အင်းစိန်မြို့နယ် စော်ဘွားကြီးကုန်း မှာ မူလကဂိတ်ထိုးကာပြေးဆွဲနေတဲ့ ပဲခူး-ရန်ကုန် မီနီဘတ်အဝေးပြေးယာဉ်လိုင်းတွေကို အောင်မင်္ဂလာအဝေးပြေး မှာ တည်ဆောက်နေပြီဖြစ်တဲ့ ကားဂိတ်အသစ် ပြီးစီးတာနဲ့ယခုလကုန်တွင်ပြောင်းရွှေ့ဖို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကော်မတီ (YRTC) ကညွှန်ကြားထားပါတယ်။
အောင်မင်္ဂလာအဝေးပြေး က ဂိတ်အမှတ် ၁ အနီးမှာလက်ရှိတွင် ပဲခူး-ရန်ကုန် မီနီဘတ်အဝေးပြေးယာဉ်လိုင်း ကားဂိတ်ကိုတည်ဆောက်နေရာ ဆောက်လုပ်မှု၅၀ရာခိုင်နှုန်းခန့်ပြီးစီးနေပြီး ကားဂိတ်ရဲ့ အကျယ်အဝန်းမှာ အလျားပေ၂၀၀နဲ့ အနံပေ၆၀ ရှိနေတယ်လို့ဆိုပါတယ်။
ပဲခူး- ရန်ကုန် မီနီဘတ်စ် အဝေးပြေးကားတွေဟာ မူလက ရန်ကုန်မြို့ထဲအထိဝင်ခွင့်ရခဲ့သလို အင်းစိန်စော်ဘွားကြီးကုန်း တွင် ဂိတ်ထိုင်ပြုလုပ်ကာပြေးဆွဲနေခဲ့ပေမယ့် ယင်းမီနီဘတ်စ်ကားတွေရဲ့ ကားတံခါးပေါက်က ဘယ်ဘက်မှဖြစ်နေတာကြောင့် မကြာခဏဆိုသလိုယာဉ်အန္တရာယ်ဖြစ်မှုတွေရှိခဲ့တဲ့အတွက် ရန်ကုန်မြို့တွင်း ကို ဘယ်မောင်းမီနီဘတ်စ် ယာဉ်တွေဝင်ရောက်ခွင့်မပြုတော့ပဲကန့်သတ် လိုက်တာဟာ ပြီးခဲ့တဲ့၂၀၂၃ခုနှစ်အောက်တိုဘာလကဖြစ်ကြောင်း YRTC ရဲ့ တာဝန်ရှိသူ တွဲဖက်အတွင်းရေးမှူး ဦးလျန်ကျင့်မာန်ကပြောပါတယ်။
" ပဲခူးကားတွေဂိတ်ရွေ့တော့အခု စီးရတာက အရင်ကလောက်တော့ အဆင်မပြေတော့ဘူးပေါ့ ။ အရင်က ဘာပဲပြောပြောစော်ဘွားကြီးကုန်းအထိရောက်တော့ မြို့တွင်းတစ်နေရာကိုဆက်သွားဖို့သိပ်မဝေးတော့ဘူးပေါ့ အခုက ကားဂိတ်ကပြောင်းတယ်ဆိုပေမယ့် အောင်မင်္ဂလာအဝေးပြေးက ဂိတ်က မပြီးသေးတော့ ရန်ကုန် zero မိုင်အထိဆိုတော့ဒီ စပ်ကြားကာလမှာ ဟိုမရောက်ဒီမရောက်နဲ့ ပဲခူးနဲ့ရန်ကုန်ခရီးစဉ်ကအသွားအလာအတွက် လမ်းခရီးအခက်ခဲတွေဖြစ်နေတာတော့အမှန်ပါပဲ။ ပြောင်းမယ့်အဝေးပြေးဂိတ်မှာ ဂိတ်ထိုးဖြစ်သွားရင်တော့ ခရီးစဉ်က ပိုလွယ်မလား ပိုခက်မလားတော့ သိပ်မပြောတတ်ဖူး စောင့်ကြည့်ရမှာပဲ"လို့ ပဲခူး- ရန်ကုန်မီနီဘတ်အဝေးပြေးယာဉ်လိုင်း စီးနင်းသူတစ်ဦးကပြောပါတယ်။
လတ်တလောမှာ ပဲခူး- ရန်ကုန် မီနီဘတ်စ် အဝေးပြေးကားတွေ အနေနဲ့ ရန်ကုန်zeroမိုင် အထိသာဝင်ခွင့်ပြုတော့ကြောင်းနဲ့ကားဂိတ်တည်ဆောက်မှု အလုံးစုံပြီးပါက ယင်းအောင်မင်္ဂလာအဝေးပြေး ရှိကားဂိတ်အသစ်တွင် အထက်ပါမီနီဘတ်စ်ယာဉ်လိုင်း၉လိုင်းအထိ ပြောင်းရွှေ့ဂိတ်ထိုးရမှာဖြစ်ကြောင်းသိရပါတယ်။
ပဲခူး- ရန်ကုန် အဝေးပြေးကားယာဉ်လိုင်းများမှာ ယာဉ်လိုင်း (၁၀)ခုအထိရှိနေပြီး၉ခုက အောင်မင်္ဂလာအဝေးပြေး တွင်ပြောင်းရွှေ့ဂိတ်ထိုးပြီး ကျန်ကားယာဉ်လိုင်း(၁)ခု တော့ ဒဂုံဧရာအဝေးပြေး မှာ ကားဂိတ်ထိုးကာပြေးဆွဲမှာဖြစ်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကော်မတီ (YRTC) ကနေသိရပါတယ်။
မုဒြာ
