၂၀၂၅ ခုနှစ် အထွေထွေရွေးကောက်ပွဲ ကို လာမယ့် ဒီဇင်ဘာ ၂၈ ရက်က စပြီး အပိုင်း လိုက်ကျင်းပမယ်လို့ စစ်ကော်မရှင် ရဲ့ ရွေးကောက်ပွဲကော်မရှင်က ဩဂုတ်လ ၁၈ရက်မှာ ထုတ်ပြန်ကြေညာလိုက်ပါတယ်။
ဖွဲ့စည်းပုံအခြေခံဥပဒေ (၂၀၀၈ ခုနှစ်) ပုဒ်မ ၃၉၉ (က)၊ ပြည်ထောင်စုရွေးကောက်ပွဲကော်မရှင် ဥပဒေပုဒ်မ ၁၀ ပါ တာဝန်နဲ့ လုပ်ပိုင်ခွင့်ကိုကျင့်သုံးပြီး သက်ဆိုင်ရာ လွှတ်တော်ရွေးကောက်ပွဲ ဥပဒေပုဒ်မ ၃၄ (ဂ) နဲ့ နည်းဥပဒေ ၁၆ (က) တို့အရ လွှတ်တော်အသီးသီးအတွက် ပါတီစုံဒီမိုကရေစီအထွေထွေ ရွေးကောက်ပွဲ အပိုင်း (၁) ကို၂၀၂၅ ခုနှစ်၊ ဒီဇင်ဘာ ၂၈ ရက် တနင်္ဂနွေနေ့မှာ စတင်ကျင်းပပြုလုပ်မှာဖြစ်ပြီး ဆက်လက်ကျင်းပမယ့် အပိုင်းလိုက် နေ့ရက်တွေကိုလည်း ထုတ်ပြန်ပေးသွားမှာဖြစ်တယ်လို့ ကြေညာခဲ့ပါတယ်။
ရွေးကောက်ပွဲ ပြုလုပ်မယ့် မဲဆန္ဒနယ်ကိုလည်း တစ်နိုင်ငံလုံးအ တိုင်း အတာဖြင့် ကြေညာထားပြီး စစ်တပ်က လက်လွှတ်ထားရတဲ့ မြို့နယ်တွေ ကိုပါ ရွေးကောက်ပွဲ လုပ်မယ်လို့ ကြေညာထားပါတယ်။
ရွေးကောက်ပွဲတွင် မဲအများဆုံးရသူ အနိုင်ယူစနစ် ((FPTP) စနစ် နဲ့ ကျင်းပမယ့် ပြည်သူ့လွှတ်တော် မဲဆန္ဒနယ်မြေ ၃၃၀ခု၊ မဲအများဆုံးရသူ အနိုင်ယူစနစ် (FPTP)နဲ့ အချိုးကျကိုယ်စားပြုPRစနစ် နှစ်မျိုး လုံးကျင်းပမယ့် အမျိုးသား လွှတ်တော်မဲဆန္ဒနယ်မြေ၁၁၀ခု၊ MMP(Mixed-Member Proportional)ဖြင့် ကျင်းပမယ့် တိုင်းနဲ့ ပြည်နယ် လွှတ်တော်မဲဆန္ဒနယ်မြေ ၃၆၄ ခုနဲ့ တိုင်းရင်းသားလူမျိုးမဲဆန္ဒနယ် ၂၉ခု တို့ဖြင့် ဆောင်ရွက်သွားမယ်လို့ သိရပါတယ်။
