သီတင်းကျွတ်ကာလ အတွင်း ပဲခူး-ရန်ကုန် ပြေးဆွဲနေတဲ့ ယာဉ်လိုင်းမှ ယာဉ်အချို့ဟာ သတ်မှတ်ထားတဲ့ ယာဉ်စီးခ ထက် ပိုမိုကောက်ယူနေတဲ့ အတွက် ခရီးသွားပြည်သူတွေမှာ အခက်တွေ့နေရတယ်လို့ သိရပါတယ်။
ရန်ကုန်မြို့- ခရေပင်လမ်းခွဲ ကနေပဲခူးမြို့အထိ နဲ့ ယာဉ်စီးခ ၃၀၀၀ ကျပ်သာ သတ်မှတ်ထားပေမယ့် လက်တလောသီတင်းကျွတ်ကာလ မှာ တစ်ယောက်ကို ကျပ် ၅၀၀၀ ကနေ ၁၀၀၀၀ ကျပ်အထိ ကောက်ယူနေတယ်လို့ ကြုံတွေ့ခဲ့ရသူတွေကပြောပါတယ်။
""မနေ့က ရန်ကုန်ကနေ ပဲခူးကို သွားတာ ကားပေါ်မတတ်ခင်မေးတော့ ၄၀၀၀ ဆိုပြီး ကားပေါ်ရောက်တော့ ၁၀၀၀၀ တောင်းတယ် ကျွန်မတိုပြည်သူတွေ မတရားခံနေရတာ သက်ဆိုင်တဲ့ ဂိတ်မှုးတွေ စိစစ်အရေးယူသင့်တယ်""လို့ ခရီးသွားပြည်သူတစ်ဦးကပြောပါတယ်။
သီတင်းကျွတ်ပိတ်ရက် ခရီးသွားလာသူများတဲ့ အောက်တိုဘာ ၅ ရက်နေ့က စပြီး ပဲခူး-ရန်ကုန် ယာဉ်တော်တော်များများ ပိုမိုကောက်ယူတာပြုလုပ်လာကျကာ ယာဉ်စီးခ တောင်းသလောက်မပေးပါက ယာဉ်နောက်လိုက်တွေမှ မချေမငံပြောဆိုတာတွေလည်းရှိတယ်လို့ ခရီးသွားပြည်သူတွေထံမှ သိရပါတယ်။
"မနေ့က ထောက်ကြန့်ကနေ ပဲခူးကို စီးတာ ၅၀၀၀ကျပ် တောင်းတယ် ခါကြီးရက်ကြီး အသွားအလာများတာကို အခွင့်ကောင်းယူပြီး ယာဉ်စီးခ ကို ပိုတောင်းတာ ပိုတောင်းလို ပြောတော့ စပယ်ယာက မချေမငံ ပြန်ပြောတယ် မပေးနိုင်ရင်ဆင်းဆိုတဲ့သဘောမျိုးပြောဆိုတယ် ဒီလိုတွေဖြစ်နေတာ ဂိတ်တွေက သေချာမကြီးကြပ်လိုဖြစ်နေတာ ဂိတ်တွေ ဖုန်းဆက်တိုင်လည်း ဒီလိုရက်မျိုး ရောက်ရင် ခရီးသွားသူတွေကြုံတွေ့နေရတာပဲ""လို့ ပြည်သူတစ်ဦးကပြောပါတယ်။
ပဲခူး-ရန်ကုန် ပြေးဆွဲနေတဲ့ ယာဉ်လိုင်း အချို့ ဟာ အခုလို ခါကြီးရက်ကြီးနဲ့ခရီးသွားလာသူများတဲ့ ကာလတွေမှာ ယာဉ်စီးခ ပိုတောင်းသလို သာမန် ရက်တွေမှာလည်း ခရီးစဉ်ကို အဆုံးထိ မပို့ဆောင်ဘဲ အခြားကားဖြင့် စုပေါင်းတင်ပေးခြင်း YBS ယာဉ်တွေပေါ်တင်ပေးတာတွေ လုပ်ဆောင် တာကြောင့် ခရီးသွားပြည်သူတွေမှာ လမ်းခရီးကြန့်ကြာခြင်းနဲ့ သွားလာရအခက်တွေ့တာတွေ ဖြစ်ပေါ်တာတွေလည်းရှိပါတယ်။
" ပဲခူး-ရန်ကုန် ပြေးဆွဲနေတဲ့ ယာဉ်တော်တော်များများ စည်းကမ်းမဲ့ကြတယ် ဘယ်တော့မှ ခရီးစဉ်ကို ဆုံးအောင်မပို့ဘူး လမ်းတစ်ဝက်လောက်ဆို အခြားကားနဲ့ပေါင်းတင်တာတွေ တချိုဆို YBS နဲ့ပြောင်းတင်ပေးလိုက်တာတွေ လုပ်ကျတယ် တချို့ ခရီးသည်တွေဆို မသွားမလာတတ်နဲ့အတော်လေး ဒုက္ခရောက်ရတယ်""လို့ခရီးသွားပြည်သူတစ်ဦးကပြောပါတယ်။
