ဒိုက်ဦးအကျဉ်းထောင်မှာ နိုင်ငံရေးအကျဉ်းသူတွေ ကို အကျဉ်းထောင်အလုပ်တွေစေခိုင်းနေပြီး လုပ်ကိုင်ဖို့ ငြင်းဆန်သူတွေ ကို ထောင်အာဏာပိုင်တွေက ပါဆယ်ပို့ခွင့် ပိတ်ပင်ခြင်းနဲ့ တိုက်ပိတ်အကျဉ်းချခြင်းတွေ ပြုလုပ်နေတယ်လို့ နိုင်ငံရေးအကျဉ်းသူများအဖွဲ့( WOPP)က အောက်တိုဘာ ၂၇ရက်မှာ ထုတ်ပြန်ပါတယ်။

 

၎င်းအကျဉ်းထောင်မှ အမျိုးသမီး နိုင်ငံရေးအကျဉ်းကျသူတွေ ကို အကျဉ်းထောင်အလုပ်တွေ ဖြစ်တဲ့ စိုက်ပျိုးရေးလုပ်ငန်းလုပ်ကိုင်ခိုင်းခြင်း၊ချိုးရေအသုံးပြုတဲ့ရေကန် တွေကို သန့်ရှင်းရေးလုပ်ခိုင်းခြင်း၊ ရေကန်စောင့် (ဘာယာ)ပြုလုပ်ခြင်း၊အကျဉ်းထောင်ဝန်ထမ်းတွေ အသုံးပြုတဲ့ မိလ္လာသန့်ရှင်းရေးအပါအဝင် ထောင်အာဏာပိုင်တွေရဲ့ ဝေယျာဝိစ္စရပ်တွေကိုပါ အလုပ်ခိုင်းစေနေတယ်လို့ နိုင်ငံရေးအကျဉ်းသူများအဖွဲ့( WOPP)ထံမှ သိရပါတယ်။

 

အခုလို အလုပ်ခိုင်းစေမှု ကို ငြင်းဆန်တဲ့ နိုင်ငံရေးအကျဉ်းသူတွေကို စက်တင်ဘာလ က စပြီး နှစ်ပတ်တခါ အကျဉ်းထောင်အတွင်း ပို့ဆောင်ခွင့်ရတဲ့ ပါဆယ် ကို ဟင်း၂မျိုး ကော်ဖီ ၇ထုပ် ခေါက်ဆွဲ ၅ထုပ်သာ ပေးပို့ခွင့်ပြုတယ်လို့ ဆိုပါတယ်။

 

ဒါ့အပြင် နိုင်ငံရေးအကျဉ်းသူ တွေ အနေနဲ့ မိသားစု နဲ့ထောင်ဝင်စာ တွေ့ဆုံတဲ့အခါ အလွန်အမင်း တင်းကြပ်ထားရှိပြီး မိသားစု တွေကို အကျဉ်းထောင်အတွင်း နေထိုင်မှု တွေ အကြောင်း ပြောပြတဲ့ နိုင်ငံရေးအကျဉ်းသူ တွေကို တိုက်ပိတ်အကျဉ်းချထားကြောင်း သိရှိရပါတယ်။

 

အကျဉ်းထောင် ဥပဒေအရ နိုင်ငံရေးအကျဉ်းသားများကို အလုပ်ကြမ်းခိုင်းစေခြင်းမပြုရကြောင်း၊တရားရုံးအမိန့်စာတွင် အလုပ်ကြမ်းနှငိ့ထောင်ဒဏ်ပါမှသာခိုင်းစေနိုင်ကြောင်း သိရပါတယ်။

 

စစ်အာဏာသိမ်းပြီးနောက်ပိုင်း နိုင်ငံတဝန်းရှိ အကျဉ်းထောင်တွေမှာ နိုင်ငံရေးအကျဉ်းသား/သူ များ ကို ဖိနှိပ်မှုမျိုးစုံ ပြုလုပ်သလို ကျန်းမာရေး ချို့တဲ့ပါကလည်း လုံလောက်စွာ ဆေးကုသခွင့်မရခြင်းအချိန်မှီဆေးကုသမှုမရခြင်းတို့ကြောင့် သေဆုံးမှုများရှိရာ ၂၀၂၅ခုနှစ်၊ ဇန်နဝါရီလမှ အောက်တိုဘာလအထိ ကျဆုံးခဲ့ရတဲ့ နိုင်ငံအကျဥ်းသား ၂၈ ဦးအထိရှိကြောင်းမြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် ရဲ့ထုတ်ပြန်ချက်အရသိရပါတယ်။