာပိုင်များရဲ့ ရိုက်နှက်မှုများကြောင့် စိတ်ပိုင်းဆိုင်ရာ ထိခိုက်မှုတွေနဲ့ ကြုံတွေ့နေရတဲ့အပြင် နိုင်ငံရေးအကျဉ်းသား ကိုဇော်ဝင်းအောင် (ခ) ကိုဂျက်အား တစ်လကျော်ကြာသည်အထိ နေ့စဉ် ခေါ်ယူရိုက်နှက်တာကြောင့် မိမိကိုယ်ကို သတ်သေလိုသည်အထိ စိတ်ပိုင်းဆိုင်ရာ ဆိုးရွားနေတယ်လို့ဆိုပါတယ်။

 

ဒါ့အပြင် ဘားအံထောင်မှ တစ်ပွင့် အရာရှိ အောင်ရဲနိုင် (ခ) ရခိုင်ဟာ ဘားအံထောင်အတွင်းမှ သတင်းများ ပြင်ပသို့ပေါက်ကြားပါက တိုက်ပိတ်ခံထားရတဲ့ နိုင်ငံရေးအကျဉ်းသား(၁၂) ဦး ကို သတ်ပစ်မည်ဟု ခြိမ်းခြောက်ထားကြောင်း PPNM က ထုတ်ပြန်ထားပါတယ်။

 

ဘားအံထောင်မှ နိုင်ငံရေးအကျဉ်းသားတွေကိုလည်း နေ့စဉ် မနက် ၉ နာရီမှ ၁၀ နာရီအထိ အိပ်ဆောင်နှင့် အုတ်ရိုးအကြား ရေညှိများတိုက်တဲ့ အလုပ်များ လုပ်နေကြရပြီး ထောင်ဝန်ထမ်းများအကြောင်း ပြောဆိုပါက ခြေကျင်းခတ်၊ တိုက်ပိတ်မည်ဟု ထောင်အာဏာပိုင်များက ခြိမ်းခြောက်ထားတယ်လို့ PPNM ထံမှသိရပါတယ်။