ဒလတံတား စီမံကိန်းရှိ ရေလယ်ပင်မတံတားမှ Form Traveler ဖြုတ်သိမ်းခြင်းလုပ်ငန်းတွေ ကို စက်တင်ဘာ ၁၇ ရက်နေ့မှ၂၀ရက်အထိ ဆောင်ရွက်မှာ ဖြစ်တဲ့ အတွက် လုပ်ငန်းများဆောင်ရွက်နေစဉ် သတ်မှတ်ထားတဲ့ ဧရိယာအတွင်း မည်သည့်ရေယာဉ်မျှ ဖြတ်သန်းခြင်းမပြုဖို့ မြန်မာ့ဆိပ်ကမ်းအာဏာပိုင်က အသိပေးထုတ်ပြန်ထားပါတယ်။
မြန်မာ-ကိုရီးယား ချစ်ကြည်ရေးအထိမ်းအမှတ်တံတားတစ်စင်းဖြစ်တဲ့ ရန်ကုန်-ဒလ တံတား ရေလယ်ပင်မတံတားသံမဏိဆိုင်းကြိုး တပ်ဆင်ခြင်းလုပ်ငန်း ကို ၂၀၂၅ ခုနှစ် ဩဂုတ်လကုန် ပိုင်းမှာ တပ်ဆင်ပြီးစီးခဲ့ကာ ယခုအခါ ရေလယ်ပင်မတံတားသံမဏိဆိုင်းကြိုးများ တပ်ဆင်ခြင်းလုပ်ငန်းမှာ အသုံးပြုခဲ့တဲ့ Form Traveler ဖြုတ်သိမ်းခြင်းလုပ်ငန်းစဉ် ကို ၂၀၂၅ ခုနှစ် စက်တင်ဘာ ၁၇ ရက်မှ ၂၀ ရက်အထိ ဆောင်ရွက်မှာ ဖြစ်တယ်လို့ ဆိုပါတယ်။
ဖြုတ်သိမ်းခြင်းလုပ်ငန်းများဆောင်ရွက်နေစဉ်အတွင်း စက်တင်ဘာလ (၁၇) ရက်နေ့၊ နံနက် (၈) နာရီမှ (၁၈) ရက် နံနက် (၈) နာရီအထိလည်းကောင်း၊ စက်တင်ဘာလ (၁၉) ရက် နံနက် (၈) နာရီမှ (၂၀) ရက် နံနက် (၈)နာရီအထိလည်းကောင်း မည်သည့်ရေယာဉ်မျှ ဖြတ်သန်းခုတ်မောင်းသွားလာခြင်း မပြုဖို့ ရေကြောင်းသတိပေးချက် ထုတ်ပြန်ထားပါတယ်။
ဒလတံတားကို စီမံကိန်း ကို ယခုနှစ်ဒီဇင်ဘာမှာ အပြီးဆောင်ရွက်မယ်လို့ စစ်ကောင်စီရဲ့ ပို့ဆောင်ရေးနှင့်ဆက်သွယ်ရေးဝန်ကြီးဌာနက ထုတ်ပြန်ထားပါတယ်။
