မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများ အဖွဲ့ချုပ် MICS - TUsF Myanmar အထွေထွေအတွင်းရေးမှူးချုပ် ကိုသက်နှင်းအောင်ဟာ ထောင်တွင်းနှိပ်စက်ခံရမှုကြောင့် ဦး ခေါင်းဒဏ်ရာရရှိထားတယ်လို့ သိရပါတယ်။
ပြီးခဲ့တဲ့ရက်ပိုင်းက အကျဉ်းသားတွေရဲ့အခွင့်အရေးဆုံးရှုံးမှုတွေနဲ့ပတ်သက်ပြီး အဖွဲ့အစည်းတစ်ခုက ထောင်တွင်းသို့ဝင်ရောက်စစ်ဆေးစဉ် ထုတ်ဖော်ပြောဆိုမှုကြောင့် အလုပ်သမားရေးဆောင်ရွက်သူ အလုပ်သမားခေါင်းဆောင် သက်နှင်းအောင်အပါအဝင်နိုင်ငံရေးအရ မတရားအကြမ်းဖက်ဖမ်းဆီးခံထားရတဲ့ အကျဉ်းသား ၃ ဦးကို ထောင်တွင်းရိုက်နှက် နှိပ်စက်ပြီး တိုက်ပိတ်ထားတယ်လို့ သိရပါတယ်။
“ဦးခေါင်းမှာ ဒဏ်ရာရထားတယ်လို့ ကြားထားပေမဲ့ ဒဏ်ရာရဲ့အခြေအနေကိုတော့ အတိအကျမသိရသေးပါဘူး။ ထောင်တွင်းမှာ အကျဉ်းသားတွေရဲ့ အခွင့်အရေးဆုံးရှုံးမှုတွေကို ဝင်စစ်ဆေးတဲ့ အဖွဲ့တစ်ခုကိုပြောလို့ဆိုပြီး နှိပ်စက်ခံရတာလို့ သိရပါတယ်။
ကျွန်တော်တို့ဒီလိုဆိုးရွားတဲ့ လုပ်ရပ်ကိုလုံးဝလက်ခံဖို့လည်း မရှိပါဘူး။ ပြီးတော့ ကျွန်တော်တို့ရဲ့ပြည်တွင်းပြည်ပမိတ်ဖက်အဖွဲ့အစည်းတွေကိုလည်း အကြောင်းကြားထားပြီးဖြစ်ပါတယ်။ စစ်တပ်အနေနဲ့လည်း အခုလိုအခွင့်အရေးချိုးဖောက်မှုတွေကြောင့် အရေးယူပိတ်ဆို့မှုတွေကို ဆက်လက်ရင်ဆိုင်လာရလိမ့်မယ်ထင်ပါတယ်” လို့ MICS မှ အဖွဲ့ဝင်တစ်ဦးက ဆိုပါတယ်။
၂၀၂၁ ခုနှစ်၊ ဇွန်လထဲမှာ စစ်ကောင်စီက ကိုသက်နှင်းအောင်ကို ဖမ်းဆီးပြီး မတရားအသင်း ဆက်သွယ်မှု ပုဒ်မ ၁၇(၁)နဲ့ တရားစွဲဆိုကာ အလုပ်ကြမ်းနဲ့ ထောင် ၂ နှစ် ချခဲ့တာဖြစ်ပါတယ်။
အဲဒီနောက် ၂၀၂၃ ခုနှစ်၊ ဇွန်(၂၆)ရက်မှာ ကိုသက်နှင်းအောင် ထောင်က လွတ်မြောက်ခဲ့ပေမဲ့ အဲဒီလွတ်မြောက်ခဲ့တဲ့နေ့မှာတင်ပဲ စစ်ကောင်စီက ပြန်လည်ဖမ်းဆီးခဲ့ပြီး ကိုသက်နှင်းအောင်ကို စစ်ကောင်စီက ၅၂/က နဲ့ တရားစွဲဆိုပြီး အလုပ်ကြမ်းနဲ့ ထောင်ဒဏ် ၇ နှစ်ထပ်မံချမှတ်ခဲ့တာလို့ နီးစပ်သူတွေဆီက သိရပါတယ်။
"သိပ်မကြာခင် အပြည်ပြည်ဆိုင်ရာအလုပ်သမားညီလာခံမှာ မြန်မာကိုအရေးယူဖို့လုပ်နေတဲ့ ကိစ္စရပ်တွေရှိနေတာဖြစ်လို့ ယခုလိုအလုပ်သမားခေါင်းဆောင်ကို နှိပ်စက်မှုတွေကြောင့် နိုင်ငံတကာရဲ့ အရေးယူပိတ်ဆို့မှုတွေကို စစ်ကောင်စီအနေနဲ့ မလွဲမသွေရင်ဆိုင်ရတော့မှာဖြစ်တယ်လို့လည်း MICS အဖွဲ့ဝင်ကဆိုပါတယ်။
အလုပ်သမားခေါင်းဆောင် ကိုသက်နှင်းအောင်ကို နယ်သာလန်နိုင်ငံကလည်း လူထုထောက်ခံတဲ့ လှုပ်ရှားမှုပြုလုပ်ခဲ့ပြီး ချွင်းချက်မရှိပြန်လည်လွှတ်ပေးဖို့ တောင်းဆိုမှုကမ်ပိန်းတွေပြုလုပ်ခဲ့တယ်လို့လည်း သိရပါတယ်။
