ကမ္ဘောဒီးယားနိုင်ငံ ဝန်ကြီးချုပ် ဟွန်ဆန် ဒီကနေ့ ဇန်နဝါရီ ၇ ရက် မနက်ပိုင်းမှာ မြန်မာနိုင်ငံကို ရောက်ရှိလာပြီလို့ သိရပါတယ်။
အခုလို အကြမ်းဖက် စစ်ရာဇဝတ်ခေါင်းဆောင်နှင့်လာရောက်တွေ့ဆုံသည့်အပေါ် ခရီးစဉ်လုံခြုံရေး အာမမခံဘူးလို့ နေပြည်တော်အခြေစိုက် ပျဉ်းမနားတော်လှန်ရေးတပ်မတော် PRA က ထုတ်ဖော်ပြောဆိုထားပါတယ်။
စစ်ကောင်စီဥက္ကဋ္ဌ မင်းအောင်လှိုင် ကို အရှေ့တောင်အာရှနိုင်ငံများအသင်းမှာ နေရာပြန်ရဖို့ ဝန်ကြီးချုပ် ဟွန်ဆန်က ကျိုးစားနေတယ်ဆိုပြီး ပြောဆိုနေတဲ့ ဒီခရီးစဉ်ဟာ ဇန်နဝါရီ ၇ ရက်ကနေ ၈ ရက်အထိ ကြာမြင့်မှာပါ။
မင်းအောင်လှိုင်ဟာ အာဏာသိမ်းပြီးနောက်ပိုင်း ပြုလုပ်တဲ့ အာဆီယံအသင်းဝင်နိုင်ငံများ ထိပ်သီးအစည်းအဝေးကို တက်ရောက်ပြီး နိုင်ငံခေါင်းဆောင်များကြား ဘုံသဘောတူချက် ၅ ချက်ကို ခေါင်းငြိမ့်သဘောတူခဲ့ပေမယ့် မြန်မာနိုင်ငံကို ပြန်ရောက်ပြီးအချိန်မှာတော့ မြန်မာနိုင်ငံနဲ့ ကိုက်ညီတာတွေပဲ အကောက်အတည်ဖော်နိုင်မယ်ဆိုပြီး ထုတ်ပြန်ခဲ့တာပါ ။
အဲ့ဒီနောက်ပိုင်း မြန်မာနိုင်ငံအာဆီယံ ကိုယ်စားလှယ် လာရောက်ဖို့ ကြိုတင်ညှိနှိုင်းခဲ့ပေမယ့် ဘုံသဘောတူချက်တွေကို ဖေါက်ဖျက်တာကြောင့် အာဆီယံ အစည်းအဝေးနဲ့ ဆက်စပ်အစည်းအဝေးတွေမှာ မြန်မာနိုင်ငံက နိုင်ငံရေးကိုယ်စားမပြုသူပဲ တက်ရောက်ခွင့်ပြု ခဲ့တာ ဖြစ်ပါတယ်။
အဲဒီလိုနိုင်ငံတကာအသိုင်းအဝန်းကြား ဝင်ဆံမှုမရှိတဲ့ စစ်ကောင်စီဥက္ကဋ္ဌနဲ့ တွေ့ဆုံဖို့ ဝန်ကြီးချုပ် ဟွန်ဆန်ဟာ အာဆီယံအသင်းဝင် အင်ဒိုနီးရှားနိုင်ငံသမ္မတ ဂျိုကိုဝီဒိုဒို နဲ့လည်း ဖုန်းနဲ့ ဆွေးနွေးခဲ့ပါတယ်။
ဆွေးနွေးပွဲရလဒ်တွေ ထုတ်ပြန်တာ မရှိပေမယ့် အင်ဒိုနီးရှားနိုင်ငံသမ္မတ ဂျိုဝီဝီက အာဆီယံ ဘုံသဘောတူချက် ၅ ချက်ကို အကောင်အတည်မဖော်ရင် အာဆီယံအစည်းအဝေးတိုင်းမှာ မြန်မာနိုင်ငံအနေနဲ့ နိုင်ငံရေးကိုယ်စားမပြုသူပဲ တက်ရောက်ခွင့် ရမယ့်သဘောထား ပြောင်းလဲမှာ မဟုတ်ဘူးဆိုပြီး တွစ်တာမှာ ရေးသားထားပါတယ်။
ဟွန်ဆန် မြန်မာနိုင်ငံကိုလာရောက်မယ်လို့ သတင်းထွက်ပေါ်လာပြီးနောက်ပိုင်းမှာလည်း နိုင်ငံတကာအဖွဲ့အစည်းအချို့က ခရီးစဉ်ဖျက်သိမ်းဖို့ တောင်းဆိုကြသလို ပြည်တွင်းအင်းအာစုတွေကလည်း ပြင်းပြင်းထန်ထန် ဆန့်ကျင်ကန့်ကွက်ကြပါတယ်။
