စက်သုံးဆီ ဝယ်ယူခက်ခဲခြင်းနှင့်ဈေးနှုန်းမြင့်တတ်ခြင်းကြောင့် အဝေးပြေးကားလက်မှတ်တွေဟာ ယခင်ထက် ဈေးနှစ်ဆကျော်မြင့်တတ်သွားသလို သင်္ကြန်ကာလ ရုံးပိတ်ရက်အတွက် ကြိုတင်ဖြတ်ထားတဲ့ လက်မှတ်တွေကိုလည်း ဆီပြတ်လပ်ပါက ငွေပြန်အမ်းမယ်လို့ ယာဉ်လိုင်းများက ကြိုတင်အသိပေးထားကြောင်း သိရပါတယ်။
ယခင်က ရန်ကုန်-မန္တလေး ကားခ မှာ ၂သောင်းကျပ်ဝန်းကျင်သာရှိခဲ့ရာမှယခု တွင် ၅သောင်းကျပ်ဝန်းကျင်အထိဈေးမြင့်လာသလို ရန်ကုန်-နေပြည်တော် ကားခ မှာလည်း ၂သောင်းကျော်ကနေ အခု ၄သောင်းဝန်းကျင် ကို ဈေးတိုးမြင့်သွားကာ အခြား နေရာဒေသအလိုက် အဝေးပြေးယာဉ်စီးခ တွေ ဈေးမြင့်တတ်လာကြောင်းသိရပါတယ်။
"ပြီးခဲ့တဲ့ အပတ်ကမှ ရန်ကုန်ဆေးခန်း လာပြတာ ကားခ ၁၅၀၀၀ကျပ်ကနေ အခု၂၆၀၀၀ကျပ် ဖြစ်သွားပြီး သူတို့ဘက်က လည်း ဆီဈေးတတ်လို့ ဝယ်ရခက်လို့ ဈေးတတ်တယ်ဆိုပေမယ့် ထက်ဝက်နီးပါး ဈေးမြှင့်လိုက်တော့ ခရီးသွားတွေဘက်မှာ ကုန်ကျစရိတ်များပြီး အခက်ခဲဖြစ်ကုန်တာပေါ့"လို့ ဖြူးမြို့နယ် အနီး နေထိုင်သူတစ်ဦးကပြောပါတယ်။
လက်ရှိ အခြေနေအရ စက်သုံးဆီ ဒီဇယ်တစ်လီတာ ၄၃၉၀ကျပ်ရှိပြီး ပရီမီယံဒီဇယ်တစ်လီတာ ၄၈၂၀ ကျပ် ဖြစ်နေတဲ့ အပြင် အလွယ်တကူ မရတာကြောင့် ယာဉ်ပိုင်ရှင်တွေမှာ အခက်ခဲများဖြစ်နေတယ်လို့ သိရပါတယ်။
"ခရီးသည်တွေဘက်ကကြည့်ရင်လည်း စရိတ်တွေပိုကုန်သွားတော့ အဆင်မပြေဘူး ယာဉ်ပိုင်ရှင်တွေဘက်ကလည်း ခရီးဝေးရင်ဝေးသလောက် ဆီလုံလောက်ပါ့မလား အလွယ်ကူဝယ်ရပါ့မလား မရရင် အဆင်ပြေသလိုဝယ်ရမှာတွေနဲ့ အခက်ခဲတွေဖြစ်နေတာ အခု ကားခတွေဈေးတတ်တော့ ခရီးသွားတွေနည်းသွားတယ်""လို့ အဝေးပြေးကားလက်မှတ်ရောင်းသူတစ်ဦးကပြောပါတယ်။
ဒါ့ပြင် လာမယ့် ဧပြီလမှာ သင်္ကြန်ရက်ရှည်ပိတ်ရက်များ တွင် ခွင့်ဖြင့်အိမ်ပြန်မည့်သူများ က ယာဉ်လက်မှတ်ကြိုတင်ဝယ်ယူထားတာကြောင့် အဆိုပါကာလမှာ ဆီပြတ်လပ်မှုဖြစ်ပေါ်ခဲ့ပါက ငွေပြန်အမ်းပေးမယ့်အကြောင်း ယာဉ်လိုင်းများက ကြေငြာထားတာလည်းတွေ့ရပါတယ်။
စက်သုံးဆီ အခက်ခဲကြောင့် ကုန်စည်သယ်ယူစရိတ်တွေဈေးမြင့်လာပြီးစားသောက်ကုန်ဈေးနူန်းတွေလည်း မြင့်တတ်လာတယ်လို့ ဈေးရောင်းချသူတွေထံမှ သိရပါတယ်။
HTH
