စားသုံးသူလက်လီဈေးကွက်အတွင်း ကြက်သားဈေးက ၁ ပိဿာကို ငွေကျပ် ၁၅၀၀၀ နှုန်းဈေးတန်းအထိမြင့်တက်နေတာကြောင့် အသားစားသုံးမှုအတွက် ယခင်ကဈေးအတန်ဆုံးဖြစ်တဲ့ကြက်သားကိုပင် လခနည်းလုပ်သားပြည်သူတွေ မစားနိုင်တဲ့အခြေအနေဖြစ်နေကြောင်း စားသုံးသူဈေးကွက်ကနေသိရပါတယ်။
"ကြက်သားကပုံမှန်ဆိုဈေးတက်ရင်တစ်ပိဿာ ၁၂၀၀၀ ကျပ်လောက်ပဲအခုဟာကလွန်တယ်။ အသားစားဖို့အတွက်က တစ်ခြားအသားတွေထက်ကြက်သားကသက်သာတော့ အသားစားမယ်ဆိုရင် ကြက်သားကိုပဲစဉ်စားမိတာ အခုလိုဈေးတက်နေပုံနဲ့ကတော့ ကြက်သားတောင် နပ်မမှန်တော့မလိုဖြစ်နေပြီလို့" မြောက်ဒဂုံမြို့နယ်ရှိ အိမ်ရှင်မတစ်ဦးကပြောပါတယ်။
ကြက်သားဈေးကအဆမတန်မြင့်တက်နေပေမယ့် ကြက်မွေးမြူသူတွေရောင်းချနေတဲ့ဈေးတန်းဖြစ်တဲ့လက်ကား ကြက်ခြံဖမ်းဈေး နှုန်းကတော့( ကြက်နီမ) တစ်ပိဿာကို ငွေကျပ် ၇၃၀၀ - ဒိုင်ရောင်းဈေး ၈၂၀၀ နှုန်းပဲရှိနေသေးတာကြောင့် မြင့်တက်နေတဲ့လက်လီဈေးများအတွင်းက ကြက်သားဈေးက ခြံဖမ်းဈေးထက် ဈေးနှုန်း နှစ်ဆကျော်မြင့်နေတာဖြစ်ကြောင်း ကြက်မွေးမြူရေးလုပ်ကိုင်နေတဲ့ မွေးမြူရေးလုပ်နေသူတွေထံကသိရပါတယ်။
" ကြက်ဈေးကတက်သာတက်တာပါ ။ တစ်ကယ်တမ်းတော့ ခြံဖမ်းဈေးကအဲ့လောက်မရှိဘူး ။ ခုတ်သားဈေးကတက်တော့ ကြက်ဈေးတက်တာက ကြက်သားရောင်းတဲ့ကုန်သည်တွေပဲ အမြတ်ကြီးစားဖြစ်နေတာ တစ်ကယ်အပင်ပန်းခံပြီးအစာဖိုး ၊ ဆေးဖိုး စရိတ်တွေအကုန်ကျခံမွေးတဲ့သူတွေကတော့ စားတဲ့သူဈေးကွက်မှာကြက်ဈေးတက်ပေမယ့် ဈေးတက်တဲ့အကျိုးကိုမခံစားရပါဘူး ။ မွေးတဲ့သူတွေအနေနဲ့က ကြက်ဈေးကိုအဆမတန်တက်သွားစေဖို့လည်းမလိုလားပါဘူး ။ ကုန်သည်နဲ့မွေးမြူသူကြားက ဈေးနှစ်ဆလောက်ကွာနေတာကိုပဲသဘောမတွေ့ကြတာပါ။ ကုန်သည်တွေအနေနဲ့အမြတ်ကြီးစားလွန်းတယ်လို့ပဲမြင်ပါတယ်"လို့ ကြက်မွေးမြူသူတစ်ဦးကပြောပါတယ်။
ပုံမှန်အားဖြင့် ကြက်သားဈေးတက်မှုဟာ အလှူမင်္ဂလာပွဲများပြုလုပ်မှုများတဲ့ ပွင့်လင်းရာသီအချိန်များတွင်ဖြစ်တတ်လေ့ရှိပြီး ယခုကဲ့သို့မိုးရာသီမှာတော့ ကြက်သားဈေးတည်ငြိမ်နေတတ်တဲ့ သဘောရှိပေမယ့် လက်ရှိမှာတော့ ဈေးတည်ငြိမ်ရမယ့်အစား ကြက်သားဈေးမြင့်တက်မှုနဲ့စားသုံးသူတွေကြုံတွေ့နေရတာလည်းဖြစ်ပါတယ်။
