ပြီးခဲ့တဲ့မေလလယ် ခန့်ကစပြီး မြန်မာနိုင်ငံတွင်းအင်တာနက်အသုံးပြုမှုတွေမှာ Vpn ချိတ်ဆက်မရတဲ့ ပြဿနာတွေ ကြုံခဲ့ရပြီး အင်တာနက် အသုံးပြုရတာ အခက်အခဲတွေ ကြုံရပြီးတဲ့နောက် ယခုရက်ပိုင်းအတွင်း MPT နဲ့ ATOM ကဲ့သို့ ပြည်တွင်း ဆက်သွယ်ရေးအော်ပရေတာတွေကနေ 5G ကွန်ရက်ကို ရန်ကုန်ကဲ့သို့မြို့ကြီးတွေမှာ အသုံးပြုနိုင်တော့မှာဖြစ်ကြောင်း ကြေညာလာကြပါတယ်။
အဆိုပါပြည်တွင်း အော်ပရေတာတွေအနေနဲ့ ရန်ကုန်မြို့ရဲ့နေရာအချို့မှာ ယခုဇွန်လအတွင်း 5G ကွန်ရက်ကို စမ်းသပ်အသုံးပြုနိုင်တော့မယ်လို့အသိပေးမှုတွေရှိနေရာ 5G ကွန်ရက်ဟာ ယခင်သုံးစွဲနေတဲ့ 4G ကွန်ရက်ထက် အင်တာနက်လိုင်းဆွဲအား ၁၀ဆပိုမြန်ဆန်ကာ ၁စက္ကန့်ကို 1Gbps နှုန်းအထိ ဒေတာလွှဲပြောင်းတာတွေ လုပ်နိုင်မယ်လို့ သိရပါတယ်။
"အခုတလောအင်တာနက် လိုင်းသုံးရတာ စိတ်ပျက်ဖို့အတော်ကောင်းပါတယ်။ လိုင်းတွေကစုတ် VPNက သုံးမရကျော်မရနဲ့ အွန်လိုင်းသုံးရတာခက်ခဲတယ်။ MPTတို့က 5Gကွန်ရက်နဲ့အဆင့်မြှင့်မယ်ပြောတော့လည်း လိုင်းတွေပိုကောင်းမကောင်းကတော့စောင့်ကြည့်ရမှာပါပဲ။ ဟိုတလောကပဲ စစ်ကောင်စီဘက်ကနေ VPN တွေကို လိုက်ဖျက်နေတယ်ဆိုသတင်းတွေတော့တွေ့မိတယ်။ ဘာသဘောလဲတော့မသိပေမယ့် အင်တာနက်အသုံးပြုပြီးအလုပ်လုပ်ရတဲ့ လူတွေအတွက်တော့ ကမောက်ကမတွေဖြစ်သွားခဲ့တယ်လို့"ရန်ကုန်မြို့နေ အွန်လိုင်းသုံးစွဲသူတစ်ဦးကပြောပါတယ်။
ပြည်တွင်းအော်ပရေတာဖြစ်တဲ့ MPTအနေနဲ့ 5Gကွန်ရက်အတွက်ကို အဆင့်မြင့်နည်းပညာချိတ်ဆက်နိုင်ဖို့ ကျယ်ကျယ်ပြန့်ပြန့်ဆောင်ရွက်နေရာ ရန်ကုန်မြို့နေရာအချို့မှာသာစတင်သုံးစွဲဖို့လုပ်ဆောင်နေတာလို့သိရပြီး နောက်ထပ်ပြည်တွင်း အော်ပရေတာ ATOM ကတော့ 5G ကွန်ရက်အတွက်ကို ရန်ကုန်မြို့မှာ Huawei ကုမ္ပဏီနဲ့ပူးပေါင်းလုပ်ဆောင်တာဖြစ်ပြီး မန္တလေးမြို့အတွက်ကိုတော့ ZTE ကုမ္ပဏီနဲ့ပူးပေါင်းလုပ်ဆောင်တာဖြစ်ရာ ATOM ရဲ့ 5Gကွန်ရက်ကတော့ ရန်ကုန်နဲ့မန္တလေးမြို့ကြီး နှစ်ခုမှာ စတင်အသုံးပြုနိုင်မယ်လို့ဆိုပါတယ်။
မြန်မာနိုင်ငံရဲ့အင်တာနက်အသုံးပြုမှုမှာ ယခင်ပြီးခဲ့တဲ့ ၁၀ စုနှစ်တွေက 2G နဲ့ 3Gကွန်ရက်တွေနဲ့စတင်ကာ အွန်လိုင်းအသုံးပြုခဲ့ကြတာဖြစ်ပြီး ၂၀၁၄ ခုနှစ်နောက်ပိုင်း ကာလမှာ 4Gကွန်ရက် ပေါ်ပေါက်လာပြီး လက်ရှိ၂၀၂၄ခုနှစ်မှာတော့ 5G ကွန်ရက်ကိုစတင် စမ်းသပ်အသုံးပြုကြတော့မှာဖြစ်ကြောင်းသိရှိရပါတယ်။
လက်ရှိအခြေအနေမှာတော့ မြန်မာနိုင်ငံရဲ့ အချို့ဒေသတွေမှာ ဆက်သွယ်ရေးအတွက် ဖုန်းလိုင်း၊ အင်တာနက်လိုင်းတွေ ဖြတ်တောက်ခံထားရလို့ ဒေသခံတွေ အတွက် အခက်အခဲတွေဖြစ်ပေါ်နေပါတယ်။
