ပြည်တွင်းမှာ ဒေါ်လာအပါအဝင် နိုင်ငံခြားငွေ လဲလှယ်နှုန်း မြင့်တက်အောင် လုပ်ဆောင်တယ်လို့ဆိုပြီး နိုင်ငံခြားငွေ အရောင်းအဝယ်ပြုလုပ်သူများနှင့် ပွဲစားများအပါအဝင် ၁၄ ဦးကိုစစ်ကောင်စီ က ဖမ်းဆီးစစ်ဆေးနေပြီး နောက်ထပ် ၁၁ ဦးကို ဖမ်းဝရမ်းထုတ်ထားတယ်လို့ သိရပါတယ်။
ပြည်တွင်းငွေလဲလှယ်နှုန်း မတည်မငြိမ် ဖြစ်စေရန် လူမှုကွန်ယက် မီဒီယာများမှတဆင့် ဝါဒဖြန့်ဈေးကစားခြင်း ၊ နိုင်ငံခြားငွေဝယ်ယူရောင်းချခွင့်လိုင်စင်ရှိတဲ့ ငွေလဲကောင်တာတွေ တွေကလည်း ဗဟိုဘဏ် စည်းကမ်းအား ချိုးဖောက်ပြီး နိုင်ငံခြားငွေလဲနှုန်း မြင့်တက်အောင် ဈေးကစားကာ စီးပွားရေးမငြိမ်မသက်ဖြစ်အောင်လုပ်ဆောင်တယ်ဆိုပြီး ဖမ်းဆီးအရေးယူခဲ့တာလို့ စစ်ကောင်စီချုပ်ကိုင်ထားတဲ့ သတင်းစာတွေမှာဖော်ပြထားပါတယ်။
ပြီးခဲ့တဲ့ မေလ နောက်ဆုံးပတ်က နိုင်ငံခြားငွေလဲလှယ်နှုန်းမှာ အမေရိကန် တစ်ဒေါ်လာလျင် မြန်မာကျပ် ၄၅၀၀ ဝန်းကျင် ပေါက်ဈေးရှိခဲ့တာပါ။ ရွှေဈေးနှုန်းအနေနဲ့တော့ ၁၆ ပဲရည် အခေါက်ရွှေတစ်ကျပ်သားကို ပြင်ပပေါက်စျေး ကျပ် ၅၇ သိန်း ဝန်းကျင် အထိစျေးပေါက်ခဲ့ပြီး စံချိန်တင် ရွှေဈေးမြင့်တက်အောင် လုပ်ဆောင်တယ်လို့ဆိုကာ ရွှေ ဆိုင်ပိုင်ရှင်တွေ နဲ့ ကုန်သည် ၂၁ ဦးကိုဖမ်းဆီးခဲ့ပြီး နာမည်ကြီးရွှေဆိုင်ပိုင်ရှင်နဲ့ ကုန်သည်တွေအပါ ၁၀ ဦးကို စစ်ကောင်စီက ဖမ်းဝရမ်းထုတ်ခဲ့ပါတယ်။
လက်ရှိမှာတော့ ရွှေဆိုင်တွေအားလုံး မီးလင်းရွှေတကျပ်သားလျင် ကျပ် ၄၈ သိန်းကျော်ဖြင့်သာရောင်းချရန် ရန်ကုန်တိုင်းဒေသကြီးရွှေလုပ်ငန်းရှင်များအသင်းက သတ်မှတ်ထုတ်ပြန်ထားပါတယ်။ဒေါ်လာဈေးနှုန်းအနေနဲ့ကတော့ အမေရိကန်တစ်ဒေါ်လာလျင် မြန်မာကျပ်ငွေ ၄၁၃၀ ကနေ ၄၂၀၀ ဝန်းကျင်ပေါက်ဈေးရှိနေတယ်လို့ သိရပါတယ်။
