အမျိုးသမီးကိုးဦး ကို ပြည့်တန်ဆာ အဖြစ် ခိုင်းစေကာ ရရှိတဲ့ ငွေကြေးအကျိုးအမြတ်တွေကို ခေါင်းပုံဖြတ် ရယူသူတွေကို လူကုန်ကူးမှုတားဆီးနှိမ်နှင်းရေးဥပဒေဖြင့် အရေးယူခဲ့တယ်လို့ စစ်ကောင်စီ လက်အောက်ခံ မြန်မာနိုင်ငံရဲတပ်ဖွဲ့ရဲ့ သတင်းထုတ်ပြန်ချက်အရ သိရပါတယ်။
ဖြစ်စဉ်မှာ မန္တလေးတိုင်းဒေသကြီး ပြည်ကြီးတံခွန်မြို့နယ်(ဈ)ရပ်ကွက်နေ ကိုထွန်းဝေ၊မစိုးစိုးထွေး၊မခင်ချိုဝင်း နဲ့ ပြင်ဦးလွင် မြို့ ရပ်ကွက်၆နေ မဖူးဖူးဝေ တို့လေးဦးဟာ Hello စင်တင် စားသောက် ဆိုင်ရှိ မော်ဒယ် အဖွဲ့ မှအမျိုးသမီးကိုးဦး ကို မော်ဒယ်ရှိုးလျှောက်ခိုင်းပြီး ဧည့်သည့်အမျိုးသားနဲ့ ပြင်ပလိုက်ခိုင်းပြီးပြည့်တန်ဆာအဖြစ် ခိုင်းစေတယ်လို့ သိရပါတယ်။
အခုလို ခိုင်းစေပြီး ရရှိလာတဲ့ ငွေ တွေကို ခေါင်းပုံဖြတ် အကျိုးအမြတ် ရယူဆောင်ရွက် ကြောင်း စိစစ်ပေါ်ပေါက်တဲ့ အတွက် အမှတ် (၁၁) လူကုန်ကူးမှုတားဆီးနှိမ်နှင်းရေး ရဲတပ်ဖွဲ့ (မန္တလေး)မှ တရားလို ပြု တိုင်တန်းခဲ့ရာ ပြည်ကြီးတံခွန်မြို့နယ် စက်မှုနယ်မြေရဲစခန်း (ပ)၁၀၃/၂၀၂၅လူကုန်ကူးမှုတားဆီးနှိမ်နှင်းရေးဥပဒေပုဒ်မ ၃၅/၄၄ ဖြင့် အမှုဖွင့် တရားစွဲတင်ခဲ့တယ်လို့ ဆိုပါတယ်။
ဒါကြောင့် ဒီဇင်ဘာ၁၂ရက်က မဟာအောင်မြေခရိုင် တရားရုံး မှ တရားခံ မစိုးစိုးထွေး၊မခင်ချိုဝင်း၊ကိုထွန်းဝေနဲ့ မဖူးဖူးဝေ တို့ လေးဦးကို လူကုန်ကူးမှုဥပဒေပုဒ်မ ၃၈(က)အရ အလုပ်နဲ့ထောင်ဒဏ် နှစ်၂၀ စီ ချမှတ်ခဲ့ကြောင်း သိရပါတယ်။
