ပြင်ပလက်လီဝယ်ယူရတဲ့စားအုန်းဆီဈေးကွက်ဟာ တစ်ပိဿာကိုကျပ်တစ်သောင်းနှစ်ထောင်ထိပေါက်ဈေးရှိနေတယ်လို့ဝယ်ယူတွေကပြောပါတယ်။အခုဈေးနှုန်းဟာ သင်္ကြန် ( ဧပြီလ) က တပိဿာဈေးနှုန်း ကျပ် ၇၀၀၀ ကနေ ဆက်လက်မြင့်တက်ပြီး ဈေးတက်လာတာဖြစ်ပါတယ်။
လက်ရှိမှာစာအုန်းဆီဟာဝယ်ယူရခက်ခဲနေပြီးပြတ်လပ်မှုရှိနေတယ်လို့သတင်းတွေထွက်ပေါ်နေပါတယ်။
ခွဲတမ်းနဲ့ထုတ်ယူရတဲ့ဆီကတ်တွေလည်းလက်ရှိမှာပုံမှန်မရတော့ဘူးလို့ပြည်သူတွေကပြောပါတယ်။
"ဒီမနက်ဝယ်တာပါတစ်ဆယ်သားကို(၁၂၀၀)ပေးရပါတယ်။အရင်ရောင်းပေးတဲ့အိမ်ဆိုင်လေးမှာဆီမရှိလို့ ဈေးထဲထိသွားဝယ်ထားရတယ်"လို့ဇွန်လ၅ရက်မှာစားဆီဝယ်ယူခဲ့သူတစ်ဦးကပြောပါတယ်။
ပြည်သူတွေနေ့စဉ်မရှိမဖြစ်သုံးစွဲနေရတဲ့ စားဆီဟာ ပြည်တွင်းမှာခွဲတမ်းနဲ့ရောင်းချနေတာဖြစ်ပြီးနေ့စဉ်ပေါက်ဈေးထုတ်ပြန်ချက်အရတော့ကျပ်(၆၀၀၀) အောက်သာရှိနေပါတယ်။
"အရင်ကဆို တစ်ပတ်ကို နှစ်ခါလောက်ရတယ်။ ပြီးခဲ့တဲ့အပတ်ကစပြီး တစ်ပတ်တစ်ခါပဲ ရတယ်။ ဒီအပတ်ဆို လုံးဝမရသေးဘူး။ ဆီပြတ်နေတယ်လည်းကြားမိတယ်။ တစ်သောင်းနှစ်ထောင်ဈေးနဲ့ ဝယ်စားရမယ်ဆိုရင်တော့ မလွယ်ဘူး"လို့ အိမ်ရှင်မတစ်ဦးက ပြောပါတယ်။
ပြည်တွင်းမှာစားအုန်းဆီရောင်းချတာကိုတစ်အိမ်ထောင်ကိုဆီငါးဆယ်သားနှုန်းနဲ့ဝယ်ယူခွင့်ပြုနေတာပါ။ဒီလိုဝယ်ယူခွင့်အတွက်ရာအိမ်မှူးတွေက ဆီကတ်တွေ ထုတ်ပေးပြီး ရပ်ကွက်တစ်ချို့မှာတော့ အပတ်စဉ် ရရှိနေပေမယ့် အများစုက ရရှိမှုနည်းနေပါတယ်။
"သူတို့ကရှောင်တခင်လာစစ်တယ်။အရပ်ဝတ်နဲ့။ဈေးရုံထဲရောင်းတာမိသွားတော့တစ်ဈေးလုံးလက်မှတ်ထိုးရတယ်။ခိုးမရောင်းပါဘူးပေါ့။နောက်တခါမိရင်ထောင်ချမယ်။ဆိုင်သိမ်းမယ်လည်းပြောတယ်"လို့စည်ပင်သာယာဈေးအတွင်းဆိုင်ဖွင့်လှစ်ရောင်းချသူတစ်ဦးကပြောပါတယ်။
ဇွန်လ(၅)ရက်နေ့မှာစားအုန်ဆီတစ်ပိဿာပေါက်ဈေးကို( ၅၃၄၅)ကျပ်သာသတ်မှတ်ထားပြီးပြင်ပပေါက်ဈေးကတော့နှစ်ဆကျော်နီးပါးမြင့်တက်နေပါတယ်။
