၂၀၂၆ခုနှစ် ဖေဖေါ်၀ါရီ ၁ရက် စစ်တပ်အာဏာသိမ်း(၅)နှစ်ပြည့်တဲ့ နေ့မှာ ကလေးမြို့ မော်လိုက်အကျဉ်းထောင် အတွင်း ငြိမ်းချမ်းစွာဆန္ဒပြတဲ့ အကျဉ်းသူတွေ တိုက်ပိတ် ပြစ်ဒဏ်ပေးခံရတယ်လို့မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)ရဲ့ သတင်းထုတ်ပြန်မှုအရ သိရပါတယ်။
စစ်တပ်အာဏာသိမ်း(၅)နှစ်ပြည့်တဲ့ နေ့မှာ ကလေးမြို့ မော်လိုက်အကျဥ်းထောင် က နိုင်ငံရေးအကျဉ်းသူတွေ အပါအဝင် အကျဥ်းသူ ၁၀၀ကျော်ဟာ သွေးသစ္စာ သီချင်းကို သံပြိုင်သီဆို ဆန္ဒပြခဲ့တယ်လို့ သိရပါတယ်။
အကျဉ်းသူတွေဟာ သွေးသစ္စာ သီချင်း သီဆိုပြီး နောက် အမူကြီးကိုးမှုအပေါ် ပြစ်ဒဏ်လျော့ပေါ့မှုပေးရန်၊အကျဉ်းထောင် အတွင်း အရေးပါတဲ့ တန်းစီးကဲ့သို့ လုပ်ပိုင်ခွင့်ရှိတဲ့ နေရာ တွင် အကျဉ်းသား၊အကျဉ်းသူ တွေကို တန်းတူအချိုးကျပေးရန် တို့ကိုပါ တောင်းဆိုခဲ့တယ်လို့ သိရပါတယ်။
၎င်း သွေးသစ္စာသီချင်း သီဆိုခဲ့ကြတဲ့ နိုင်ငံရေးအကျဥ်းသူတွေ အပါအဝင်အကျဉ်းသူ တွေ ထဲမှ အနည်းဆုံး (၁၅)ဦး တိုက်ပိတ်ခံထားရတယ်လို့ PPNM မှကနဦးအရေးပေါ် အသိပေးထုတ်ပြန် ထားပါတယ်။
ယခု ဖြစ်ပွားလျက်ရှိတဲ့ မော်လိုက်အကျဥ်းထောင်ရှိ တိုက်ပိတ်ခံထားရ တဲ့ နိုင်ငံရေးအကျဉ်းသူတွေနဲ့ အခြားအကျဉ်းသူတွေရဲ့ လုံခြုံရေးအခြေအနေ စိုးရိမ်နေရမှုအပေါ်ပြည်သူများ၊ လူအခွင့်အရေးဆိုင်ရာ အဖွဲ့အစည်းတွေအနေဖြင့် အလေးထား၍ စောင့်ကြည့်ခြင်းများ ပြုလုပ်ပေးကြပါဖို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)က အသိပေးထားပါတယ်။
