လက်ကိုင်ဖုန်းထဲမှာ VPN အပလီကေးရှင်းသုံးစွဲမှုရှိမရှိစစ်ဆေးပြီး ငွေညှစ်တာတွေလုပ်ဆောင်နေတာကြောင့်ပြည်သူတွေစိုးရိမ်သောကဖြစ်နေကြပါတယ်။
ပြည်တွင်းမှာလူမှု့ကွန်ယက်နဲ့ အခြားသော ဝပ်ဂ်ဆိုက်တွေ တွေကို နည်းပညာနဲ့ ပိတ်ပင်ထားလို့ ပြည်သူတွေအင်တာနက်သုံးစွဲရာမှာအခက်အခဲတွေမကြာခဏဖြစ်ပေါ်နေပြီး VPN အပလီကေးရှင်းကိုသုံးစွဲနေရတာပဲဖြစ်ပါတယ်။
မြန်မာနိုင်ငံတွင်းက ပြည်သူတွေအနေနဲ့ Facebook ကဲ့သို့ လူမှုကွန်ယက်သုံးစွဲလိုပါက ဖုန်းကွန်ရက်နဲ့ အင်တာနက်လိပ်စာ ခြေရာခံတာကို ဖျောက်နိုင်တဲ့ VPN ( Virtual Private Network) ကို အသုံးပြုနေရတာပါ။
"စိတ်တွေအရမ်းပင်ပန်းတယ်။တကယ်ဆိုကိုယ်ပိုင်ပိုက်ဆံနဲ့၀ယ်ထားတဲ့ဖုန်းထဲကိုယ်ဘာသာ ဘာသုံးသုံးပေါ့။
အခုကျအင်တာနက်မရလို့ VPN သုံးတော့လည်းပြစ်မှုကျူးလွန်တာဖြစ်နေတော့စိတ်တွေအဆင်မပြေဘူး။အခုသတင်းတွေမှာVPN စစ်ပြီးငွေတောင်းနေတာတွေလည်းတွေ့နေရတယ်။တကယ်ကိုမနေသင့်တော့တဲ့နိုင်ငံဖြစ်နေပြီ"လို့ပုဂ္ဂလိက၀န်ထမ်းတစ်ဦးကပြောပါတယ်။
လက်ရှိမှာစစ်ကောင်စီကဆိုက်ဘာလုံခြုံရေးဥပဒေမူကြမ်းကိုပြင်ဆင်ရေးဆွဲနေပြီးခွင့်ပြုချက်မရှိဘဲVPNသုံးစွဲရင်ထောင်ဒဏ်ဖြစ်စေငွေဒဏ်ဖြစ်စေဒဏ်နှစ်ရပ်လုံးဖြစ်စေချမှတ်ဖို့ရေးဆွဲထားတာပဲဖြစ်ပါတယ်။
"တကယ်ဆိုဥပဒေရှိတယ်ဆိုရင်တောင်အရင်ပညာပေးကာလလုပ်ရမှာလေ။အခုကျဥပဒေရှိ မရှိတောင်လူတိုင်းမသိဘူး။အောက်ခြေမှာကငွေရှာနေကြပြီ။မနေ့ကဆိုထောင်၀င်စာသွားပို့တာအသိအမတစ်ယောက်ကဖုန်းဆက်ပြီးစစ်တာရှိတယ်။ကိုယ့်ဖုန်းထဲဖျက်ထားဖို့သတိပေးတယ်။နောက်အဆင်အဆင့်သတိပေးတော့လန့်ကုန်ကြတာပေါ့။ထောင်၀င်စာကဖုန်းတော့မစစ်ပေမယ့်စိတ်ကမလုံခြုံဘူးလေ။အခုကဘာမှန်းမသိဘဲအကုန်ကြောက်နေရတယ်။လုံခြုံမှုမရှိသလိုခံစားရတယ်"လို့ထောင်၀င်စာလစဥ်ပေးပို့နေသူတစ်ဦးကပြောပါတယ်။
စစ်ကောင်စီလက်ထက်မှာပြည်သူတွေဆိုင်ကယ်၊ ဘေးတွဲဆိုင်ကယ်၊ ဘက်ထရီစက်ဘီးစီးတာတွေဟာပြစ်မှုကျူးလွန်တာဖြစ်ပြီးသိမ်းဆည်းခံနေရသလိုအခုချိန်မှာတော့လက်ကိုင်ဖုန်းသုံးစွဲတာကိုပါထိန်းချုပ်လာတာပဲဖြစ်ပါတယ်။
"ပုံမှန် မူးယစ်ဆေးဝါး တုတ် ဓား လက်နက် စစ်တယ်ထင်တာပေါ့ စစ်ကား ၂ စီးနဲ့ လူမိုက်တွေလိုလဲ တွေ့တယ်။လွယ်အိတ်ကိုတောင်းစစ်တယ် ဖုန်းကိုတွေ့တော့ ဖွင့်ခိုင်းပြီး ဖေ့စ့်ဘုတ်သုံးလားမေးတယ် ပြီးတော့ VPN တွေတွေ့တော့ တစ်ခု ၅ ထောင်ဆိုပြီး ၄ ခုရှိတော့ ၂၀၀၀၀ တောင်းလို့ ပေးလိုက်ရတယ်"လို့ ငွေကြေးပေးဆောင်ခဲ့ရသူတစ်ဦးကပြောပါတယ်။
အရင်ကတော့ အခုလို ဖုန်းစစ်တာကို စက်မှုဇုန်တွေမှာ လိုက်လံစစ်ဆေးနေပေမဲ့ လက်ရှိမှာတော့ ရန်ကုန်မြို့က မြို့နယ်အများစုမှာ စစ်ဆေးနေပြီး လမ်းဆုံလမ်းခွ ၊ ဘတ်ကားဂိတ် နဲ့ စက်ရုံအလုပ်ရုံတွေအရှေ့ တွေ မှာ လိုက်လံ စစ်ဆေးကာ ငွေကြေးတောင်းခံတာတွေပါ ပြုလုပ်လာကြတာဖြစ်ပါတယ်။
