၂၀၂၅ ခုနှစ် ပြက္ခဒိန်နှစ်တွင် နိုင်ငံတကာနှစ်သစ်ကူးနေ့နဲ့ တရုတ်နှစ်သစ်ကူးနေ့တို့ ကို အများပြည်သူအလုပ်ပိတ်ရက်အဖြစ် သတ်မှတ်ထားတယ်လို့ ဇူလိုင်လ ၈ရက် တွင် စစ်ကောင်စီ က ထုတ်ပြန်ကြေညာ လိုက်ပါတယ်။

ထိုသို့ ထုတ်ပြန်ရာ မှာ မြန်မာနိုင်ငံသည် နိုင်ငံတကာ မိသားစုဝင် နိုင်ငံတနိုင်ငံ ဖြစ်သည်နှင့်အညီ နိုင်ငံအများစုတွင် အများပြည်သူ အလုပ်ပိတ်ရက်အဖြစ် သတ်မှတ်တဲ့ ဇန်နဝါရီ လ ၁ရက်နေ့ နိုင်ငံတကာ နှစ်သစ်ကူးနေ့ ကို အများပြည်သူပိတ်ရက်အဖြစ် သတ်မှတ်တယ်လို့ သိရပါတယ်။

ဒါ့အပြင် တရုတ် နှစ်သစ်ကူးနေ့ကိုလည်း ဒေသအတွင်း အခြား အာဆီယံ နိုင်ငံများကဲ့သို့ လည်းကောင်း အချို့သော ကမ္ဘာ့နိုင်ငံများ ကဲ့သို့ လည်းကောင်း အိမ်နီးချင်း မိတ်ဖက်နိုင်ငံ ဖြစ်တဲ့ တရုတ်နိုင်ငံ နဲ့ ဆွေမျိုးပေါက်ဖော် ချစ်ကြည်ရင်းနှီးမှု ကို ပိုမို ခိုင်မာစေတဲ့ အနေ နဲ့ လည်းကောင်း မြန်မာနိုင်ငံ၏ အများပြည်သူ အလုပ်ပိတ်ရက်အဖြစ် သတ်မှတ်တယ်လို့ သတင်းထုတ်ပြန်ချက်မှာဖေါ်ပြထားပါတယ်။

တရုတ်နှစ်သစ်ကူး ကို အများပြည်သူရုံးပိတ်ရက် အဖြစ်သတ်မှတ်ပေးတဲ့ အပေါ် ရန်ကုန်ရှိ တရုတ်သံရုံးကသံရုံးရဲ့ လူမှုကွန်ယက်စာမျက်နှာ မှာ အခုလို ရေးသားထားပါတယ်။

"၂၀၂၃ ခုနှစ်နှင့် ၂၀၂၄ ခုနှစ်တွင် မြန်မာနိုင်ငံအကြီးအကဲ ဗိုလ်ချုပ်မှူးကြီးမင်းအောင်လှိုင် မှာ မြန်မာနိုင်ငံ တရုတ်နွယ်ဖွားလောကနှင့် မြန်မာနိုင်ငံဆိုင်ရာ တရုတ်သံရုံးက ရန်ကုန်မြို့၌ အတူတကွကျင်းပသည့် တရုတ်နှစ်သစ်ကူး နွေဦးပွဲတော် ဂုဏ်ပြုအခမ်းအနားအား တက်ရောက်ခဲ့တယ်"လို့ဆိုပါတယ်။

အဆိုပါအခမ်းအနားမှာ မြန်မာနိုင်ငံဆိုင်ရာတရုတ်သံအမတ်ကြီး Mr. Chen Hai က ဗိုလ်ချုပ်မှူးကြီး မင်းအောင်လှိုင်နှင့် တရုတ်နှစ်သစ်ကူးနေ့အား မြန်မာနိုင်ငံ အများပြည်သူအလုပ်ပိတ်ရက်အဖြစ် သတ်မှတ်ရန် ကိစ္စရပ်များနှင့်စပ်လျဉ်းပြီး ဆွေးနွေးခဲ့တယ်လို့ ရေးသားထားပါတယ်။

Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
Twitter Link - https://twitter.com/mm_labournews
Gmail Link- myanmarlabournews@gmail.com