နိုင်ငံသားစိစစ်ရေးကတ်အတု ဖြင့် နိုင်ငံကူးလက်မှတ် သက်တမ်းတိုး လျှောက်ထားမှု တွေရှိနေတယ်လို့ စင်္ကာပူရှိ မြန်မာသံရုံးက ထုတ်ပြန်ကြေညာပါတယ်။

 

စင်ကာပူနိုင်ငံ မှာ နေထိုင်အလုပ်လုပ်ကိုင်လျက်ရှိတဲ့ မြန်မာနိုင်ငံသားတွေကို မြန်မာသံရုံး၊ စင်ကာပူမြို့အနေ နဲ့ နိုင်ငံကူးလက်မှတ်သက်တမ်းတိုးပေးခြင်း၊ ထောက်ခံစာများထုတ်ပေးခြင်းတို့ ကို ဆောင်ရွက်ပေးရာမှာနိုင်ငံသားစိစစ်ရေးကတ်ပြား အတု ဖြင့် နိုင်ငံကူးလက်မှတ်သက်တမ်းတိုးလျှောက်ထားတာတွေ စိစစ်တွေ့ရှိရတယ်လို့ ကြေညာထားပါတယ်။

 

၎င်းနိုင်ငံသားစိစစ်ရေးကတ်ပြား အတုတွေကို စင်္ကာပူရှိ မြန်မာအမျိုးသမီးတစ်ဦးက ၎င်းရဲ့ Tiktok မှတစ်ဆင့် အခကြေးငွေ ယူပြီး ဆောင်ရွက်ပေးတာ ဖြစ်တယ်လို့ သိရှိရကြောင်း သံရုံးက ထုတ်ပြန်ထားပါတယ်။

 

အခုလို နိုင်ငံသားစိစစ်ရေးကတ်ပြား အတု နဲ့ နိုင်ငံသားစွန့်လွှတ်ကြောင်း ထောက်ခံစာ လျှောက်ထားတာ မှာ စိစစ်တွေ့ရှိရပါကသံရုံးအနေနဲ့ ထောက်ခံစာထုတ်ပေးမှာ မဟုတ်ဘဲ စင်ကာပူနိုင်ငံ လူဝင်မှုကြီးကြပ်ရေးနှင့်နယ်စပ်ဂိတ်များ အာဏာပိုင်အဖွဲ့ (ICA)သို့ ဆက်သွယ် အကြောင်းကြားသွားမယ်လို့ အသိပေးထားပါတယ်။

 

ထို့ကြောင့် မြန်မာနိုင်ငံသားတွေအနေနဲ့ အခုလိုတရားမဝင် တဲ့ ကိစ္စတွေကို အခကြေးငွေ ယူပြီး နိုင်ငံသား အချင်းချင်း လိမ်လည်ကာ နိုင်ငံသားစိစစ်ရေးကတ်ပြားအတု တွေ မပြုလုပ်ကျဖို့နဲ့ ပြုလုပ်ပေးကြောင်း စိစစ်တွေ့ရှိပါက ၎င်းပုဂ္ဂိုလ် ကို ထိရောက်စွာ အရေးယူမယ်လို့ အသိပေး ကြေညာထားပါတယ်။