အမျိုးသမီးတွေ အသုံးပြုရတဲ့ ကိုယ်ဝန်တားဆေး တကတ်ကို ၄၅၀၀ ကျပ်နှုန်း၊ အမျိုးသမီးလစဥ်သုံး ပစ္စည်း တစ်ထုတ်လျင် ၁၈၀၀ ကျပ်မှ ၂၅၀၀ အထိရှိနေပါတယ်။
ဆေးကတ်တကတ်ချင်းစီအလိုက် ဈေးနှုန်းမြင့်တက်မှုကြောင့် Paracap - ၁၅၀၀(၁ကတ်) Biogesic - ၃၀၀၀(၁ကတ်) ရှိနေပြီး တလုံးချင်း၀ယ်ယူပါက Mixagrip - ၁လုံး ၄၀၀၊ Decoglen - ၁လုံး ၅၀၀ ၊ Air-x - ၁လုံး ၃၀၀၊ Solmux - ၁လုံး ၅၀၀ အထိဖြစ်နေပါတယ်။
ဒါ့အပြင် ဆေးကုမ္ပဏီတွေက ဆေးပစ္စည်းတွေရောင်းချရမှာ ဝယ်လိုအားနည်းတဲ့အမယ်တွေကိုပါပူးတွဲရောင်းချနေတာကြောင့် ဆေးအရောင်းဆိုင်တွေအခက်အခဲတွေရှိတယ်လို့ ရန်ကုန်မြို့ရှိ ဆေးဆိုင် ဖွင့်ထားသူတွေကပြောပါတယ်။
ဈေးကွက်တွင်း ဆေးဝါးပြတ်လပ်မှုတွေကြောင့်လူသုံးများတဲ့ဆေးဝါးတွေဝယ်ယူလိုပါကဝယ်လိုအားနည်းတဲ့ဆေးတွေ၊ သာမိုမီတာအစရှိတာတွေအပြင်ကုမ္ပဏီဘက်ကသတ်မှတ်ထားတဲ့ပမာဏပြည့်မီအောင်ဝယ်ယူမှသာရောင်းချတာတွေရှိနေတာပဲဖြစ်ပါတယ်။
"ဈေးတွေလည်းတက်ပါတယ်။အသုံးများတဲ့ပစ္စည်းငါးဗူးလိုချင်ရင်တစ်ခြားဆေးပေါ့နော်လိုတာထက်ပိုဝယ်မှရောင်းပေးတယ်။ဒါတောင်နောက်တစ်ခါထပ်ဝယ်လို့မရဘူး။ပြောမယ်ဆိုအဆင်မပြေဘူးပေါ့။ဈေးတွေလည်းမတန်တဆလေ။အရောင်းအဝယ်မဖြစ်ရင်အလကားဖြစ်ကုန်တယ်။အခုကဝယ်လိုအားကအရင်လောက်မရှိဘူး။ကျွန်မတို့ဆိုင်ဆို ဆေးကသက်တမ်းကုန်ဖို့နှစ်လ၊သုံးလလောက်ပဲကျန်တော့တယ်ဆိုတစ်ဝက်ဈေးလောက်နဲ့ရောင်းလိုက်တယ်။ဈေးဝယ်ကိုတော့ေသချာပြောပြတယ်။သူတို့ကအဆင်ပြေတယ်ဆိုရောင်းပေးတယ်"လို့ဆေးဆိုင်ဖွင့်လှစ်ထားသူတစ်ဦးကပြောပါတယ်။
လက်ရှိမှာ အင်္ဂလိပ်ဆေးတွေတင်မကဘဲ တိုင်းရင်းဆေးတွေပါဈေးတက်လာတာဖြစ်ပြီးဆေးတစ်မျိုးကိုကျပ်နှစ်ရာခန့်မြင့်တက်တယ်လို့သိရပါတယ်။
"ဆေးပူတွေလည်းတက်တယ် အမယ်တစ်မျိုးကိုနှစ်ရာလောက်အရင်းတက်ပါတယ်။အစာကြေဆေးလေးတွေအရင်က(၈၀၀)၊ အခု(၁၀၀၀) ရောင်းနေတယ်။နောက်ရက်ဆို(၁၂၀၀)ရောင်းရတော့မယ်။ကျွန်မတို့လည်းရောင်းရတာစိတ်မချမ်းသာဘူး။တစ်ချို့ကဈေးမမေးဘူး။နောက်ငွေပေးမှဈေးတွေကွာတော့ပိုက်ဆံမလောက်လို့ပြန်လျော့တွေဖြစ်ကုန်တယ်။ဈေးအရင်ပြောပြတော့လည်းများတယ်ဆိုမဝယ်တော့ဘူး"လို့ဆေးပစ္စည်းရောင်းချသူတစ်ဦးကပြောပါတယ်။
ဆေးဝါးတွေပြတ်လပ်တာဟာတစ်နိုင်တစ်ပိုင်အရောင်းဆိုင်တွေတင်မကဘဲဈေးဝယ်စင်တာတွေ၊ဆေးဆိုင်ကြီးတွေမှာပါရှိနေတာပဲဖြစ်ပါတယ်။
"City mark မယ်တစ်ခါတလေဆို ဒီကိုဂျင်အတောင့်ကို(၄၀၀၀)နဲ့ရတယ်။ တကတ်ပဲ ရောင်းပေးတာပါ၊ မရတာကများပါတယ်။အပြင်မှာ(၆၀၀၀)ဝယ်ရတဲ့အချိန်မှာသူကသက်သာတယ်။ဒါပေမယ့်အမြဲလိုလိုမရတာချည်းပါပဲ။အခုကတော့ဈေးထက်ရရင်ဝယ်ထားရမလိုဖြစ်နေတယ်။ဈေးသက်သာတာလေးတွေတော့လိုက်ရှာရတာပေါ့"လို့ပြည်သူတစ်ဦးကပြောပါတယ်။
ပြည်တွင်းမှာဆေးဝါးတွေဈေးနှုန်းမြင့်တက်လာတာနဲ့ပစ္စည်းပြတ်လပ်လာတာကြောင့်အမှတ်တံဆိပ်ထက်အာနိသင်တူဆေးဝါးတွေ၊ အစားထိုးဆေးဝါးတွေကိုပိုမိုအသုံးပြုသူများလာပါတယ်။
