ပြည်တွင်းအလုပ်သမားတွေရဲ့တစ်နေ့လုပ်အားခနဲ့ကိုက်ညီမှုမရှိတဲ့  အမျိုးသမီးလစဉ်သုံးပစ္စည်းကို စက်ရုံ အလုပ်ရုံ လုပ်ငန်းခွင် တွေရဲ့ ဆေးပေးခန်းတွေမှာထည့်သွင်းထားရှိပေးဖို့  အမျိုးသမီးများနေ့ကမ်ပိန်း တစ်ခုအဖြစ် တောင်းဆိုနေကြပါတယ်။

မတ် ၈ရက်နေ့မှာကျရောက်တဲ့   အပြည်ပြည်ဆိုင်ရာ အမျိုးသမီးများနေ့အထိမ်းအမှတ်အဖြစ်    မြန်မာနိုင်ငံအထွေထွေအလုပ်သမားသမဂ္ဂများအဖွဲ့ချုပ် - FGWM ရဲ့ Womens Committee  FGWM နဲ့ မဟာမိတ် သမဂ္ဂ တွေ ပူးပေါင်းပြီး  မတ်လ ၅ ရက်ကစတင်ပြုလုပ်နေတာဖြစ် ပါတယ်။

အဆမတန်မြင့်တက်လာတဲ့  အမျိုးသမီးလစဉ်သုံးပစ္စည်းဟာ ဈေးနှုန်းဟာ  အလုပ်သမား အမျိုးသမီးတွေ အတွက် အခက်အခဲတစ်ခုလိုဖြစ်ပေါ်လာတဲ့အတွက် စက်ရုံ အလုပ်ရုံ လုပ်ငန်းခွင် တွေရဲ့ဆေးပေးခန်းတွေမှာထည့်သွင်းပေးဖို့နဲ့ အဆိုပါလစဉ်သုံးပစ္စည်းတန်ဖိုးကို အထောက်အပံ့အဖြစ်ပြုလုပ်ပေးဖို့ ထည့်သွင်းတောင်းဆိုထားတာတွေ့ရပါတယ်။ 

"ဟုတ်ပါတယ်။ ဒါကပြောရမယ်ဆိုရင်အရေးကြီးတဲ့ကိစ္စရပ်တစ်ခုပါ။ စက်ရုံတွေရဲ့ဆေးပေးခန်းတွေမှာ ခေါင်းကြည်ဆေးလောက်တောင် တောင်းရတာခက်နေချိန် ဒီလိုတောင်းဆိုဖို့ကခက်တော့ခက်ပါလိမ့်မယ်။ ဒါပေမဲ့တစ်ကယ်ကိုလိုအပ်နေတာပါ။ ရတာကတစ်နေ့လုံးလုပ်မှ ၆၈၀၀ ဆိုတော့ ဒီဟာလေးကိုတော့စက်ရုံတွေကဆေးခန်းတွေမှာထားပေးမယ်ဆိုရင် ကောင်းတာပေါ့။ တစ်ချို့ကလုံခြည်စုတ်ကို pad အဖြစ်သုံးလာကြပြီ။ ဒါကအလုပ်သမားတွေအတွက် ပိုဆိုးလာတဲ့ရပ်တည်ရမှုတွေကို ပြနေတာပါပဲ"လို့  ဒဂုံမြို့သစ်တောင်ပိုင်းစက်မှုဇုန် ၂ အလုပ်သမား အမျိုးသမီးတစ်ဦးကဆိုပါတယ်။ 

ယနေ့မှာ အထည်ချုပ်လုပ်ငန်းခွင်ထဲကအမျိုးသမီးအလုပ်သမတွေအနေနဲ့ လုပ်ငန်းခွင်ထဲက စနစ်ရဲ့ ဖိနှိပ်မှုတွေဖြစ်တဲ့ လုပ်ခလစာနည်းပါးမှု ၊ အလုပ်အကိုင်ရှားပါးမှု ၊ ခွဲခြားဆက်ဆံမှု ၊ဖိနှိပ်မှု အချိန်ပိုလုပ်အားပိုအတင်းအဓမ္မခိုင်းစေမှု ၊ဗိုလ်ကျအအနိုင်ကျင့်စော်ကားခံရမှု ၊ ဥပဒေမဲ့အလုပ်ထုတ်မှု ၊ နည်းမျိုးစုံဖြင့် ခြိမ်းခြောက်ခံရမှု ၊ ဥပေဒပါ အခွင့်အရေးများဆုံးရှုံးနေမှု ၊ လူ့အခွင့်  အရေး အလုပ်သမားအခွင့်အရေးတွေကိုပြောင်ပြောင် တင်းတင်း  ချိုးဖောက်ခံနေရမှုများကိုကြံ့ကြံ့ခံနေကြတဲ့အပြင်  ဆက်တိုက်အဆမတန်မြင့်တက်နေတဲ့ကုန်ဈေးနှုန်းနဲ့ မြင့်တက်လာခြင်းမရှိတဲ့လုပ်ခလစာငွေကြေးနဲ့ မိသားစုစားဝတ်နေရေးကိုအဓိက ဦးစားပေးဖြေရှင်းနေရတဲ့အခါ အမျိုးသမီးတစ်ယောက်ရဲ့ ရာသီသွေး ပြဿနာကို ဖြေရှင်းဖို့ ဦးစားမပေးနိုင်တဲ့အခြေနေတွေမှာ အကြီးမားဆုံးစိန်ခေါ်မှုဖြစ်လာတယ်လို့ ဆိုပါတယ်။

