ကိုရီးယားသမ္မတနိုင်ငံနဲ့ ကမ္ဘာ့စားနပ်ရိက္ခာအစီအစဉ် (WFP) တို့ဟာ မြန်မာက ဆာလောင်အာဟာရချို့တဲ့မှုတွေအတွက်“REACH” လို့ အမည်ပေးထားတဲ့ အရေးပေါ်အကူအညီပေးရေး လုပ်ငန်းအစီအစဥ်တစ်ရပ်ကို စတင်လိုက်ရာ ကိုရီးယားကကန်ဒေါ်လာ ၁၀ သန်း ရန်ပုံငွေပံ့ပိုးပေးလိုက်တယ်လို့သိရပါတယ်။
REACH အရေးပေါ်အကူညီပေးရေးအစီစဉ်ဟာ
ပဋိပက္ခနဲ့ ငလျင်ဒဏ်သင့်ဒေသတွေက လူဦးရေ သုံးသိန်း ဝန်းကျင်ကို နှစ်လစာ စားနပ်ရိက္ခာတွေ နဲ့/ သို့မဟုတ် စားနပ်ရိက္ခာဝယ်ယူနိုင်ဖို့ မိုဘိုင်းလ်ပိုက်ဆံ သို့မဟုတ် ဘောက်ချာကတစ်ဆင့် ငွေသားအထောက်အပံ့တွေ ပေးအပ်သွားမှာဖြစ်ရာ နောက်ထပ်အေနနဲ့ ကိုယ်ဝန်ဆောင်၊ နို့တိုက်မိခင်တွေနဲ့ ကလေးငယ်တွေ စုစုပေါင်း လူဦးရေ ၂၄,၀၀၀ တို့ကိုလည်း အာဟာရချို့တဲ့မှု ကာကွယ်ရေးနဲ့ ကုသရေး အကူအညီတွေ ပေးအပ်သွားမယ်လို့ဆိုထားပါတယ်။
" မြန်မာနိုင်ငံမှာ စံချိန်တင်မြင့်တက်နေတဲ့ ဆာလောင်မွတ်သိပ်မှုအခြေအနေကို တုံ့ပြန်တဲ့အနေနဲ့ ဘေးဒုက္ခရောက်နေကြသူ ပြည်သူတွေအတွက် လူသားချင်းစာနာမှုအကူအညီတွေ ပေးအပ်ဖို့ကို REACH အစီစဉ်ရေးဆွဲပြီး အထောက်အပံ့တွေကို ဒေသခံမိတ်ဖက်အဖွဲ့အစည်းတွေ၊ အစိုးရမဟုတ်တဲ့ အဖွဲ့အစည်းတွေ (NGOs) နဲ့ လက်တွဲပြီး အကူအညီလိုအပ်နေသူတွေဆီ တိုက်ရိုက်ပေးအပ်သွားမှာဖြစ်ပါတယ်။"လို့ကမ္ဘာ့စားနပ်ရိက္ခာအစီအစဉ် (WFP) ရဲ့တာဝန်ရှိသူက ပြောပါတယ်။
လက်ရှိ မြန်မာနိုင်ငံမှာ လူ ၃ ဦးလျှင် ၁ ဦးနှုန်းနဲ့ စုစုပေါင်း လူဦးရေ ၁၆ ဒဿမ ၇ သန်းဟာ ဝမ်းရေးမဖူလုံမှုကို ရင်ဆိုင်နေရပြီးအဲဒီထဲကမှ လူဦးရေ ၂ ဒဿမ ၈ သန်းဟာ ထမင်းတစ်နပ်အတွက် နေ့စဉ်ရုန်းကန်နေရတဲ့ အရေးပေါ်အခြေအနေကို ရင်ဆိုင်နေရတယ်လို့ WFP က ထုတ်ပြန်ဖော်ပြထားပါတယ်။
အခြေခံစားနပ်ရိက္ခာရဲ့ ပျမ်းမျှကုန်စျေးနှုန်းဟာ ၂၀၂၁ ခုနှစ်အစောပိုင်းကာလနဲ့ ယှဥ်မယ်ဆို အခုအခါ လေးဆအထိ တိုးမြင့်လာတဲ့အတွက် မြန်မာနိုင်ငံက ချို့တဲ့လူတန်းစားတွေဟာ အငတ်ဘေးနဲ့ရင်ဆိုင်နေကြရပါတယ်။
ဒါကြောင့် REACH အစီအစဥ်က ဆာလောင်မွတ်သိပ်မှုကို အပြင်းထန်ဆုံးခံစားနေကြရတဲ့ အထူးသဖြင့် သွားလာရခက်ပြီး ဝေးလံခေါင်းပါးတဲ့ဒေသတွေမှာ စားနပ်ရိက္ခာအကူအညီပေးအပ်သွားနိုင်စေဖို့ရည်ရွယ်ထားတယ်လို့ ကမ္ဘာ့စားနပ်ရိက္ခာအစီအစဉ် (WFP)ကဖော်ပြထားပါတယ်။
