၂၀၂၄-၂၀၂၅ ပညာသင်နှစ် အတွက် တက္ကသိုလ် ဝင်တန်းစာမေးပွဲ အောင်စာရင်း ကို ဇူလိုင်၂၇ ရက်က ထုတ်ပြန်ရာမှာ တက္ကသိုလ်စာမေးပွဲအောင်မြင်သူတွေအနက် အကျဉ်းထောင်တွင်းမှ ဖြေဆိုအောင်မြင်သူ ၁၇ ဦး တွင် ၁၄ ဦးမှာဂုဏ်ထူးနဲ့အောင်မြင်တယ်လို့ သိရပါတယ်။
အကျဉ်းဦးစီးဌာနအောက်ရှိ အင်းစိန်အကျဉ်းထောင်မှ အကျဉ်းသား၁၀ဦးနဲ့ မန္တလေးဗဟိုအကျဉ်းထောင်မှ အကျဉ်းသား၇ဦးတို့ဖြေဆိုအောင်မြင်ခဲ့တယ်လို့ သိရပါတယ်။
အောင်မြင်သူတွေထဲမှ ၃ဘာသာဂုဏ်ထူးရှင် ၆ဦး၊၂ဘာသာဂုဏ်ထူးရှင်၄ဦး နဲ့ ၁ဘာသာဂုဏ်ထူးရှင် ၄ ဦးတို့ ပါဝင်တယ်လို့ ဆိုပါတယ်။
ဒါ့အပြင် လူမှုဝန်ထမ်းဦးစီးဌာနအောက်ရှိ ကြည့်မြင်တိုင်မျက်မမြင်ကျောင်းမှ ၁ဦး၊ ကျိုက်ဝိုင်းလူငယ်သင်တန်းကျောင်းမှ၁ဦး၊ အမျိုးသမီးကလေးများသင်တန်းကျောင်း(မန္တလေး)မှ၁ဦး၊ လားရှိုးလူငယ်သင်တန်းကျောင်းမှ ၁ဦး၊ လပွတ္တာလူငယ်အားမာန်သင်တန်းကျောင်းမှ၁ဦး စုစုပေါင်း ၅ဦး လည်း ဖြေဆိုအောင်မြင်ခဲ့တယ်လို့ သိရပါတယ်။
ယခုအကျဉ်းထောင်များနဲ့လူငယ်သင်တန်းကျောင်းများမှ တက္ကသိုလ်ဝင်တန်းအောင်မြင်သူတွေ ကို ဆက်လက်ပညာသင်ယူခွင့်ရရှိရေး ဆောင်ရွက်ပေးမယ်လို့ စစ်ကောင်စီရဲ့ မြန်မာနိုင်ငံအမျိုးသားလူ့အခွင့်ရေးကော်မရှင်က သတင်းထုတ်ပြန်ထားပါတယ်။
၂၀၂၄-၂၀၂၅ပညာသင်နှစ်ရဲ့ တက္ကသိုလ်ဝင်စာမေးပွဲ ကို ကျောင်းသား ကျောင်းသူပေါင်း ၂ သိန်းကျော် ဝင်ရောက်ဖြေဆိုပြီး ၉၉,၀၀၀ ကျော် အောင်မြင်ကာ တနိုင်ငံလုံး အတိုင်းအတာအနေနဲ့ စာမေးပွဲအောင်ချက်ရာခိုင်နှုန်းမှာ ၄၈ ဒသမ ၀၆ ရှိတယ်လို့ မြန်မာနိုင်ငံစာစစ်ဦးစီးဌာန မှ သိရပါတယ်။
