စားအုန်းဆီတစ်နိုင်တပိုင်ရောင်းချတဲ့ဆိုင်တွေမှာအရောင်းပိတ်ထားတာကြောင့်လက်လုပ်လက်စားပြည်သူတွေဆီဝယ်ယူနိုင်ဖို့အခက်တွေ့နေပါတယ်။
လက်ရှိမှာစားအုန်းဆီကိုခွဲတမ်းနဲ့ရောင်းချနေတာဖြစ်ပါတယ်။ရပ်ကွက်တွေမှာတော့အုပ်ချုပ်ရေးမှူးတွေကတစ်ဆင့်ဆီဝယ်ယူခွင့်ရတဲ့ကတ်တွေနဲ့အိမ်ထောင်တစ်စုကိုငါးဆယ်သားဝယ်ယူခွင့်ပေးတာဖြစ်ပါတယ်။
"ကျွန်မတို့ကဆီကတ်မရဘူးလေ။ဈေးထဲမှာတစ်ထောင်ဖိုးလောက်ပဲဝယ်သုံးရတာ။အခုဆီတွေမရောင်းဘူးဆိုတော့အခက်တွေ့တယ်"လို့ရွှေပြည်သာမြို့နယ်မှာနေထိုင်သူအိမ်ရှင်မတစ်ဦးကပြောပါတယ်။
ရပ်ကွက်အလိုက်ခွဲတမ်းနဲ့ပေးရာမှာလည်းရပ်ကွက်တစ်ချို့မှာသုံးရက်တစ်ခါဆီဝယ်ယူခွင့်ကတ်ရပေမဲ့ မရတော့တဲ့ရပ်ကွက်တွေလည်းရှိနေတယ်လို့သိရပါတယ်။
ဒါ့အပြင်ဆီထုတ်ယူဖို့လည်းလက်လုပ်လက်စားပြည်သူတွေမှာငွေကြေးနဲ့အချိန်အခက်အခဲရှိနေပါတယ်။
"ဆီကတ်ကလာပေးရင်ကိုးနာရီကျော်လေ။ကိုယ်တွေကစက်ရုံသွားပြီ။ပြန်လာတော့မိုးချုပ်တော့ဝယ်မရဘူး။အနားကလူသွားထုတ်ခိုင်းဖို့လည်းငါးရာတစ်ထောင်လောက်မပေးရင်မသွားချင်တော့ကတ်ရလည်းမထုတ်ဖြစ်ဘူး။ကိုယ့်ဘာသာအနားကတစ်ထောင်ဖိုးလောက်ပဲဝယ်လိုက်တယ်။ဆီကတ်ကလည်းမရသလောက်ပါပဲ"လို့စက်ရုံအလုပ်သမားတစ်ဦးကပြောပါတယ်။
လက်ရှိမှာစားအုန်းဆီရောင်းချတာနဲ့ပတ်သက်ပြီးအစိုးရကသတ်မှတ်ထက်ဈေးနှုန်းကိုသယ်ယူစရိတ်နဲ့အထွေထွေစရိတ်အနည်းငယ်သာပေါင်းထည့်ပြီးရောင်းချဖို့သတ်မှတ်ထားပါတယ်။လက်တွေ့မှာညွှန်ကြားချက်နဲ့အညီရောင်းချမှုရှိ၊မရှိကိုအရပ်ဝတ်တွေနဲ့ရှောင်တခင်စစ်ဆေးနေတယ်လို့ ဆိုပါတယ်။
"အရပ်ဝတ်နဲ့လာဝယ်တော့ရောင်းတာပေါ။အဲဒါမိသွားတော့တစ်ဈေးလုံးခံဝန်ထိုးရတယ်။ထပ်ရောင်းရင်ထောင်သုံးနှစ်နဲ့ဆိုင်ပိတ်မယ်ပြောသွားတယ်။အမတို့ ကတစ်ထောင်ဈေးရောင်းတယ်ဆိုတာဝယ်ရတာလည်းသူတို့သတ်မှတ်ထားတဲ့ဈေးမဟုတ်ဘူးလေ။အခုကျကိုယ်ကမရောင်းနိုင်တော့ကိုယ့်ဆီဝယ်နေကျသူတွေပဲသနားမိတယ်"လိုစည်ပင်ဈေးတွင်းဆိုင်ဖွင့်လှစ်ရောင်းချသူတစ်ဦးကပြောပါတယ်။
လက်ရှိမှာစားအုန်းဆီတစ်ပိသာပေါက်ဈေးကိုနေ့စဉ်ထုတ်ပြန်နေပြီးဈေးနှုန်းတည်ငြိမ်ဖို့လုပ်ဆောင်နေတယ်လို့စကစက သတင်းထုတ်ပြန်ထားပါတယ်။
