စစ်ကောင်စီလက်အောက်ခံ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေနဲ့ အခြေခံလက်ကားရည်ညွှန်းဈေးနှုန်းတစ်ပိဿာ ငွေကျပ် ၆၄၉၀ အဖြစ်သတ်မှတ်လိုက်ရာ ပြပပေါက်စျေးလည်းပြန်လည်မြင့်တက်လာတယ်လို့သိရပါတယ်။
"စားဆီကသူတို့သတ်မှတ်တဲ့ဟာက ပြီးတဲ့တစ်ပတ်က ၆၃၇၅ ခုတစ်ပတ်က ၆၄၉၀ ဆိုတော့ ၈၅
ကျပ် သူတို့ရဲ့လက်ကားရည်ညွှန်းစျေး ၅၀ လောက် တစ်ရာလောက်တက်လာရင်ပြင်ပပေါက်စျေးမှာက ၁၀၀၀ ၊ ၂၀၀၀ လောက်တက်လာတယ်။ ခုလည်းအပြင်စျေးပါတက်လာတယ်။ ပိုဆိုးတာက ဝယ်ရတာပါခက်တယ်"လို့ အကြော်ရောင်းချသူတစ်ဦးကဆိုပါတယ်။
စစ်ကောင်စီရဲ့စီးပွားရေးနဲ့ကူးသန်းရောင်းဝယ်ရေးဝန်ကြီးဌာနက ပြီးခဲ့တဲ့တစ်ပတ်ဩဂုတ် ၂၆ရက်ကနေ စက်တင်ဘာ ၁ ရက်အထိ စားအုန်းဆီလက်ကားရည်ညွှန်းစျေး တစ်ပိဿာလျှင် ကျပ် ၆၃၇၅ ဖြစ်တယ်လို့ သတ်မှတ်ထားပြီးယခုတစ်ပတ် စက်တင်ဘာ ၂ ရက်မှ စက်တင်ဘာ ၈ ရက်အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၆၄၉၀ ဖြစ်တယ်လို့ ထုတ်ပြန်ကြေညာထားတာကြောင့် ယခင်ကထက် ၈၅ ကျပ်တက်လာတာတွေ့ရပါတယ်။
ဒါ့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းအပါအဝင်မသမာတဲ့ လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမယ်လို့လည်း ဆိုထားပါတယ်။
အဲ့ဒီလိုစျေးမြင့်တက်သတ်မှတ်လာရာက စားဆီပြင်ပစျေးကွက်မှာလည်း ယမန်နေ့ပေါက်စျေးအရ တစ်ပိဿာကိုကျပ် ၁၄၀၀၀ အနိမ့်ဆုံးဖြစ်ရာက ယနေ့မွန်းလွဲပိုင်းမှာတော့ ပြင်ပပေါက်စျေး ၁၆၀၀၀ အထိပြန်လည်မြင့်တက်ခဲ့ပြီး ဝယ်ယူရခက်ခဲတာပါဖြစ်လာတယ်လို့သိရပါတယ်။
ဒါ့အပြင် ရန်ကုန်ပြင်ပအခြားသောနယ်မြို့တွေမှာဆိုရင်တော့ တစ်ပိဿာကို ၁၇၀၀၀ ကနေ ၁၈၀၀၀ ဖြစ်လာတယ်လို့လည်း သိရပါတယ်။
