ရန်ကုန်တိုင်းဒေသကြီး အတွင်း ဝမ်းပျက်ဝမ်းလျှော ရောဂါ ဖြစ်ပွားတာကြောင့်  နှစ်ရက် အတွင်း မှာ တင် ဆေးရုံ တက်ရောက် ကုသနေရတဲ့ လူနာ ၁၀၀ကျော် ရှိတယ်လို့ ကျန်းမာရေးဝန်ကြီးဌာနရဲ့ သတင်း ထုတ်ပြန်ချက်အရ သိရပါတယ်။

ဇူလိုင် ၇ ရက်က ဝမ်းပျက်ဝမ်းလျှောရောဂါနဲ့ ဆေးရုံတက်ရောက် ကုသ သူလူနာသစ် ၄၄ ယောက်ရှိပြီး ဇူလိုင် ၆ ရက်က လူနာသစ် ၆၃ ယောက်ရှိခဲ့တယ်လို့ ကျန်းမာရေးဝန်ကြီးဌာနက သတင်းထုတ်ပြန်ထားပါတယ်။

ဇူလိုင် ၇ရက် နေ့ က ဆေးရုံတက် လူနာ ၄၄ဦး ထဲ မှ နှစ်ဦး မှာ ပြင်းထန်ဝမ်းပျက် ဝမ်းလျှော ရောဂါ ဖြစ်ပွားဖြစ်ပွားတဲ့ လူနာ တွေ ဖြစ်ပြီး ကျန်၄၂ဦးမှာ သာမန်ဝမ်းပျက်ဝမ်းလျှော ရောဂါ ဖြစ်ပွား လူနာတွေ ဖြစ်တယ်လို့ သိရပါတယ်။

ရန်ကုန်တိုင်းဒေသကြီးမှာ ဇူလိုင် ၄ ရက်ကနေ ၆ ရက်အတွင်း ဝမ်းပျက်ဝမ်းလျှောရောဂါနဲ့ ဆေးရုံတက်လူနာ မြင့်တက်ခဲ့ပေမယ့် အများစုမှာ သာမန်ဝမ်းပျက်ဝမ်းလျှောရောဂါဖြစ်ပွားတဲ့လူနာတွေသာဖြစ်တယ်လို့ ထုတ်ပြန် ချက်မှာ ဖော်ပြထားပါတယ်။

"ဝမ်းပျက်ဝမ်းလျှောရောဂါတွေ အဖြစ်များတဲ့ အတွက် ဂရုစိုက်ဖို့ ရပ်ကွက်ထဲ အသံ ချဲ့စက်နဲ့ လိုက်အော်တယ်   ကိုယ်တွေ လဲ ပြင်ပအစားသောက်မစားမိအောင်နေတယ် ရေကိုကျိုချက်ပြီးသောက် တယ် အခုလို စားဝတ်နေရေးကြပ်တည်းနေတဲ့ အချိန် အခုလို ရောဂါ တွေ ဖြစ်လာတော့ ပြည်သူတွေအတွက် ဒုက္ခပေါ်ဒုက္ခ ဆင့်သလိုပါဘဲ အတတ်နိုင်ဆုံး မဖြစ်အောင် ကိုယ့်ကိုကိုယ် ကာကွယ်ရမှာပဲလေ" လို့ အင်းစိန်မြို့နယ် နေသူတစ်ဦးကပြောပါတယ်။

ဝမ်းပျက်၊ ဝမ်းလျှော ရောဂါ ကြောင့် သေဆုံး တာ တွေ ရှိတယ်လို့ဒေသခံတွေထံကသိရပေမယ့်  စစ်ကောင်စီ ဘက်ကတော့  ဝမ်းပျက်ဝမ်းလျှာရောဂါ ဖြစ်ပွားသူတွေ ထဲ က ကာလဝမ်းရောဂါပိုး ယနေ့အထိ စစ်ဆေးတွေ့ရှိတာ ငါးဦးရှိပြီး ဝမ်းပျက်ဝမ်းလျောရောဂါကြောင့်သေဆုံးသူမရှိဘဲ တစ်ဦးမှာ ဝမ်းပျက်ဝမ်းလျှောရောဂါကြောင့်မဟုတ်ဘဲ နဂို ခုခံအားကျဆင်းမှုရောဂါ အခံ ရှိတဲ့ အတွက်သေဆုံးခြင်းဖြစ်တယ်လို့ စစ်ကောင်စီ၊ တာ၀န်ခံ ဗိုလ်ချုပ်ဇော်မင်းထွန်းက ပြောကြားထားပါတယ်။

လက်ရှိမှာတော့ ရောဂါဖြစ်ပွားတဲ့ မြို့နယ်၊ ရပ်ကွက်၊ နေအိမ်တွေအထိ ကွင်းဆင်းပြီး လူနာတွေ့ရှိရာနေရာကို ဦးတည်ကာကွယ်ထိန်းချုပ်တဲ့ လုပ်ငန်းတွေဖြစ်တဲ့ ကူးစက်တဲ့ဖြစ်စဉ်တွေကို စုံစမ်းစစ်ဆေးမေးမြန်းတာ၊ ရောဂါ ပိုးထိန်းချုပ်တာ၊ အနီးကပ်ထိတွေ့သူတွေကို ကုသမှုပေးတာ၊ အနီးဝန်းကျင်မှာ လူနာသစ်ရှာဖွေတာ၊ ကျန်းမာရေး အသိပညာပေးတာ၊ သောက်သုံးရေသန့်ရှင်းရေးအတွက် ကလိုရင်းခတ်တာ၊ ရေသန့်ဆေးပြားတွေဝေတာ၊ အစား အစာသန့်ရှင်းရေး၊ ပတ်ဝန်းကျင်သန့်ရှင်းရေးလုပ်ငန်းတွေကို ဆောင်ရွက်ပေးနေတယ်လို့ ကျန်းမာရေး ဝန်ကြီး ဌာနက ထုတ်ပြန်ထားပါတယ်။