အမေရိကန်ဗဟိုထောက်လှမ်းရေးအေဂျင်စီ(CIA)ဒုတိယအကြီးအကဲ David Cohen နဲ့ ထိုင်းဝန်ကြီးချုပ် Prayut Chan-o-cha နဲ့ မနေ့က တွေ့ဆုံခဲ့ပြီး မြန်မာ နိုင်ငံရဲ့လုံခြုံရေးအခြေအနေအပါအဝင် အကြောင်းအရာများစွာဆွေးနွေးခဲ့တယ်လို့ ဘန်ကောက်ပို့စ်သတင်းဌာနက ဒီကနေ့မှာပဲ ဖော်ပြပါတယ်။
ထိုင်းဝန်ကြီးချုပ်နဲ့ CIA အကြီးအကဲတို့ရဲ့တွေ့ဆုံမှုမှာ ဒေသတွင်းတည်ငြိမ်းရေး၊ မြန်မာနိုင်ငံအခြေအနေနဲ့ အိမ်နီးချင်း(မြန်မာ)နိုင်ငံမှာ ထိခိုက်ခံစားနေရသူတွေကို အကူအညီပေးရေး ကိစ္စရပ်တွေကို ထည့်သွင်းဆွေးနွေးခဲ့တယ်လို့ အစိုးရအိမ်တော်သတင်းရင်းမြစ်က ပြောပါတယ်။
သတင်းမထုတ်ပြန်တဲ့တွေ့ဆုံမှုမှာထိုင်းဝန်ကြီးချုပ်ဟာ Mr Cohen ကို အစိုးရအိမ်တော်မှာ ၄၅ မိနစ်ခန့်တွေ့ဆုံဆွေးနွေးခဲ့တာဖြစ်ပြီးဘန်ကောက်အခြေစိုက် သတင်းမီဒီယာတွေကိုတောင်ရယူခွင့်မပေးခဲ့ဖူးလို့ဆိုပါတယ်။
တွေ့ဆုံမှုမှာ စီးပွားရေးလုံခြုံရေး၊ ထိုင်း-အမေရိကန်ပူးပေါင်းဆောင်ရွက်မှုနယ်ပယ်များနဲ့ ထိုင်းက အာရှ-ပစိဖိတ်စီးပွားရေးပူးပေါင်းဆောင်ရွက်ရေး(Apec)ဥက္ကဌ တာဝန်ယူချိန်မှာ အမေရိကန်ရဲ့ ကူညီထောက်ပံ့ရေးကတိကဝတ်တွေနဲ့ ပတ်သက်လို့ ဆွေးနွေးခဲ့တယ်လို့လည်းဘန်ကောက်ပိုစ့်ရဲ့ သတင်းရင်းမြစ်က ပြောပါတယ်။
ပြီးခဲ့တဲ့သီတင်းပတ်အတွင်း ထိုင်းနိုင်ငံခြားရေးဝန်ကြီး Don Pramudwinai ဟာ နေပြည်တော် ကိုလာရောက်ပြီး အာဏာသိမ်းစစ်ကောင်စီခေါင်းဆောင်မင်းအောင်လှိုင်နဲ့တွေ့ဆုံခဲ့ပါတယ်။
