မြန်မာနိုင်ငံ မှာဖြစ်ပွားနေတဲ့ လက်နက်ကိုင်ပဋိပက္ခ တွေ အရှိန်အဟုန်နဲ့ တိုးလာနေတဲ့ အတွက် မြန်မာနိုင်ငံသားတွေနဲ့ နယ်စပ်ရှိဒုက္ခသည်တွေအတွက် လူသားချင်းစာနာထောက်ထားမှု ဆိုင်ရာ အကူညီပေးနိုင်ရန် ဥရောပ သမဂ္ဂ (EU) က ယူရို ၁၅ သန်း ထပ်မံပံ့ပိုးသွားမယ်လို့ ဇွန်လ ၂၀ ရက်နေ့က ထုတ်ပြန်လိုက်ပါတယ်။
ဥရောပ သမဂ္ဂ (EU) က နိုင်ငံအတွင်း ထိခိုက်ခံရတဲ့ ပြည်သူများနဲ့ အိမ်နီးချင်း နိုင်ငံ များ ဆီ ထွက်ပြေး တိမ်းရှောင် နေရတဲ့ ဒုက္ခသည် တွေ ကို ကူညီဖို့ ယူရို ၁၅သန်း ချထားပေးမှာ ဖြစ်ရာ အဆိုပါ ထောက်ပံ့ရေးအစီစဉ်တွင် ဘင်္ဂလားဒေ့ရှ် နိုင်ငံရှိ ရိုဟင်ဂျာဒုက္ခသည်တွေ လည်း ပါတယ် လို့ ဆိုပါတယ်။
အသစ်ထပ်မံပံ့ပိုးမယ့် ယူရို ၁၅ သန်းဟာ နိုင်ငံထွက်ပြေးတိမ်းရှောင်နေရသူတွေနဲ့ ပြည်တွင်းစစ်ရှောင်များအတွက် အရေးတကြီးလိုအပ်နေတဲ့ စားနပ်ရိက္ခာ၊ သန့်ရှင်းတဲ့သောက်သုံးရေ၊ အရေးပေါ်ကျန်းမာရေးအထောက်အပံ့တွေ ထောက်ပံ့ပေးဖို့နဲ့ အန္တရာယ်ကြီးမားတဲ့ မြေမြှုပ်မိုင်းရှင်းလင်းဖို့ အသုံးပြုမယ်လို့ EU က ပြောပါတယ်။
၂၀၂၁ခုနှစ် အာဏာသိမ်း မှု ဖြစ်ပွားစဉ်ကတည်းက ဥရောပသမဂ္ဂ မှ မြန်မာနိုင်ငံ အကျပ် အတည်း အတွက် နှစ်စဉ် တိုးမြှင့် ထောက်ပံ့ပေးလာရာမှာ ၂၀၂၄ ခုနှစ် တွင် ယူရို ၃၆ သန်းရှိ ပြီ ဖြစ်တယ်လို့ဆိုပါတယ်။
စစ်တပ်အာဏာမသိမ်းခင်က မြန်မာနိုင်ငံမှာ လူသားချင်းစာနာမှုအကူအညီလိုအပ်သူတွေဟာ ၁ သန်းဝန်းကျင်သာ ရှိခဲ့ပြီး အာဏာသိမ်းပြီးနောက်ပိုင်းမှာတော့ ၁၈ သန်းကျော်အထိ ရှိလာခဲ့သလို နေအိမ်စွန့်ခွာထွက်ပြေးနေရသူနဲ့ စစ်ရှောင်နေရသူတွေအရေအတွက်ဟာ ၃ သန်းကျော် ရှိလာကြောင်း EU က ထုတ်ပြန်ထားပါတယ်။
EU အနေနဲ့ မြန်မာနိုင်ငံအတွက် လူသားချင်းစာနာမှု အထောက်အပံ့တွေကို ၁၉၉၄ ခုနှစ်က စတင်ပေးပို့ခဲ့ပြီး ၂၀၂၄ ခုနှစ်အစောပိုင်းကလည်း လူသားချင်းစာနာမှုအကူအညီများအတွက် ယူရို ၁၉ သန်းအပြင် ဒေသအလိုက် စစ်ဒဏ်သင့် ပြည်သူတွေအတွက် နောက်ထပ် ယူရို ၂ သန်း ထပ်မံထောက်ပံ့ခဲ့တယ်လို့ ထုတ်ပြန်ချက်မှာ ပါရှိပါတယ်။
ဓါတ်ပုံ- စစ်ဘေးရှောင်ကလေးငယ်များ။
