နိုင်ငံကူးလက်မှတ် ပြုလုပ်ဖို့ အတွက်  စက်တင်ဘာလ မတိုင်မီက Online Appointment  ယူထားသူတွေ အနေနဲ့   စာအုပ်ဖိုး နူန်းထားအသစ် ဖြစ်တဲ့  ကျပ် ၄၀၀၀၀ ပေးဆောင်ရမယ်လို့ မြန်မာနိုင်ငံ နိုင်ငံကူးလက်မှတ်ထုတ်ပေးရေးရုံးကကြေညာထားပါတယ်။

စက်တင်ဘာ၁ရက်က စပြီး နိုင်ငံကူးလက်မှတ် လျှောက်ထားဖို့ အတွက် အွန်လိုင်းကနေ ကြိုတင်ရက်ချိန်း ယူရာမှာ စာအုပ်ဖိုးငွေကို ယခင် ကျပ် ၃၅၀၀၀ မှ ကျပ် ၄၀၀၀၀ သို့ ပြောင်းလဲသတ်မှတ်ကာ အွန်လိုင်းကနေပေးဆောင်ရမယ်လို့ ကြေညာခဲ့ပါတယ်။

ဒါ့အပြင် စက်တင်ဘာ လ အရှေ့ပိုင်းက အွန်လိုင်းကနေ ရက်ချိန်းယူထားသူတွေလည်း ကျပ် ၄၀၀၀၀ ပေးဆောင်ရမှာ ဖြစ်ကာ ပေးဆောင်ရန် ကျန်တဲ့ စာအုပ်ဖိုး ၅၀၀၀ ကျပ်ကို နိုင်ငံကူးလက်မှတ်လာရောက် လုပ်မယ့်နေ့တွင်ပေးသွင်းရမယ်လို့ သိရပါတယ်။

""အရင်က အွန်လိုင်းရက်ချိန်းယူရင်စာအုပ်ဖိုး ၃၅၀၀၀ ကျပ် ဖြတ်တယ် အခု စက်တင်ဘာ၁ရက်က စပြီး အွန်လိုင်းကနေရက်ချိန်းယူတာနဲ့ ကျပ် ၄၀၀၀၀ တခါထဲ ပေးရတယ် အခု သူတို့ထပ်ထုတ်ပြန်တာက စက်တင်ဘာ၁ရက်အရှေ့ပိုင်း က အွန်လိုင်းရက်ချိန်းယူထားတဲ့ သူတွေလည်း ကျပ်လေးသောင်းနှုန်းပေးရမယ် အဲ့တော့ကျန်တဲ့ ၅၀၀၀ကျပ်ကိုစာအုပ် လာလုပ်တဲ့ နေ့ မှာ ထပ်ပေးရမယ် လို့ကြေညာထားတယ် တကယ်တမ်း ရုံးထဲမှာ ဝင်လုပ်ရင် အဲ့လေးသောင်းတင် ကုန်တာ မဟုတ်ဘူး ဓါတ်ပုံဖိုးတွေ ဖောင်ဖိုးတွေ ထပ်တောင်းသေးတာ သန်းခေါင်စာရင်းတို့ မှတ်ပုံတင် တို့ နည်းနည်း ဟောင်းနွမ်းနေရင်လည်း ရစ်တာပဲ ပြီးရင် ပိုက်ဆံတောင်းပြီ စာအုပ်လုပ်တဲ့သူကလည်း မရမှာစိုးရိမ်တော့ သူတို့တောင်းတာပေးရတာပေါ့""လို့မြန်မာနိုင်ငံ နိုင်ငံကူးလက်မှတ်ထုတ်ပေးရုံးနဲ့နီးစပ်သူတစ်ဦးကပြောပါတယ်။

အခုလို နိုင်ငံကူးလက်မှတ် စာအုပ်ဖိုး ငွေ တိုးကောက်တာမှာ ပြည်တွင်းသာမက မြန်မာသံရုံး ရှိရာ နိုင်ငံ များ တွင် လည်း ပြည်ပရောက်မြန်မာနိုင်ငံသားများ ကို နိုင်ငံကူးလက်မှတ်လျှောက်ထားရာမှာ စာအုပ်ဖိုးနှုန်း ထားကို သက်ဆိုင်ရာ နိုင်ငံအလိုက် ငွေကြေး များ ဖြင့်စက်တင်ဘာ ၁ ရက်ကစပြီး တိုးမြှင့် ကောက်ယူလာတာ တွေ့ရပါတယ်။