၂၀၂၄ ခုနှစ် လူဦးရေ နှင့် အိမ်အကြောင်းအရာ သန်းခေါင်စာရင်း ကောက်ယူခြင်းကို အောက်တိုဘာ ၁ ရက် က နေ ၁၅ ရက် အထိ တနိုင်ငံလုံးအတိုင်းအတာ နဲ့ ကောက်ယူမယ်လို့ စစ်ကောင်စီဘက်က သတင်းထုတ်ပြန်ထားပါတယ်။
သန်းခေါင်စာရင်း ရည်ညွှန်းချိန် ကို ၂၀၂၄ ခုနှစ် စက်တင်ဘာ ၃၀ ရက် ညသန်းခေါင်ယံအချိန်ဖြစ်ပြီး အိမ်ထောင်စုမေးခွန်းပုံစံအတွက် မေးခွန်း ၆၈ ခု၊ အဖွဲအစည်းမေးခွန်းပုံစံအတွက် မေးခွန်း ၁၈ ခုကို မေးမြန်းကောက်ယူမှာ ဖြစ်ကာ ၂၀၂၄ ခုနှစ်၊ သန်းခေါင်စာရင်း၏ ရှေ့ပြေး လူဦးရေစာရင်းကို ၂၀၂၄ ခုနှစ် ဒီဇင်ဘာလကုန်တွင် ထုတ်ပြန်နိုင်ဖို့ဆောင်ရွက် နေတယ်လို့ဆိုပါတယ်။
"အခု မြိုလယ်ခေါင် နဲ့ လူသွားလူလာ များတဲ့နေရာတွေ မှာ သန်းခေါင်းစာရင်း ကောက်ဖို ဆိုင်းဘုတ်တွေ ထောင်ထားတယ် ပြည်သူတွေကတော့ စိတ်မဝင်စားဘူး သူတို့ကတော့ သန်းခေါင်းစာရင်းကောက်မှ ရွေးကောက်ပွဲ လုပ်လိုရမှာဆိုတော့ အသဲသန် ကို လုပ်နေကြတာ ဒါပေမယ့် အခုအခြေနေ က လွယ်ကူမယ်မထင်ဘူး တိကျမှန်ကန်တာ ဘာတစ်ခုမှ မရနိုင်ဘူး ပြည်သူတွေက စစ်မှုထမ်းရမှာ စိုးတာတွေ နယ်မြေမအေးချမ်းတာတွေကြောင့် နေရပ်စွန့်ခွာသူကများနေတာ လူဦးရေစာရင်း အတိအကျ ရဖို မဖြစ်နိုင်ဘူး" လို့ ရန်ကုန်မြို့နေ ပြည်သူတစ်ဦးက ပြောပါတယ်။
ပြည်လုံးကျွတ်သန်းခေါင်စာရင်းအတွက် စာရင်းစစ်၊ စာရင်းကောက်နည်းပြသင်တန်းနှင့်ဆင့်ပွားသင်တန်းအဆင့်ဆင့်ကို ၂၀၂၄ ခုနှစ် ဩဂုတ်လမှ စတင်ဖွင့်လှစ်သွားမည်ဖြစ်ပြီး ဗဟိုအဆင့်နည်းပြသင်တန်းကို နေပြည်တော်တွင်လည်းကောင်း၊ အထူးနည်းပြသင်တန်းကို နေပြည်တော်နှင့် တိုင်းဒေသကြီး/ပြည်နယ်အားလုံးတွင်လည်းကောင်း၊ ခရိုင်နည်းပြ သင်တန်းကို ခရိုင်အဆင့် ၁၂၆ နေရာတွင်လည်းကောင်း၊ စာရင်းစစ်၊ စာရင်းကောက်သင်တန်းကို မြိုနယ်အဆင့်နေရာ ၉၀၀ ခန့်တိုတွင်လည်းကောင်း ဖွင့်လှစ်သွားမယ်လို့ သိရပါတယ်။
လုံခြုံရေး အခြေ အနေနဲ့ လမ်းပန်းဆက်သွယ်မှု အခက်အခဲ ကြောင့် သတ်မှတ်ရက် အတွင်း ကောက်ယူဖို့ ကျန်ရှိပါက ရက်ထပ်မံတိုးမြှင့် ကောက်ယူဖို့ လည်း စီစဉ်ဆောင်ရွက်ထားတယ်လို့ သိရပါတယ်။
