စုံရက် မရက် ခွဲပြီး ယာဉ်မောင်းခွင့်ပေးသည့် စနစ်ကို မလိုက်နာသည့် ယာဉ်မောင်းသူ တွေကို ၂၀၂၀ ယာဉ်အန္တရာယ် ကင်းရှင်းရေးနှင့်မော်တော်ယာဉ်စီမံခန့်ခွဲမှုဥပဒေပုဒ်မ ၉၆ ဖြင့် အရေးယူမှု စတင်ပြုလုပ်ပြီး ဒဏ်ကြေးငွေ သုံးသောင်းကျပ် ပေးဆောင်ခိုင်းထားတယ်လို့ ယာဉ်မောင်းသူအချို့ ထံမှ သိရပါတယ်။
စက်သုံးဆီချွေတာရေး အတွက် အိမ်စီးကားများ အပါအဝင် ယာဉ်အချို့ကို စုံရက် မရက် ခွဲခြား၍ တစ်ရက်စီ မောင်းနှင်ရမည့် စနစ် ကို မတ်လ ၇ရက်မှာ စတင် အသုံးပြုမယ်လို့ စစ်ကော်မရှင်က ကြေညာပြီး မတ်လ ၁၄ရက်မှာတော့ စည်းကမ်းချိုးဖောက်သူတွေကို ပြစ်ဒဏ်ပေးမှုစတင်ပြုလုပ်ခဲ့တယ်လို့ သိရပါတယ်။
ပြစ်ဒဏ်ပေးမှု ကို ယခင်က ရာဇသတ်ကြီးပုဒ်မ၁၈၈ အရ အလုပ်မဲ့ထောင်ဒဏ်၁လ ၊ငွေဒဏ် ကျပ်၂သောင်း ၊သို့မဟုတ် ဒဏ်နှစ်ရပ်လုံး ကျခံရမယ်လို့ သတင်းတွေ ထွက်ပေါ်ခဲ့ပေမယ့် လက်ရှိမှာတော့ ၂၀၂၀ ယာဉ်အန္တရာယ် ကင်းရှင်းရေးနှင့်မော်တော်ယာဉ် စီမံခန့်ခွဲမှုဥပဒေ ပုဒ်မ ၉၆ ဖြင့် သာ အရေးယူမှု ပြုလုပ်တယ်လို့ သိရပါတယ်။
"" ပညာပေးကာလ ပြီးကတည်းက လမ်းမကြီး တွေမှာ ယာဉ်ထိန်းရဲတွေ အဖွဲ့စုံ ဘဲ ဖမ်းတာ သတ်မှတ်ရက် အတိုင်းထွက်မထွက် စစ်ဆေးတာ များတယ် အရေးယူတာ တော့ ပုဒ်မ ၉၆ နဲ့ အရေးယူတာ ချလန် ဖြတ်ပြီး ယာဉ်ထိန်းရုံးကို သွား ပြီး ဒဏ်ငွေ ၃သောင်းကျပ် ဆောင်ခိုင်းတယ် ထောင်ဒဏ် တော့မပါဘူး ""လို့ရန်ကုန်မှ ယာဉ်မောင်းတစ်ဦးကပြောပါတယ်။
၂၀၂၀ ယာဉ်အန္တရာယ် ကင်းရှင်းရေးနှင့်မော်တော်ယာဉ် စီမံခန့်ခွဲမှုဥပဒေ ပုဒ်မ ၉၆ ဆိုတာ မှာ မည်သူမဆို နည်းဥပဒေ၊စည်းမျဉ်းနှင့်စည်းကမ်းများ၊အမိန့်တို့ပါ တားမြစ်ချက် တစ်ရပ်ရပ်ကို ဖောက်ဖျက်ကျူးလွန်ကြောင်း(သို့မဟုတ်)လိုက်နာရန် ပျက်ကွက်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ကျပ်သုံးသောင်းထက်မပိုသော ဒဏ်ငွေချမှတ်ရမည်ဟု ပြဌာန်းထားကြောင်း သိရပါတယ်။
Photo-CJ
