မြန်မာကအခက်ခဲနဲ့ရင်ဆိုင်နေရတဲ့ လူတစ်သန်းကျော်အတွက်ကမ္ဘာ့စားနပ်ရိက္ခာအစီအစဉ်( WFP )ကရိက္ခာအထောက်အပံ့တွေကိုလာမယ့် ဧပြီလကစပြီး လျော့ချ ကာရပ်ဆိုင်းသွားမှာဖြစ်ကြောင်း မတ်လ ၁၄ ရက်မှာ အသိပေးကြေညာလိုက်ပါတယ်။

ပဋိပက္ခတွေကြောင့် အကူအညီလိုအပ်မှု မြင့်တက်နေတဲ့ အာရက္ခဒေသက စစ်ဘေးရှောင်တသိန်းအပါအဝင်လူဦးရေတသန်းကျော်အတွက် စားနပ်ရိက္ခာအကူအညီပေးမှုတွေ ကိုရပ်ဆိုင်းမှာဖြစ်ရာ ရန်ပုံငွေလိုအပ်ချက် အလွန်ကြီးမားလာတာကြောင့် ရပ်တန့်ရတာဖြစ်တယ်လို့ WFP ကဖော်ပြပါတယ်။

WFP အနေနဲ့ ရန်ပုံငွေအသစ် မရရှိတော့ဘူးဆိုရင် ၅ နှစ်အောက်ကလေး၊ ကိုယ်ဝန်ဆောင်၊ နို့တိုက်မိခင်၊ မသန်စွမ်း စတဲ့ ထိခိုက်လွယ်အုပ်စုတွေက လူဦးရေ သုံးသောင်းခွဲခန့်ကိုပဲ ဆက်လက်ကူညီနိုင်တော့မယ်လို့ ဆိုထားပါတယ်။

“အခုဖြစ်လာမဲ့ အကူအညီရပ်ဆိုင်းမှုတွေဟာ အသက်ရှင်သန်ရေးအတွက် WFP အကူအညီတစ်ခုတည်းကိုသာ အားထားနေကြရတဲ့ နိုင်ငံတစ်ဝန်းက ထိခိုက်လွယ် ရပ်ရွာလူထုတွေအတွက် ပြင်းပြင်းထန်ထန် ဆိုးဆိုးရွားရွား ရိုက်ခတ်နိုင်ပါတယ်” လို့ WFP ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် Michael Dunford က ပြောပါတယ်။

မြန်မာလူထုကို စားနပ်ရိက္ခာ အထောက်အပံ့တွေ ဆက်လက်ပေးအပ်နိုင်ဖို့ရာအတွက် အမေရိကန်ဒေါ်လာ သန်းခြောက်ဆယ် အရေးတကြီး လိုအပ်နေတယ်လို့ ကမ္ဘာ့စားနပ်ရိက္ခာ အစီအစဉ်( WFP )က သိရပါတယ်။

လူသားချင်းစာနာမှုဆိုင်ရာ လိုအပ်ချက်နဲ့ တုံ့ပြန်ရေးအစီအစဉ်အရ လက်ရှိမှာ မြန်မာနိုင်ငံက လူဦးရေ ၁၅.၂ သန်းခန့်ဟာ တစ်နေ့တာ စားနပ်ရိက္ခာလိုအပ်ချက်ကို ပြည့်မီအောင် မဖြည့်ဆည်းနိုင်တဲ့အရေးနဲ့ ကြုံနေရကာငတ်မွတ်မှု‌‌ တွေရှိနေတယ်လို့လည်း WFP က ဖော်ပြထားပါတယ်။