"ဘာ့ကြောင့် အကြီးမားဆုံးစိန်ခေါ်မှုလိုပြောရလဲဆိုရင်  ၂၀၂၀ စစ်အာဏာမသိမ်းခင်  အမျိုးသမီး ထုအတွက် ရာသီသွေး ကိစ္စ ဖြေရှင်းဖို့  Pad ( ဓမ္မတာလာစဉ်အသုံးပြုပစ္စည်း ) တစ်ထုပ်တန်ကြေး အမြင့်ဆုံးမြန်မာ ကျပ်ငွေ ( ၈၀၀ကျပ် နှင့် ၉၀၀ကျပ် )  ကြားမှာပဲရှိပါလိမ့်မယ် ။ ယခုဈေးနှုန်း လုံလုံခြုံခြုံ မယိုမဖိတ်ဆိုရင် (  ၃၅၀၀ ကျပ်နှင့် ၃၈၀၀ကျပ်) ကြားမှာ ရှိပါတယ်။ တနေ့လုပ်အားခ မြန်မာကျပ်ငွေ ( ၁၀၀၀၀)ကျပ် မပြည့်တဲ့လုပ်အားခနဲ့ အမျိုးသမီးထု အတွက် မရှိမဖြစ်အသက်တမျှအရေး ကြီးသော ရာသီသွေးပြဿနာကို ဘယ်လိုဖြေရှင်းနေကြလဲ။ ဘယ်သူတွေမှာတာဝန်ရှိလဲ"လို့  ထုတ်ပြန်ချက်မှာ ထုတ်ဖော်မေးခွန်းထုတ်ထား တာဖြစ်ပါတယ်။ 

လုပ်ငန်းခွင်ထဲကအမျိုးသမီးထုအတွက်တောင်းဆို ချက် ( ၆ ) ချက်ကို  online campaign ပြုလုပ် တောင်းဆိုတာ ဖြစ်ပြီး  ပြည်တွင်း ပြည်ပ သမဂ္ဂရဲဘော်တွေ  မဟာမိတ်အဖွဲ့ တွေ  ညီအမ တွေနဲ့  အမျိုးသမီးအဖွဲ့အစည်းအသီးသီးက ညီအမ တွေလည်းသွေးစည်းညီညွတ်မှုနဲ့ ကမ်ပိန်းကို ထောက်ခံဝန်းရံပေးဖို့ကိုလည်း တောင်းဆိုထားပါတယ်။ 

ကမ်ပိန်းရဲ့တောင်းဆိုချက် ၆ချက်ကတော့

၁။  လုပ်ငန်းခွင်တွင် အမျိုးသမီးလစဉ်သုံးပစ္စည်းများ (ဓမ္မတာလာစဉ် အသုံးပြုပစ္စည်းများ) အား အခမဲ့ ထားရှိပေး (သို့ ) လစဉ်သုံး ပစ္စည်းစရိတ်ဖိုးအား ဘောနပ်အနေဖြင့် လစာထပ်ဆောင်း တွက် ချက်ပေး ရေး ။

၂။ အမျိုးသမီးအလုပ်သမားများအား ဓမ္မတာလာစဉ် ကာလများတွင် လစာအပြည့်ဖြင့်ခွင့်ရက်ပေး ရေး။

၃။ အမျိုးသမီးအလုပ်သမားများအား ကိုယ်ဝန်ဆောင်စဉ်နှင့် ဓမ္မတာလာစဉ်ကာလများတွင် အလုပ်ဝန်လျော့ပေါ့ပေး၊ တစ်ဖက်သက်စံချိန်တောင်းခြင်းအားရပ်တန့်ပေး။

၄။ လုပ်ငန်းခွင်က အမျိုးသမီးအလုပ်သမတွေအတွက် လိုအပ်တဲ့ကျန်းမာရေးစောင့်ရှောက်မှုပေး ၊ ရာသီသွေးလာချိန်မှာလည်း ကျန်းမာရေးစောင့်ရှောက်မှုပေး။

၅။ သားဆက်ခြားရန်လိုအပ်ချက်အတွက် အပိုလစာထပ်ဆောင်းပေး။

၆။ အိမ်သာ ၊ သောက်ရေ ၊လက်ဆေးဆပ်ပြာနဲ့ လစဉ်သုံးစွန့်ပစ်ပစ္စည်းအမှိုက် ပုံး သန့်ရှင်းမှုရှိနေစေရေး လုပ်ဆောင်ပေး စတဲ့တောာင်းဆိုချက်တွေဖြစ်ပါတယ်။

Myanmar Labour News ရဲ့ နောက်ဆုံးရအလုပ်သမားရေးရာ သတင်းတွေကို 
အပလီကေးရှင်း  - https://bit.ly/3oNDLga
ဝက်ဘ်ဆိုက် - https://www.myanmarlabournews.com
တယ်လီဂရမ် - https://t.me/myanmarlabournews တွေမှာလည်း ဝင်ရောက်ဖတ်ရှု့နိုင်ပါတယ်။