ပြည်တွင်းမှာစားသောက်ကုန်ကစပြီးလူသုံးကုန်ပစ္စည်းတွေအထိကုန်ဈေးနှုန်းဟာနေ့စဉ်မြင့်တက်နေတာကြောင့်လက်လီအရောင်းဆိုင်တွေဆက်လက်ရပ်တည်ဖို့ခက်ခဲလာတယ်လို့ အရောင်းဆိုင်တွေထံက သိရပါတယ်။
လက်ရှိမှာကုန်ဈေးနှုန်းဟာနေ့စဉ်ဆိုသလိုအပြောင်းအလဲရှိနေပါတယ်။ဒီအခြေအနေကြောင့်လည်းလက်လီအရောင်းဆိုင်တွေဟာငွေအရင်းအနှီးကြီးလာတာနဲ့အရောင်းအဝယ်ကျဆင်းလာတဲ့ပြဿနာကိုရင်ဆိုင်နေရပါတယ်။
"ကိုယ်က၅၅၀နဲ့ ရောင်းလိုက်တယ်။ ပြန်သွားဝယ်တော့ ၆၀၀ ကျော်ပေးရတယ်။ အာ့လိုဖြစ်နေတာက ခဏခဏပဲ။ အခုလေ ဈေးရောင်းရတာကို သောကတွေပွားနေရတယ်။ ရောင်းသာရောင်းလိုက်ရတယ်။ ငါပြန်ဝယ်ရင် ဒီဈေးရပါ့မလား။ ပစ္စည်းရှိပါ့မလားလည်း ပူရတယ်။ ကိုယ်ကအိမ်ဆိုင်လေးဆိုတော့ အများကြီးလည်း ဝယ်မရင်းထားနိုင်ဘူး။ အဲဒီတော့ တက်ရင်တက်ဈေးနဲ့ ထပ်ဝယ်။ ရောင်းဈေးကတက်ဖြစ်ကုန်ကော။ ဒီထက်ဆိုးလာရင်တော့ ဆိုင်ပိတ်တော့မယ်။ အခုကဈေးသာရောင်းနေတာအမြတ်မှမရှိတာ။တစ်ချို့လည်းပိတ်ကုန်ပြီ"လို့အိမ်ဆိုင်ဖွင့်လှစ်ရောင်းချသူတစ်ဦးကပြောပါတယ်။
စစ်အာဏာသိမ်းပြီးနောက်ပိုင်းမှာကုန်ဈေးနှုန်းမြင့်တက်တာဟာပိုမိုမြန်ဆန်လာတာဖြစ်ပါတယ်။ပြီးခဲ့တဲ့သက်ြန်ကာလမှာတော့စံချိန်တင်မြင့်တက်ခဲ့ပြီးလက်ရှိမှာတော့ပစ္စည်းပြတ်တောက်တာတွေပါရှိနေပါတယ်။
"ကော်ဖီဆိုတစ်ထုပ်ချင်း ၃၅၀ ရောင်းရတယ်။ ကလေးတွေစားတဲ့မုန့်လေးတွေဆို အရင်က ၅၀လောက်ရောင်းတဲ့ဟာက တစ်ရာလောက် ရောင်းရတယ်။ တစ်ချို့ပစ္စည်းတွေကျ ဈေးမတက်ပေမယ့် တကိုက်စာတောင်မပါတော့ဘူး။ အရင်ကတစ်ခုနဲ့ဝတဲ့မုန့်က နှစ်ခုလောက် ဝယ်ရတယ်။ နောက်ပြဿနာတစ်ခုက အိမ်ဆိုင်တွေအရမ်းများလာတယ်။ လူတိုင်းက အပိုငွေလေးများထွက်မလားဆိုပြီး အိမ်ဆိုင်လေးတွေ ဖွင့်ကြတယ်။ ခက်တာက ကုန်ဈေးနှုန်းကတက်လာလို့အရောင်းကျတာနဲ့ အရင်ကတစ်လမ်းလုံးမှာ တစ်ဆိုင်တည်းဆို ရောင်းအားကောင်းပေမယ့် အခုသုံးလေးဆိုင်ဖြစ်လာတော့ အရင်လိုရောင်းအားတွေလည်းမရှိတော့ဘူးဖြစ်လာတာ"လို့ကုန်စုံဆိုင်ဖွင့်လှစ်ရောင်းချသူတစ်ဦးကပြောပါတယ်။
ကျပ်ငွေတန်ဖိုးကျဆင်းလာတာ၊လမ်းပန်းဆက်သွယ်ရေးအခက်အခဲရှိတာတွေကြောင့်ကုန်ဈေးနှုန်းဟာဆက်တိုက်ဆိုသလိုမြင့်တက်နေပါတယ်။
အခြေခံပြည်သုအများစု နေ့စဉ်ဝယ်ယူနေရတဲ့ ဆန်ကြမ်းဈေးဟာလည်း ကျပ်(၅၀၀၀)ဝန်းကျင်ထိ ရောက်လာသလို စားအုန်းဆီဈေးကလည်း တစ်နိုင်တစ်ပိုင်ဝယ်ယူမယ်ဆိုရင် (၉၀၀)ကျပ်ထိ ပေးရပါတယ်။ ကန်စွန်းရွက်တစ်စည်းကလည်း ကျပ်(၇၀၀)၊ ခရမ်းချဉ်သီး တစ်ဆယ်သား (၄၀၀)၊ ကြက်သွန်နီ တစ်ပိသာကို အနည်းဆုံး ကျပ်နှစ်ထောင်ကျော်နဲ့ ကြက်သွန်ဖြူတစ်ပိသာကတော့ ကျပ်ထောင့်ငါးရာဝန်းကျင် ပေးနေရပါတယ်။
ဓါတ်ပုံ- လှိုင်သာယာမြို့နယ်ရှိ ဈေးတခုအားတွေ့ရစဉ်။
