ပြည်ပမှ စားအုန်းဆီတင်သွင်းရာမှာ မသမာမှု ကျူးလွန်ခဲ့သည်ဆိုကာ စီပွားရေးမှာထိပ်တန်းလုပ်ငန်းရှင် ဖြစ်တဲ့ ဧရာဟင်္သာ ကုမ္ပဏီ အပါအဝင် ကုမ္ပဏီ ၈ ခုကို အမည်ပျက်စာရင်း (Blacklist) သွင်းလိုက်တယ်လို့ စစ်ကောင်စီလက်အောက်ခံ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA)က အသိပေးကြေညာလိုက်ပါတယ်။
"ခုရက်ပိုင်းစီးပွားရေးလုပ်ငန်းရှင်တွေကို ဖမ်းတာစစ်ဆေးတာတွေပြင်းပြင်းထန်လုပ်လာတယ်ပေါ့။ စက်သုံးဆီလည်းစစ်ဆေးနေတယ်ကြားတယ်။ ရွှေရော ငွေရေးကြေးရေးကုမ္ပဏီလုပ်ငန်းရှင်တွေရော ဆန်လုပ်ငန်းရှင်ရော စုံနေပြီ။ ဒီလုပ်ငန်းတွေကိုအဓိကထားလုပ်နေတယ်ထင်ပါတယ်။ စျေးကျမလားဆိုတာတော့စောင့်ကြည့်ရမှာပေါ့" လို့ လုပ်ငန်းရှင်တစ်ဦးက ဆိုပါတယ်။
စားအုန်းဆီတင်သွင်းရာမှာ မသမာဘူးဆိုတဲ့အကြောင်းပြချက်နဲ့ အမည်ပျက်စာရင်းသွင်းခံရတဲ့ကုမ္ပဏီများမှာ ထိပ်တန်းကုမ္ပဏီဖြစ်တဲ့ Ayeyar Hanthar နဲ့အခြားကုမ္ပဏီတွေဖြစ်တဲ့ Six Winner Brothers, Diamond Dragon, First Top Edible Oil, Thein Than Yadanar, Jewel Arrow, Agri One Trading၊ Grand Unity တို့ကို ဇွန်၂၄ရက်နေ့ကစပြီး အမည်ပျက်စာရင်းအဖြစ်သတ်မှတ်လိုက်ကြောင်း ကြေငြာလိုက်တာပဲဖြစ်ပါတယ်။
ထိပ်တန်းကုမ္ပဏီဖြစ်တဲ့ Ayeyar Hanthar ကုမ္ပဏီဟာ ဦးဇော်ဝင်းရှိန်ပိုင်ဆိုင်တာဖြစ်ပြီး A Bank နှင့် ဧရာဟင်္သာလုပ်ငန်းစု ပိုင်ဆိုင်သူဖြစ်ပြီး ဆက်သွယ်ရေးအော်ပရေတာ အူရီဒူးမြန်မာကို ပြန်လည်ဝယ်ယူထားတဲ့ ထိပ်တန်းကုမ္ပဏီလည်းဖြစ်ပါတယ်။
အဆိုပါကုမ္ပဏီ ၈ ခုကို မြန်မာနိုင်ငံကုမ္ပဏီများဥပဒေ နည်းဥပဒေသတ်မှတ်ချက်များကို မလိုက်နာခြင်းကြောင့် အမည်ပျက်စာရင်းသွင်းလိုက်ခြင်းဖြစ်တယ်လို့ဆိုထားပြီး DICA ၏ အွန်လိုင်းမှတ်ပုံတင်စနစ်တွင် မှတ်ပုံတင်ထားတဲ့ ကုမ္ပဏီများအနေနဲ့ မြန်မာနိုင်ငံကုမ္ပဏီများဥပဒေပါ ပြဋ္ဌာန်းချက်များကို လေးစားလိုက်နာရမည်၊ မိမိတို့လုပ်ကိုင်ဆောင်ရွက်နေသည့် လုပ်ငန်းနှင့်သက်ဆိုင်သော ဌာနဆိုင်ရာနှင့် အဖွဲ့အစည်းများက ချမှတ်ထားသည့် အခြားတည်ဆဲဥပဒေနှင့် နည်းဥပဒေများကို လိုက်နာရမှာဖြစ်တယ်လို့လည်း ထုတ်ပြန်ချက်မှာထည့်သွင်းအသိပေးထားပါသေးတယ်။
ကုမ္ပဏီ၈ခုကို အမည်ပျက်စာရင်းသွင်းကြောင်းအသိပေးကြေညာပေမဲ့ မည်သို့မည်ပုံ အရေးယူမည်ကိုတော့ အသေးစိတ်ထည့်သွင်းထုတ်ပြန်ထားခြင်းမရှိပါဘူး။
စားအုန်းဆီ အခြေခံလက်ကားဈေးကို ယခုတစ်ပတ်တာ ဇွန်၃၀ရက်အထိ တစ်ပိဿာလျှင်၅၄၀၀ကျပ်ဖြစ်တယ်လို့ သတ်မှတ်ထားပေမဲ့ ပြင်ပပေါက်ဈေးတွင် တစ်ပိဿာလျှင် ကျပ် ၁၂,၀၀၀ အထိ မြင့်တက်နေပြီး စားဆီဝယ်ယူရရှားပါးနေတယ်လို့သိရပါတယ်။
