မြန်မာ့ရိုးရာ တန်​ဆောင်တိုင် ကထိန်ရာသီမှာ ကထိန်အလှူအတွက်  ​လော်စပီကာ နဲ့ ဆောင်းဘောက်တွေအသုံးပြုရာမှာလိုအပ်တာထက်ပိုမိုအသုံးပြုနေပြီး ဆူညံသံတွေကြောင့်စိတ်အနှောက်အယှက်တွေဖြစ်နေရတယ်လို့ပြည်သူတွေကပြောပါတယ်။ 

လက်ရှိမှာကထိန်အတွက်အလှူခံတာကိုအကြောင်းပြုပြီးအုပ်စုဖွဲ့အလှူခံထွက်တာ၊ သီချင်းတွေကျယ်လောင်စွာဖွင့်ပြီးကခုန်ပြတာ၊ သရုပ်ပျက်ဝတ်စားဆင်ယင်တာတွေနဲ့အလှူခံတာတွေလုပ်ဆောင်နေကြတာပဲဖြစ်ပါတယ်။ 

"အထိန်းအကွပ်မရှိဘူး။အင်္ဂလိပ်သီချင်းတွေကော၊မြန်မာ‌ ​ခေတ်‌​ပေါ်သီချင်းတွေကောကိုဖွင့်ချင်သလိုဖွင့်တယ်။ကကြတယ်။နတ်သီချင်းတွေလည်းပါတယ်။ဘေးတွဲဂါလီတွေနဲ့ကောကားနဲ့ပါပတ်ခံတာ။ပြဿနာက‌သူတို့ဆောင်းဘောက်သံကမခံနိုင်လောက်အောင်ဖြစ်နေတာ။နေ့ခင်းနေ့လည်းဆိုအသံကျယ်ကြီးတွေနဲ့လန့်တယ်။နောက်သရုပ်ပျက်ကပြတာနဲ့ကထိန်အတွက်အလှူခံတာတကယ်အမြင်မတင့်တယ်ဘူး"လို့ ရန်ကုန်၊ ​လှိုင်သာယာမြို့နယ်ရှိ ရပ်ကွက်နေပြည်သူတစ်ဦးကပြောပါတယ်။ 

အသံဆူညံတာ​ကြောင့် က​လေး​မွေးဖွားထားတဲ့ မိခင်​တွေ၊ ကိုယ်ဝန်​ဆောင်​တွေ၊ က​​​လေးငယ်​တွေနဲ့ အသက်ကြီးပိုင်း​တွေ အခက်အခဲဖြစ်​နေကြရလို့ အချိန် ကန့်သတ်ချက် ဒါမှမဟုတ် အဆမတန် ဆူညံ​အောင် မဖွင့်ဖို့ ​ပြောဆိုမှု​တွေရှိ​နေပါတယ်။ 

"ဖွင့်​နေတဲ့သီချင်း​တွေက အလှူနဲ့လည်း မသက်ဆိုင်ဘူး။ လမ်းတိုင်းလမ်းတိုင်းမှာ ဖွင့်ပြီးအလှူခံတာ​တွေ ​​၊ လော်စပီကာ​တွေငှားတာက  ကုန်ကျစရိတ်​တောင် များ​သေးတယ်၊ အဲ့ဒီလို ငှားမယ့် ပိုက်ဆံကိုလှူလို့ရတာပဲ ပြီး​တော့ အခုလုပ်ရပ်​တွေက ဗုဒ္ဓဘာသာဝင်​တွေရဲ့ လုပ်ရပ်မဟုတ်ဖူး" လို့ ဆူညံသံ​တွေနဲ့ပတ်သက်လို့ ရန်ကုန်မြို့​နေ ပြည်သူတစ်ဦးက မှတ်ချက်​ပေးပါတယ်။  

ပြည်သူတွေကိုကထိန်အလှူခံရာမှာအုပ်ချုပ်ရေးမှူးတွေကတစ်ဆင့်ဆိုင်တွေကိုအလှူခံထည့်ဖို့လိုက်ပြောတာ၊ အဆောင်ပိုင်ရှင်တွေကိုကထိန်အလှူခံထည့်ခိုင်းတာတွေလည်းရှိနေပါတယ်။ 

"အုပ်ချုပ်ရေးမှူးကလိုက်ကောက်တယ်။စေတနာရှိသလောက်ထည့်ပါပြောတယ်။နောက်အဆောင်ပိုင်ရှင်တွေကိုထွေအုပ်ရုံးမှာအစည်းအဝေးခေါ်ပြီးတစ်ဆောင်နှစ်သောင်းနှုန်းလှူခိုင်းတယ်ကြားတယ်"လို့ရွှေပြည်သာမြို့နယ်နေပြည်သူတစ်ဦးကပြောပါတယ်။ 

ပြည်သူအများစုဟာကုန်ဈေးနှုန်းတွေအဆမတန်မြင့်တက်နေတာကြောင့်စားဝတ်နေရေးအခက်အခဲဖြစ်ပေါ်နေပါတယ်။ဒီအချိန်မှာကထိန်အလှူခံတွေအလွန်အကျွံလုပ်ဆောင်နေတာလည်းမသင့်တော်ဘူးလို့ဝေဖန်တာတွေရှိနေပါတယ်။