ရန်ကုန်တိုင်ဒေသကြီး ထန်းတပင်မြို့နယ်၊ ကုန်းတလိကျေးရွာမှာ ရွာလူကြီးက လုပ်ပိုင်ခွင့်အာဏာ အသုံးပြု ကာ ပြည်သူတွေဆီက ငွေကြေးကောက်ခံတဲ့အပြင် ကိုယ်ထိလက်ရောက် ကျူးလွန်တာတွေပါ လုပ်ဆောင်နေတာ ကြောင့် နေထိုင်သူတွေ အခက်တွေ့နေပါတယ်။
စစ်အာဏာသိမ်းပြီးနောက်မှာ ကျေးရွာတွေ၊ ရပ်ကွက်တွေမှာ ရွာသူကြီးတွေ၊ အုပ်ချုပ်ရေးမှူးတွေက အာဏာအသုံး ပြုကာ ပြည်သူတွေကို ဖိနှိပ်မှုတွေ ဆက်တိုက်ဆိုသလို လုပ်ဆောင်နေတာ ဖြစ်ပါတယ်။
“ဧည့်စာရင်းကောက်ရင် နာမည်၊ အသက်၊ မွေးရက်၊လ၊ခုနှစ်၊ အတန်းပညာ၊ အရင်နေတဲ့နေရာ၊ ကိုင်တဲ့ဖုန်း အမျိုး အစားကအစ ပေးရတယ်။ ပြီးခဲ့တဲ့ (၂၃) ရက်ကလည်း ဧည့်စာရင်း ဝင်စစ်တယ်။ နောက်ရက်တွေ စစ်ဦးမယ်လို့ လည်း သိရပါတယ်။ သူတို့က ဧည့်စာရင်းစစ်ရင် သူတို့အလိုမကျတဲ့သူဆိုရင်တစ်ခါတည်း ခေါ်သွားမယ်လည်း ကြားနေရတယ်။ ဧည့်စာရင်းက တစ်ပတ်တခါတိုင်ရတယ်။ တစ်ခါတိုင်ရင် (၅၀၀) ပေးရတယ်။ ထောက်ခံစာတစ် စောင်လုပ်ရင် နှစ်ထောင်ပေးရတယ်။ ရွာသူကြီးက စစ်သားတွေ၊ လူမိုက်တွေနဲ့ပေါင်းပြီး ရွာမှာလုပ်ချင်တိုင်း လုပ် နေတယ်။ နောက်ရွာသူကြီးက ပြည်သူတွေကို ကိုယ်ထိလက်ရောက် ကျူးလွန်တာတွေ၊ နိုင်ထက်စီးနင်း လုပ်တာ တွေလည်း ရှိနေတယ်”လို့ ပြည်သူတစ်ဦးက ပြောပါတယ်။
လက်ရှိမှာ ရွာသူကြီးက ဒေသခံတွေကို ဖိနှိပ်တာတွေ လုပ်ဆောင်နေတဲ့အပြင် အကြောင်းပြချက်မျိုးစုံပြကာ ငွေကြေးများ ကောက်ခံသလို ကောက်ခံရရှိတဲ့ငွေကြေးတွေကို ရပ်ရွာဖွံ့ဖြိုးရေးအတွက် လုပ်ဆောင်မှု မရှိတာဘဲ ဖြစ်ပါတယ်။
“ရပ်ရွာထဲက မီတာကိုလည်း ရွာသားတွေဆီကနေ မီတာပုံးအတွက်ဆိုပြီး တစ်အိမ်ထောင်ကို (၈)သိန်းကနေ (၉) သိန်းအထိ ကောက်ပါတယ်။ ကောက်ခံထားတဲ့ အပိုပိုက်ဆံတွေကို ရွာလမ်းက မြောင်းတွေတူးမယ်ပြောထားပြီး ဘာမြောင်းမှ မတူးပါဘူး။ အဲဒီပိုက်ဆံတွေ ဘယ်ရောက်သွားလဲဆိုတာလည်း မသိရပါဘူး။ နောက်ရွာထဲမှာ ပြဿနာနာတစ်ခုခုဖြစ်ရင်လည်း လူကြီးလုပ်ပေမယ့် အမှန်၊အမှားမခွဲခြားဘဲ ပိုက်ဆံရှိတဲ့ဘက်ကနေ ဘက်လိုက်ပြီး ဖြေရှင်းတော့ ငွေကြေးမတက်နိုင်တဲ့သူတွေ နစ်နာရတယ်”လို့ ဒေသခံတစ်ဦးက ပြောပါတယ်။
ကုန်တလိကျေးရွာမှာ နေထိုင်သူတွေအနေနဲ့ ရွာသူကြီးက လုပ်ပိုင်ခွင့်အာဏာအသုံးပြုကာ ဖိနှိပ်တာတွေ လုပ် ဆောင်နေတာကို တာဝန်ရှိသူတွေက အမြန်ဆုံး အရေးယူဖြေရှင်းပေးဖို့ လိုလားနေတာပဲ ဖြစ်ပါတယ်။
