မန္တလေး အောင်မြင်သာစံ မြို့နယ် ရှိ ငလျင်ဒဏ်ကြောင့် Sky Villa ကွန်ဒို အဆောက်အဦပြိုကျ ရာမှ သေဆုံး ခဲ့သူတွေ ကို တစ်ဦး ကို ကရုဏာကြေး အဖြစ် ကျပ်သိန်း၁၀၀ ပေးအပ်မည်ဟု ဆောက်လုပ်တဲ့ ကုမ္ပဏီက ကြေညာထားပါတယ်။

 

Sky Villa ကွန်ဒို ကို ဆောက်လုပ်တဲ့ ကုမ္ပဏီအနေနဲ့ငလျင်လှုပ်ခတ်မှုကြောင့် အဆောင်အဦ ပြိုကျမှုဖြစ်ပြီး ၅လ အကြာမှာ အခုလို သေဆုံးသူတွေ အတွက် ကရုဏာကြေး ကျပ်သိန်း ၁၀၀ စီပေးမယ်လို့ ကြေညာခြင်းဖြစ်ပါတယ်။

 

ပြီးခဲ့တဲ့ မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း ငလျင်ကြောင့် Sky Villa ကွန်ဒို အဆောက်အဦး ပြိုကျခဲ့ရာ ကွန်ဒို မှာ နေထိုင်သူ ၂၀၀ နီးပါး သေဆုံးခဲ့ကာ ပျောက်ဆုံးသူတွေကိုလည်း လက်ရှိအချိန်ထိ ရှာဖွေတွေ့ရှိနေဆဲ ဖြစ်ကြောင်း မြန်မာနိုင်ငံမီးသတ်တပ်ဖွဲ့ရဲ့ သတင်းထုတ်ပြန်ချက်တွေအရသိရပါတယ်။

 

အခုလို Sky Villa ကွန်ဒို ကို ဆောက်လုပ်တဲ့ ကုမ္ပဏီဘက်က ကရုဏာကြေးပေးခြင်းအပေါ် ကွန်ဒို အတွင်း သေဆုံးသူအချို့ရဲ့ မိသားစု ဝင်တွေက လက်ခံယူမှုမရှိဘဲ ကုမ္ပဏီဘက်က နစ်နာသူတွေ ကို မတောင်းပန်တဲ့ အတွက် မကျေနပ်မှု တွေ ဖြစ်ပေါ်လျက်ရှိပါတယ်။

 

""ကျန်ရစ်သူမိသားစုတွေ လိုချင်တာက ကွန်ဒိုတာဝန်ရှိသူတွေ ဦးဆောင်ပြီး လူအင်အားများစွာနဲ့ ကယ်ထုတ်ပေးဖို့ စိတ်ရင်းအမှန်နဲ့ ကျန်ရစ်သူမိသားစုကို တောင်းပန်ဖို့ ခုလို ၅လ ကြာမှ ကရုဏာကြေးလည်းမလိုချင်ဘူး ယူလဲယူမှာမဟုတ်ဘူး""လို့နစ်နာသူတစ်ဦးရဲ့မိသားစုဝင်ကသူရဲ့လူမှုကွန်ယက်စာမျက်နှာမှာရေးသားထားပါတယ်။

 

ကုမ္ပဏီဘက်မှ သေဆုံးသူတွေ အတွက် ကရုဏာကြေးကို စက်တင်ဘာ ၈ရက် နေ့မှစတင်ထောက်ပံ့ပေးအပ်မယ်လို့ ကြေညာထားပြီး သေဆုံးကြောင်းအထောင်အထားစာရွက်စာတမ်းများ နဲ့ ခိုင်လုံတဲ့ အချက်အလက် တွေနဲ့အတူ Sky Villa ယာယီကွပ်ကဲရေးရုံးမှာ ကြိုတင်လာရောက်စာရင်းပေးသွင်းဖို့ကြေညာထားပါတယ်။

 

Sky Villa ကွန်ဒိုကို ၂၀၁၇ ခုနှစ်မှာ တည်ဆောက်ခဲ့တာဖြစ်ပြီး ငလျင်ဒဏ် ခံနိုင်အောင် ဆောက်လုပ်ထားကြောင်း ကြေညာကာ တစ်ခန်းကို သိန်း ၈၀၀၀ အထိ ဈေးခေါ် ရောင်းချခဲ့ကြောင်း သိရပါတယ်။