Myanmar Best Fortune Garments Co.,Ltd အထည်ချုပ် စက်ရုံက ညနက်အချိန်ပိုတွေ နေ့စဉ် နီးပါး လုပ်ကိုင်ခိုင်းပြီး တနင်္ဂနွေနေ့ နားရက်တွေပါ လုပ်ကိုင်ခိုင်းနေတယ်လို့ အလုပ်သမားတွေက ပြောပါတယ်။ ဒီစက်ရုံကို ဟန်ဆန်း (2) လို့ အလုပ်သမားတွေက အသိများပြီး တခြား အထည်ချုပ် စက်ရုံခွဲတွေလည်း ဖွင့်လှစ်ထားတယ်လို့ သိရပါတယ်။

 

“ညစဉ် ၉ နာရီထိ အချိန်ပိုခေါ်ပါသည်။ ထမင်းဖိုးဆိုပြီး ၅၀၀ ပဲပေးတယ်။ ည ၁၂ နာရီဆင်းမှ ထမင်းဖိုး ၁၀၀၀ ပေးတယ်။ ပြီးရင် စက်ရုံထဲမှာ ခြင်ကိုက် ဘာကိုက်နဲ့ သံမန်းတလင်းပေါ် ဖြစ်သလို အိပ်ရတယ်။ မနက်ထပြန်၊ အလုပ်ချိန်မီအောင် ပြန်လာရပြန်တယ်။တနင်္ဂနွေနေ့တွေ မှာလည်း နားရက် ပိတ်ရက်မရှိသလောက်လုပ်ရတယ်။ ကျန်းမာရေးထိခိုက်တာ၊ ကြယ်သီးရိုက်စက် ရိုက်မိတာ၊ အပ်ထိတာတွေ က အများကြီး ။ ထိခိုက်လို့ နားရတာလည်း တရက်ပဲ နောက်ရက် အလုပ်ပြန်ဆင်း၊ ဆေးဖိုးလည်း မပေးပါဘူး။” လို့ ပြောပါတယ်။

 

ညစဉ် အချိန်ပိုကို အလုပ်သမား ၂၀၀ ကနေ ၃၀၀ ကြားကို ည ၉ နာရီထိ အချိန်ပိုဆင်းခိုင်းပြီး စနေနေ့တွေမှာလည်း ည ၁၂ နာရီအထိ လုပ်ကိုင်နေရတာလို့ အလုပ်သမားတွေက ပြောပါတယ်။ တနင်္ဂနွေနေ့မှာတေ့ နှစ်ပတ်တစ်ခါ တစ်ရုံးလုံး လုပ်ကိုင်ရတယ်လို့ သိရပါတယ်။ နေ့စား အလုပ်သမားတွေလည်း လုပ်ကိုင်နေကြပြီး လုပ်ခလစာ ကွဲပြား ခြားနားမှု ရှိနေတယ်လို့ အလုပ်သမားတွေက ပြောပါတယ်။

 

“နေ့စားအလုပ်သမားတွေ စက်ရုံထဲမှာ များတယ်။ အပတ်ရှင်း နေ့စားရှိသလို၊ လရှင်း နေ့စားတွေလည်း ရှိတယ်။ အပတ်ရှင်းနေစားသမားတွေက တနင်္လာနေ့မှ စနေ့နေ့ ညနေထိပဲ ဒေးကြေး ရတယ်။ လရှင်းနေ့စားသမားတွေက တနင်္ဂနွေအတွက် ဒေးကြေးရတယ်။ အမြဲတမ်းခန့် အလုပ်သမားတွေလိုတော့ တချို့အကျိုးခံစားခွင့် မရပါဘူး” လို့ ပြောပါတယ်။

နေ့စား အလုပ်သမားတွေမှာ လုပ်ငန်းခွင်ထိခိုက်မှုရှိပါက ကုသချိန်အတွင်း လုပ်ခလစာမပေးဘူးလို့လည်း သိရပါတယ်။ လုပ်သက် ၃ လအထက်ကနေ တစ်နှစ်နီးပါရှိကြတဲ့နေ့စား သမားတွေမှာ စက်ရုံအတွင်း လုပ်ကိုင်နေဆဲဖြစ်လို့ အခွင့်အရေး ဆုံးရှုံးနေတယ်လို့ အလုပ်သမားတွေက ပြောပါတယ်။