ကမ္ဘာ့နိုင်ငံပေါင်း ၁၄၀ ကျော်ရဲ့ အပျော်ရွှင်ရဆုံးနိုင်ငံစစ်တမ်းအဆင့်သတ်မှတ်မှုတွေအရ မြန်မာနိုင်ငံက ပျော်ရွှင်မှုအဆင့် ၁၁၈ သတ်မှတ်ခံရပြီးနိုင်ငံတွင်းလူမှုစီးပွား ပဋိပက္ခတွေကြောင့် အရာရာဆုတ်ယုတ်နေကာ ပျော်ရွှင်မှုမရှိသလောက်ဖြစ်နေတယ်လို့ ကုလသမဂ္ဂစစ်တမ်းဖော်ပြချက်တွေကနေသိရပါတယ်။
ကုလသမဂ္ဂအဖွဲ့အစည်းရဲ့ဖော်ပြချက်အရ ကမ္ဘာ့အပျော်ရွှင်ရဆုံးနိုင်ငံကိုရွေးချယ်ရာမှာ နိုင်ငံပေါင်း ၁၄၃ နိုင်ငံကလူတွေရဲ့ဘဝနဲ့တိုင်းတာပြီးအကဲဖြတ်ခဲ့ကြကာ လူမှုရေးထောက်ပံ့မှု၊ ဝင်ငွေ၊ ကျန်းမာရေး၊လွတ်လပ်မှု၊ လှူဒါန်းမှုနဲ့ လာဘ်စားမှုကင်းစင်တဲ့အခြေအနေတွေအပေါ်မူတည်ပြီး ဆုံးဖြတ်ကြတယ်လို့ဆိုပါတယ်။
မြန်မာနိုင်ငံဟာ ကမ္ဘာ့အပျော်ရွှင်ရဆုံးနိုင်ငံ စစ်တမ်းအရ ရမှတ် ၄ ဒဿမ၃၅ အဆင့်၁၁၈ ချိတ်ခဲ့ရာ ဒါဟာပြီးခဲ့တဲ့ ၂၀၂၃ခုနှစ်က အဆင့်သတ်မှတ်ချက် ၁၁၇ ချိတ်တာထက် နောက်တစ်ဆင့်လျော့ကျလာပြီး ပျော်ရွှင်မှု မရှိတာများလာနေတာပါ။
ကမ္ဘာ့အပျော်ရွှင်ရဆုံးနိုင်ငံစစ်တမ်း မှာ မြန်မာနိုင်ငံနဲ့ပတ်သက်ပြီးဆက်စပ်ဖော်ပြချက်အရ နိုင်ငံတွင်းမှာ ၁မိနစ်ကိုလူ၁ယောက်နှုန်းသေဆုံးနေသလို ၁၃မိနစ်ကိုလူ၁ယောက်နှုန်းပြည်ပကိုပြောင်းရွှေ့နေထိုင်နေတယ်လို့ဆိုပါတယ်။
" မြန်မာနိုင်ငံရဲ့ပျော်ရွှင်မှုတွေ၊ အပန်းဖြေခရီးသွားနှစ်တွေက ၂၀၂၁ခုနှစ်အာဏာသိမ်းပြီးထဲက အလုံးစုံပျောက်ဆုံးသွာတာပါ။အရင်ကဆိုသာမန်မိသာစုတစ်စုမှာအနည်းဆုံး ၁နှစ်ကို ပျော်စရာခရီးစဉ်၁ခုတော့ သွားလာကြပါတယ်။အခုကတော့ လမ်းခရီးအခြေအနေတွေအရနိုင်ငံတစ်ခုလုံးနီးပါးမှာတိုက်ပွဲတွေဖြစ်နေလို့ ခရီးအသွားအလာမကောင်းတော့သလို လူတိုင်းနီးပါးက ကုန်ဈေးနှုန်းကြီးမြင့်လာပြီးဝင်ငွေထွက်ငွေ မမျှတတော့ပဲ စီပွားရေးတွေလည်းမကောင်းတော့လို့ စားဖို့တောင်အနိုင်နိုင်ဖြစ်လာကြတော့ပျော်စရာတွေမရှိပဲအခက်ခဲတွေသာဖြစ်လာကြတော့တာပါ။"လို့ မြန်မာနိုင်ငံမှာ နေထိုင်သူတယောက်ကပြောပါတယ်။
ပြီးခဲ့တဲ့၂၀၂၄ခုနှစ်၊ ၁နှစ်တာအတွင်း ကမ္ဘာ့နိုင်ငံတွေထဲအပျော်ရွှင်ရဆုံးနိုင်ငံဟာ ဖင်လန်နိုင်ငံဖြစ်ပြီး ပျော်ရွှင်မှုရလဒ်အောက်ဆုံးအဆင့်ဖြစ်တဲ့နိုင်ငံက အာဖဂန်နစ်စတန်နိုင်ငံဖြစ်ကြောင်းသိရပါတယ်။
အာရှဒေသကနိုင်ငံတွေထဲမှာတော့ ဖိလစ်ပိုင်နိုင်ငံက ကမ္ဘာ့အပျော်ရွှင်ရဆုံးနိုင်ငံအဖြစ်အဆင့်၅၃ သတ်မှတ်ခံရကာ ထိုင်းနိုင်ငံကတော့ ဖိလစ်ပိုင်နဲ့ဗီယက်နမ်ရဲ့နောက်ကနေ အဆင့်၅၈ သတ်မှတ်ခံရတယ်လို့ ဖော်ပြထားပါတယ်။
ကမ္ဘာ့အပျော်ရွှင်ရဆုံးနိုင်ငံစစ်တမ်းကို ကုလသမဂ္ဂအစီရင်ခံမှုတွေကနေရယူကာ ၂၀၁၂ခုနှစ်ကစပြီး စစ်တမ်းကနေ ကုလသမဂ္ဂရဲ့ထောက်ပံ့မှုအတွက်နိုင်ငံရွေးချယ်မှုတွေပြုလုပ်လျက်ရှိရာ ယင်းစစ်တမ်းကို အောက်စဖို့ဒ်တက္ကသ်ုလ် ရဲ့ဦးဆောင်မှုနဲ့ တစ်ကမ္ဘာလုံးကအဖွဲ့တွေဖွဲ့စည်းပြီးပြုလုပ်ကြတယ်လို့သိရှိရပါတယ်။
