ပြည်တွင်းစားဆီ ဈေးနှုန်းမြင့်တက်လာနေချိန် အခြေခံလူတန်းစားများအဆင်ပြေနိုင်ရန်ဟုဆိုကာ ပြည်ထောင်စုမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ၊ မြန်မာနိုင်ငံ ဆီကုန်သည်နှင့်ဆီလုပ်ငန်းရှင်များအသင်းက စားဆီတစ် ပိဿာလျှင် ၃၇၀၀ ကျပ် ဖြင့်ရောင်းချပေးနေတယ်လို့သိရပါတယ်။

''စားဆီတစ်ပိသာကို၃၇၀၀ နဲ့ရောင်းပေးနေတာ။ ကျွန်မတို့မှာဝမ်းသာနေတာပဲ။ စျေးမှာတစ်ပိဿာ တစ်သောင်းကျော်ပေးရတယ်။ ငါးဆယ်သားဝယ်တိုင်း ငါးထောင်ကျော်ခြောက်ထောင်ရှိတယ်။ အများကြီးသက်သာတယ်။တစ်ပတ်တစ်ကြိမ်လောက်ဆိုပိုကောင်းတယ်။ တကယ့်အောက်ခြေအထိ ရပ်ကွက်တွေထဲလိုက်ရောင်းပေးနိုင်ရင်ပိုကောင်းတယ်''လို့ ဒဂုံမြို့သစ်တောင်ပိုင်းက  ဆီတန်းစီဝယ်ယူခဲ့သူတစ်ဦးက ပြောပါတယ်။

ပေါ်ဆန်း ဆန်တစ်အိတ် တစ်သိန်းနားကပ်လာပြီး  စားသုံးဆီတစ် ပိဿာလျှင် တစ်သောင်းကျော်ဝန်းကျင်ရှိနေချိန် အထွေထွေကုန်စျေးနှုန်းအကျပ်အတည်းကလည်း နေ့စဥ် ၀န်ထုပ်၀န်ပိုးဖြစ်လာနေတယ်လို့ လူထုကြားငြီးတွားပြောဆိုမှုတွေရှိနေပါတယ်။​

ကုန်စျေးနှုန်းမြင့်တက်လာမှုများကြောင့် ဆန်နှင့်ဆီကို သက်သာသောနှုန်းထားနဲ့ လက်လီးစျေးရောင်းချပေးခြင်းကို UMFCCI  မြန်မာနိုင်ငံ ဆီကုန်သည်နှင့်ဆီလုပ်ငန်းရှင်များအသင်း ၊ မြန်မာနိုင်ငံဆန်စပါးအသင်းတို့ ပူးပေါင်းစီစဥ်မှုဖြင့်ရန်ကုန်မြို့ရှိ မြို့ယ်နယ်အနှံ့အပြား၌  စားသုံးသူပြည်သူများအား စားဆီ၁ ပိဿာ ၃၇၀၀ကျပ် ဆန်တစ်ပြည်် ၁၁၀၀ ကျပ်ဖြင့် ဈေးနှုန်းသက်သာစွာ ရောင်းချပေးနေတယ်လို့ သိရပါတယ်။

အခုလိုရောင်းချပေးနေပေမဲ့ တန်းစီသူအချို့မှာ ရောင်းချပေးတဲ့ဆီမလုံလောက်တာကြောင့် လှည့်ပြန်ရသူအများအပြားရှိတာကြောင့် အဆိုပါရောင်းချမှုကို အရှိန်မြင့်ရောင်းချပေးရန်နဲ့ အလုံအလောက်ရောင်းချပေးနိုငိပါက လက်ရှိမြင့်တက်နေတဲ့ဆီစျေးနှုန်းကျဆင်းလာနိုင်မယ်လို့ရပ်ကွက်နေပြည်သူများက ဆိုပါတယ်။

မြန်မာနိုင်ငံမှာ ကုန်စျေးနှုန်းမြင့်တက်လာမှုတွေကြောင့် စီးပွားရေးကျဆင်းမှုများ အလုပ်အကိုင်ရှားပါးလာခြင်းတို့နဲ့အတူအခြေခံလူတန်းစားများ၏ မီးဖိုချောင်အသုံးစရိတ်ကို ချွေတာသုံးစွဲရပြီး စားဝတ်နေရေးအခက်ခဲများပင် ရင်ဆိုင်လာရတယ်လို့ ပြည်သူအများကဆိုပါတယ်။

MyanmarLabourNews