စစ်ကောင်စီရဲ့ ဖမ်းဆီးထိန်းသိမ်းခြင်းခံထားရတဲ့ သတင်းထောက် ကိုကျော်စွာထွန်း ဟာ နိုဝင်ဘာ ၁၄ ရက် မနက်ပိုင်းမှာ အင်းစိန်အကျဉ်းထောင်ကပြန်လည် လွတ်မြောက်ခဲ့ပါတယ်။
သတင်းထောက် ကိုကျော်စွာထွန်းဟာ ၂၀၂၂ စက်တင် ဘာ ၈ ရက်မှာ သင်္ဃန်းကျွန်း ရတနာလမ်းအနီးမှာ ဒရုန်းစမ်းသပ်မောင်းနှင်ခဲ့ရာ စစ်ကောင်စီတပ်က ဖမ်းဆီးခဲ့တာဖြစ်ပါတယ်။
စစ်ကောင်စီတပ်က ရာဇသတ်ကြီးပုဒ်မ ၅၀၅(က) ဖြင့် ဖမ်းဆီးထိန်းသိမ်းခံခဲ့ရပြီး ၂နှစ် ၂လအကြာမှာ ပြန်လွတ်ခဲ့တာဖြစ်ပါတယ်။
တစ်နိုင်ငံလုံးရှိ အကျဉ်းထောင်များတွင် ဖမ်းဆီးထိန်းသိမ်းခံထားရသော သတင်းသမားများ အမြန်ဆုံး ပြန်လွတ်စေချင်တယ်လို့ ကိုကျော်စွာထွန်းက ပြောပါတယ်။
"ကျနော်ကတော့ လွတ်လာခဲ့ပြီ။ တနိုင်ငံလုံးက အကျဉ်းထောင်တွေမှာ ဖမ်းဆီးထိန်းသိမ်းခံထားရတဲ့ သတင်းသမားတွေကိုလည်းအမြန်ဆုံး ပြန်လွတ်မြောက်စေချင်တယ်"လို့ ကိုကျော်စွာထွန်းက ပြောကြားခဲ့ပါတယ်။
သတင်းထောက် ကျော်စွာထွန်းဟာ 7 Day TVတွင် သတင်းထောက်၊ Mizzima မီဒီယာတွင် Fact Checkerအဖြစ် တာဝန်ထမ်းဆောင်ခဲ့သူဖြစ်ပါတယ်။
စစ်တပ်အာဏာသိမ်းခဲ့သော ဖေဖော်ဝါရီလ ၁ ရက်၊ ၂၀၂၁ ခုနှစ်မှစ၍ နိုဝင်ဘာလ ၁၃ ရက်၊ ၂၀၂၄ ခုနှစ်အထိ မတရားအာဏာလုမှုဖြစ်စဉ်နှင့် ဆက်စပ်၍ ဖမ်းဆီးခံခဲ့ရသူ စုစုပေါင်း (၂၇၆၇၄) ဦးရှိတယ်လို့ နိုင်ငံရေးအကျဉ်းသားများ ကူညီစောင့်ရှောက် ရေးအသင်း(AAPP)က ထုတ်ပြန်ထားပါတယ်။
ဖမ်းဆီးထိန်းသိမ်းခံထားရသူများအနက် (၂၁၁၂၀) ဦးမှာ ထိန်းသိမ်းခံနေရဆဲဖြစ်ပြီး ထိန်းသိမ်းခံနေရသူများအနက် (၉၅၂၀) ဦးမှာ ထောင်ဒဏ်ချမှတ်ခံထားရတယ်လို့ AAPP စာရင်းတွေအရ သိရပါတယ်။
News&Photo-CJ
