ပြည်တွင်းမှာသတ်မှတ်ထားတဲ့အနည်းဆုံးအခကြေးငွေနှုန်းထားဟာခေတ်ကာလနဲ့ကိုက်ညီမှုမရှိတာကြောင့်အလုပ်သမားတွေစားဝတ်နေရေးပိုမိုခက်ခဲလာပါတယ်။
ပြဌာန်းထားတဲ့ဥပဒေမှာအနည်းဆုံးအခကြေးငွေနှုန်းထားကိုခေတ်ကာလနဲ့ကိုက်ညီအောင်(၂)နှစ်တစ်ကြိမ်ပြန်လည်ပြင်ဆင်ဖို့ပြဌာန်းထားပေမယ့်အာဏာသိမ်းပြီးနောက်ပိုင်းမှာတော့ပြန်လည်ပြင်ဆင်တာမရှိတော့ပါဘူး။
“အခုရတဲ့လစာကမငတ်ရုံလေးစားနေရတယ်။အိမ်ကိုပြန်ပို့ရတဲ့သူတွေဆိုထမင်းတောင်နပ်မမှန်ဘူး။အဆောင်ခတွေလည်းဈေးတက်တယ်။နောက်အခုဆိုဧည့်စာရင်းတိုင်ဖို့ကုန်တာတွေ၊ ဘာကြေးတွေမှန်းကိုမသိဘဲပေးရတာတွေပါရှိနေတာ။အခုကဘာဝယ်အရင်ဈေးနဲ့သာမရတာလစာကတော့တက်မလာဘူး။အလုပ်ရှင်တွေကလည်းငြိမ်နေကြတယ်။သူတို့လည်းတစ်နိုင်ငံလုံးကုန်ဈေးနှုန်းတက်တဲ့ဒဏ်ကိုခံနေရတာသိပေမယ့်လစာတိုးပေးဖို့ကိုအသံမထွက်ဘူး”လို့အထည်ချုပ်အလုပ်သမားတစ်ဦးကပြောပါတယ်။
ပြည်တွင်းမှာ ပြဌာန်းထားတဲ့ အနည်းဆုံးအခကြေးငွေဥပဒေအရ တစ်ရက် (၈) နာရီအလုပ်ချိန်ကို (၄၈၀၀) ကျပ် ပေးချေနေပါတယ်။ ဒီဥပဒေအရ အနည်းဆုံးအခကြေးငွေနှုန်းထားကို နှစ်နှစ်လျှင် တစ်ကြိမ်ခေတ်နဲ့လျော်ညီတဲ့နှုန်းထားဖြစ်အောင် ပြန်လည်ပြင်ဆင်ရမယ်လို့ ဆိုပါတယ်။
လက်ရှိမှာတော့ အလုပ်ရှင်တွေပေးချေနေတဲ့နှုန်းထားဟာ (၂၀၁၈) ခုနှစ်က အတည်ပြုခဲ့တာ ဖြစ်ပါတယ်။
စစ်ကောင်စီလက်အောက်ခံ အလုပ်သမား ဝန်ကြီးဌာနက ၂၀၂၃ခုနှစ် အောက်တိုဘာလကစတင်ပြီး အစိုးရ၊ ပုဂ္ဂလိက အလုပ်သမားတွေကို တစ်ရက် (၈) နာရီ အလုပ်ချိန်အတွက် အပိုထောက်ပံ့ကြေး ကျပ် (၁၀၀၀) တိုးပေးဖို့ သတင်းထုတ်ပြန်ခဲ့တာ ဖြစ်ပါတယ်။
"အလုပ်သမားဝန်ကြီးဌာနက လူလည်ကျပြီး အပိုထောက်ပံ့ကြေးဆိုပြီး တစ်နေ့တစ်ထောင် တိုးပေး တယ်။ တကယ်က ကျွန်တော်တို့က အနခကို တရားဝင်ပြောင်းလဲသတ်မှတ်ပေးစေချင်တာပါ။ အခုကျ လူလည်ကျ တာလို့ မြင်တယ်။ တကယ်ဆို ဥပဒေကို လက်တစ်လုံးခြားလုပ်တာပါပဲ"လို့ အခြေခံသမဂ္ဂ အဖွဲ့ဝင်ဟောင်းတစ်ဦးက ပြောပါတယ်။
ပြည်တွင်းမှာ စစ်အာဏာသိမ်းပြီးနောက်ပိုင်းမှာ ကုန်ဈေးနှုန်း မြင့်တက်လာမှုကို ပြည်သူတိုင်း ခံစားနေရ ပြီး အခြေခံမိသားစုတိုင်း စားဝတ်နေရေး ပိုမိုကြပ်တည်းလာကြတာပါ။
ဒါကြောင့်လည်း ပြည်တွင်းက အလုပ်သမားအရေးလှုပ်ရှားသူတွေနဲ့ အလုပ်သမားသမဂ္ဂခေါင်းဆောင်တွေက အနည်းဆုံးအခကြေးငွေ နှုန်းထားကို ခေတ်နဲ့အညီ ( ၁၀၀၀၀) ကျပ်ထိတိုးမြှင့်ပေးဖို့လိုလားတယ်လို့ ဆိုပါတယ်။
#MyanmarLabourNews
Photo- အနိမ့်ဆုံးလုပ်ခ တစ်ရက်စာအားတွေ့ရစဥ်။
