၂၀၂၅ ခုနှစ် တက္ကသိုလ်ဝင်စာမေးပွဲ အမှတ်စာရင်း ထုတ်ပေးမှု ကို ဆာဗာချိုယွင်းမှု ဖြစ်ပေါ်နေတဲ့ အတွက် ယာယီရပ်ဆိုင်းလိုက်ကြောင်း စစ်ကောင်စီရဲ့ ပညာရေးဝန်ကြီးဌာနက ဇူလိုင် ၄ ရက်က ထုတ်ပြန်လိုက်ပါတယ်။
တက္ကသိုလ်ဝင်စာမေးပွဲ အမှတ်စာရင်းကို ဇူလိုင် ၃၀ ရက် နံနက် ၈ နာရီ က စပြီး ထုတ်ပေးခဲ့တာ မှာ အချို့ကျောင်းသား တွေ အောင်စာရင်းမှာ နာမည်ပါရှိပေမယ့် အမှတ်စာရင်း မှာ ကျရှုံးတာတွေ ဖြစ်ပေါ် ခဲ့တဲ့ အတွက် ကျောင်းသား ကျောင်းသူတွေ နဲ့ ကျောင်းသား မိဘ တွေကြား ဝေဖန်မှု တွေ မြင့်တက်ခဲ့ပါတယ်။
အခုလို ဖြစ်ပေါ်ခဲ့ ပြီးနောက် ဩဂုတ်လ ၄ ရက်မှာတော့ အမှတ်စာရင်း ထုတ်ပေးမှု ကို ယာယီရပ်ဆိုင်းကြောင်း ပညာရေးဝန်ကြီးဌာနက ထုတ်ပြန်လာတာဖြစ်ပါတယ်။
ပညာရေးဝန်ကြီးဌာန ထုတ်ပြန်ချက်မှာတော့ တက္ကသိုလ်ဝင်စာမေးပွဲ အမှတ်စာရင်းကို ဇူလိုင် ၃၀ ရက် နံနက် ၈ နာရီမှာ စတင်ထုတ်ပေးခဲ့တာ မှာ နံနက် ၈ နာရီ ၄၅ မိနစ်ခန့်မှာ အမှတ်စာရင်း ထုတ်ပေးမှုစနစ် ဆာဗာချိုယွင်းမှုကြောင့် နေပြည်တော်စာစစ်ဌာနများအတွင်း အမှတ်စာရင်းမှားယွင်းမှုအနည်းငယ် ဖြစ်ပေါ်ခဲ့တယ်လို့ဆိုပါတယ်။
၎င်းဖြစ်စဉ်ကြောင့် အမှတ်စာရင်း ထုတ်ပေးမှု လုပ်ငန်း များ ကို ခေတ္တရပ်ဆိုင်း ပြီး လိုအပ်တဲ့ စစ်ဆေးပြင်ဆင် မှု တွေ ဆောင်ရွက်နေတယ်လို့ အသိပေးထားပါတယ်။
ဒါ့အပြင် ဇူလိုင် ၃၀ရက် မွန်းလွဲ ၂နာရီ မတိုင်မီက ထုတ်ယူခဲ့တဲ့ အမှတ်စာရင်း စာရွက်တွေကို ယူဆောင်လာပြီး အမှတ်စာရင်း အမှန် ပြန်လည် ထုတ်ယူဖို့ မြန်မာနိုင်ငံစာစစ်ဦးစီးဌာနကလည်း ကြေညာထားပါတယ်။
""အမှတ်စာရင်း က ထုတ်ပြီးသားတွေ လည်း ပြန်ထုတ်ကမှာဆိုတော့ အောင်စာရင်းမှာ နာမည်ပါ လည်း စိတ်မချရသေး
တဲ့ အခြေနေ ဖြစ်နေတယ်၊ အခုလို အမှားမျိုး က လုံး၀မဖြစ်သင့်တဲ့ကိစ္စ အရမ်းပေါ့လျော့လွန်းအားကြီးတယ် ကလေးတွေမှာ ငလျင်ကြောင့်လဲ စာမေးပွဲ နှစ်ခါ ဖြေခဲ့ရတယ် အခု အမှား ထပ်ဖြစ်တယ်ဆိုတော့ အမှတ်စာရင်းပြန်ထွက် လာမှဘဲ စိတ်အေးရတော့မယ်""လို့ကျောင်းသားမိဘတစ်ဦးကပြောပါတယ်။
လက်ရှိမှာ ဆာဗာတွင်ထည့်သွင်းထားတဲ့ အချက်အလက် တွေကို စစ်ဆေးနေကာ ပြီးဆုံးပါက အမှတ်စာရင်းများကို တိကျမှန်ကန်စွာပြန်လည် ထုတ်ပေးသွားမယ်လို့ ပညာရေးဝန်ကြီးဌာနက ထုတ်ပြန်ကြေညာထားပါတယ်။
၂၀၂၅ ခုနှစ် တက္ကသိုလ်စာမေးပွဲ ကို တနိုင်ငံ လုံး အတိုင်းအတာ အနေနဲ့ ၄၈ ဒသမ ၀၆ရာခိုင်နှုန်း အောင်မြင်ခဲ့တယ်လို့ သိရပါတယ်။
